Банкоматҳо шабона ҳам бояд кор кунанд. Дастури Бонки миллӣ

Ин бонк ҷиҳати густариши истифодаи низоми пластикӣ дар кишвар ба ҳамаи бонкҳои кишвар дастур додаст, ки реҷаи кории худро тавре ба роҳ монанд, ки шаҳрвандон новабаста аз он, ки рӯзи истироҳат аст ё корӣ, шаб аст ё рӯз тавонанд аз банкоматҳо пул бигиранд.

Ба гуфтаи масъулини Бонки миллӣ ҳоҷат ба пули дар корти пластикӣ буда  метавонад ҳар замон ба вуҷуд ояд ва бонкҳои кишвар бояд омода бошанд дар ҳар ҷо ва ҳар вақт онро ба шаҳрвандон диҳанд. Дар Тоҷикистон, ба гуфтаи намояндагони Бонки миллӣ ҳаҷми амалиётҳо тавассути кортҳои пластикӣ 75,1 фоиз афзудаст. Миқдори банкоматҳо дар охири шашмоҳаи соли ҷорӣ назар ба соли гузашта 100 дона ё 34 фоиз ва шумораи терминалҳо 307 адад ё 82,7 фоиз зиёд шудаанд. Миқдори нафаронеро, ки айни ҳол дар Тоҷикистон кортхои пластикӣ доранд, масъулини Бонки миллӣ наздик ба ним миллион нафар арзёбӣ мекунанд.
Бо вуҷуд, масъулини Бонки миллӣ мегӯянд айни ҳол ҳаҷми гардиши пул тавассути кортҳои пластикӣ дар муқоиса бо гардиши умумии пул дар Тоҷикистон, хеле ночиз аст ва афзуданд, ки минбаъд ҳам барои рушд дар ин самт чораандешӣ хоҳанд кард.

Мӯҳр