Ҳукумати шаҳри Кӯлоб тасмим дорад 67-умин солгарди Ғалаба бар фашизми ҳитлериро бо тантана таҷлил кунад.
Тибқи нақшаи чорабинӣ, 9-уми май иштирокчиёни ҶБВ, иштирокчиёни ҷанги Афғонистон ва Чернобил, намояндагони ҳукуматҳои шаҳриву вилоятӣ ва дигар меҳмонони расмӣ дар Боғи марказии шаҳр ба ҳам омада, баъдан дар Боғи ба номи Ғалаба назди гулхани абадӣ маросими гулчанбаргузорӣ ба хотири шаҳидони ин ҷанг баргузор мегардад. Сипас, дар Боғи фарҳангии шаҳр консерти идона ва дар театри ба номи Вализода композитсияи театрикунонидашуда доир хоҳад гашт. Дар охири чорабинӣ хизматчиёни қисми ҳарбии Русия мустаққар дар Кӯлоб, ғолибони Ҷанги Бузурги Ватаниро бо «кашаи солдатӣ» зиёфат медиҳанд.
Барои иштирокчиёни ҶБВ аз номи раиси ҳукумати вилояти Хатлон 500 сомонӣ ва низ аз ҷониби мақомоти иҷроияи ҳокимияти давлатии шаҳр 500 сомонии дигар тақдим мешавад. Гуфта мешавад, дар ҳоли ҳозир дар шаҳру ноҳияи Кӯлоб 58 собиқадори ҷанги дуюми ҷаҳонӣ ба сар мебарад.
Мӯҳр