Президенти Тоҷикистон райисҷумҳури Покистонро табрик кард

Эмомалӣ Раҳмон унвонии ҳамтои покистонии худ-Осиф Алӣ Зардорӣ барқияи шодбошӣ ирсол намуд.

Дар ин бора ба Озодагон аз хадамоти матбуотии райисҷумҳур иттилоъ доданд. Дар номаи табрикии Раҳмон аз ҷумла омадааст:
«Ҷаноби Олӣ,
Ниҳоят масрурам, ки Шумо ва мардуми дӯсти Покистонро ба ифтихори ҷашни фархундаи миллӣ – Иди истиқлоли кишвар – сидқан табрику таҳният гӯям.
Боиси қаноатмандист, ки муносибатҳои байнидавлатӣ ва ҳамкории гуногунарсаи судманди кишварҳоямон дар ду – се соли охир, ба таври муассир густариш ёфта, тобишҳои ҷадиду созанда пайдо кардаанд».
Ҳамчунин, дар идомаи табрикоти Эмомалӣ Раҳмон омадааст, ки Тоҷикистон ҳам мисли ҷониби Покистон, ба иҷрои комили аҳду паймонҳои ҳосилшудаи дуҷониба аҳамияти хос дода, итминон дорад, ки бо саъю эҳтимоми ҳарду ҷониб ҳамкориҳои ду кишвари дӯсту ҳамсоя дар шаклҳои дуҷониба ва бисёрҷониба – ба хотири таҳкими сулҳу субот ва равобити судманди созанда дар минтақа – ба пояҳои баландтари рушду тавсеа хоҳанд расид.


Мӯҳр