Мусодираи беш аз 28 кило маводи нашъадор дар Душанбе

Дар пайи амалиёти кормандони ҳифзи ҳуқуқ дар шаҳри Душанбе дар кӯчаи Деҳнаваки болои ноҳияи Исмоили Сомонӣ аз автомашинаи тамғаи «Камаз» миқдори зиёди маводи мухадир запт ва мусодира карда шуд.

Тавре аз ВКД ба Озодагон иттилоъ доданд, зимни амалиёти мазкур соҳиби  автомашинаи тамғаи мазкур Мубинҷон Ахмедови 43 сола, сокини ноҳияи Бобоҷон Ғафурови вилояти Суғд боздошт гардид.

Гуфта мешавад, ҳангоми кофтукови автомашина 14 килою 700 грамм маводи нашъадори «афюн» ва 14 кило маводи нашъадори «ҳашиш» дарёфт ва мусодира карда шуд. Дар маҷмӯъ вазни умумиашон 28 килою 700 граммро ташкил медиҳад.

Манбаъ мегӯяд, вобаста ба ҷинояти мазкур, ҳамчун  гумонбар дар ғайриқонунӣ нигоҳ доштани маводи нашъадор Қаландарови 25 сола, сокини ноҳияи Шаҳринав, Сафаралӣ Ҳафизови 34 сола, сокини ноҳияи Ҷ.Румӣ, ва Шоҳин Нозимови 29 сола, сокини кӯчаи Назаршоеви пойтахт дастгир карда шуданд.

Бадриддин Қаландаров ва Сафаралӣ Ҳафизов қаблан бо моддаи 200 кодекси ҷиноӣ  аз озодӣ маҳрум гашта буданд.

Феълан аз рӯи ин ҳодиса парвандаи ҷиноӣ оғоз гардида, тафтишот идома дорад.
Мӯҳр