Ҷои кор бо музди 185 сомонӣ

Имрӯз дар шаҳри Душанбе  8-умин ярмаркаи ҷойҳои кори холӣ баргузор шуд.

Дар ин ярмарка, ки назди бинои Сирки пойтахт ба кори худ оғоз кард, аз 4 ноҳияи шаҳри Душанбе- Фирдавсӣ, Сино, Шоҳмансур ва Исмоили Сомонӣ ҷойҳои кори гуногун барои хоҳишмандон пешниҳод шуд. Маош барои ҷойҳои корӣ аз 185 то беш аз 1000 сомонӣ гуфта мешуд. Дар ярмаркаи мазкур корхонаи «Тоҷикхориҷакор»-и Хадамоти муҳоҷирати кишвар низ ҷойҳои кори холӣ дар Русия пешниҳод кард. Музди меҳнат ҳудуди 15 то 25 ҳазор рубли русӣ гуфта мешуд.
Масъулини Агентии давлатии ҳифзи иҷтимоӣ, шуғли аҳолӣ ва муҳоҷират, ки қаблан 7 ярмаркаи дигар бо ташаббуси онҳо доир гардида буд, зимни баргузории ярмаркаи навбатӣ ба хабаргузории Озодагон иттилоъ доданд, ки феълан руйхати шумораи ҷойҳои кории холии ярмаркаи мазкурро омода накардаанд, вале дар 7 ярмаркаи пешин беш аз 2 ҳазор ҷойи кори холӣ пешниҳод карданд. «431 нафар ба ҷои кори доимӣ таъмин гардиданд, ки бар сари ҳар як ярмарка 65 нафарӣ рост меояд. Тайи ин муддат, зиёда аз 200 ҷавони дигар ба касбомӯзӣ роҳхат гирифт»,-афзуд манбаъ.
Ба қавли намояндагони «Тоҷикхориҷакор» бошад, тавассути ин корхона ҳудуди 60 нафар барои кор ба хориҷа фиристода шудааст.
Мӯҳр