Нигаронии президент аз муносиботи хизматчиёни ҳарбӣ

Арзу шикояти аскарон аз тарафи ҳайати фармондеҳии қисмҳои ҳарбӣ сари вақт ва воқеъбинона баррасӣ карда намешавад.

Эмомалӣ Раҳмон, райисҷумҳури Тоҷикистон аснои суханрониаш дар ҷаласаи васеъи ҳукумати кишвар дар ин бора иброз дошт. Президент бо такя ба маълумоти Вазорати мудофиаи гуфт, яке аз иллатҳои ба сифати паст ва бо кашолкорӣ анҷом ёфтани нақшаи даъвати ҷавонон ба сафи Қувваҳои мусаллаҳ дар он аст, ки раисони баъзе шаҳру ноҳияҳо вазифаи худро ба пуррагӣ иҷро намекунанд.

Ҳамзамон, президент афзуд, ки ҳанӯз ҳам дар қисмҳои низомӣ ҳолатҳои риоя накардани талаботи оинномаҳои ҳарбӣ ва дағалона вайрон гардидани муносибатҳои байниҳамдигарии хизматчиёни ҳарбӣ ба назар мерасанд. Сипас, арзу шикояти аскарон аз тарафи ҳайати фармондеҳии қисмҳои ҳарбӣ сари вақт ва воқеъбинона баррасӣ карда намешавад. Гузашта аз ин, ҳолатҳои аз ҳадди ваколати хизматии худ баромадани афсарон низ ба мушоҳида мерасад.

-Прокуратураи генералӣ, вазоратҳои мудофиа, корҳои дохилӣ ва дигар сохтору мақомоти низомиро зарур аст, ки ҷиҳати аз тарафи хизматчиёни ҳарбӣ ба таври қатъӣ риоя гардидани интизоми хизматӣ ва талаботи оинномаҳои ҳарбӣ тадбирҳои қатъӣ андешанд,- таъкид кард Эмомали Раҳмон.

Мӯҳр