Баҳси додгоҳии Babilon то ду моҳи дигар тул мекашад
Додгоҳи олии иқтисодии Тоҷикистон мегӯяд, шикояти ширкати мобилии Вавилон (Babilon) аз ҳалномаи Додгоҳи иқтисодии шаҳри Душанбе, ки ба баҳси судии ин ширкат бо Кумитаи андоз ба нафъи дуюмӣ нуқта гузоштааст, мавриди омӯзиш қарор дошта, баррасии он то ду моҳи дигар тӯл хоҳад кашид.
Ҷамшед Файзуллоев, раҳбари дастгоҳи Додгоҳи олии иқтисодии Тоҷикисон дар суҳбат бо “Озодагон” гуфт, “Ҷамъияти саҳомии “Вавилон мобайл” ҷиҳати аз нав дида баромадани санадҳои судӣ ба Додгоҳи олии иқтисодӣ муроҷиат кардааст ва ҳоло парвандаи мазкур дар марҳалаи назоратӣ қарор дорад ва баррасии он то ду моҳ тул хоҳад кашид.”
Нофаҳмӣ миёни Кумитаи андоз ва ширкати мобилии “Вавилон” дар ҳоле ба миён омада, баҳси онҳо то зинаҳои додгоҳӣ кашида шуд, ки аввалӣ дуюмиро дар риоя накардани нархномаҳои таъинкардаи Хадамоти зиддиинҳисории Тоҷикистон муттаҳам ва 337 миллион сомонӣ қарздор намудааст. Ҳарчанд ахиран Додгоҳи иқтисодии Душанбе ин баҳсро ба манфиати Кумитаи андоз ҳал намуд, вале масъулини ширкати Вавилон ин ҳалномаро ноодилона хонда, аз болои он ба Додгоҳи олии иқтисодии кишвар шикоят бурданд.
Масъулини ширкати мазкур иддаои Кумитаи андоз дар мавриди риоя нашуданги нархномаҳои давлатиро комилан рад карда, мегӯянд, онҳо то кунун ҳар хидматрасониеро, ки ба муштариён пешкаш кардаанд, нархномаи он бо Хадамоти зиддиинҳисорӣ мувофиқа шудааст. Холиқназар Ҷумъаев, сухангӯи ширкати Вавилон дар суҳбат бо “Озодагон” гуфт, “ширкат ҳамаи хизматрасониҳои асосӣ ва иловагии худро ҳамеша бо мувофиқа бо Хадамоти зиддиинҳисорӣ роҳандозӣ намуда, дастраси муштариён гардонидааст. Мо ба суд ҳам нусхаи «Нақшаҳои тарофавӣ»-и бо мақомоти зиддиинҳисории назди Ҳукумати Ҷумҳурии Тоҷикистон 29 декабри соли 2010, 17 майи соли 2012, 12 апрели соли 2013 мувофиқашударо пешниҳод намудем. Хидматрасониҳои иловагии мо дар радифи хидматрасониҳои асосии «Выгодный», «Обичный», «Особый», «Активный, «Успешный», «Бизнесмен» тасдиқ шудаанд ва ҳар яке дорои хидматрсониҳои иловагии «Илова ва иваз кардани рақамҳои дӯстдошта» мебошанд. Хидматрасонии иловагии дигари мо «Мобипакетҳо» мебошанд, ки онҳо низ бо мувофиқа бо Хадамоти зиддиинҳисорӣ пешкаши муштариён гардонида шудаанд. Мо ба суд инчунин таҳлилҳои хаттиеро низ пешниҳод кардем, ки аз рӯи санадҳои муҳосибию молиявӣ ҳолати воқеии хароҷоти дар давраҳои баҳсӣ масрафкарда, инчунин даромади дар давраҳои баҳсӣ гирифташуда, маблағи андозҳои мустақим ва ғайримустақими ба буҷет пардохтаи ширкатро дар бар мегирад. Дар пешниҳодҳои худ мо ҳаматарафа собит кардем, ки хизматрасониҳои асосӣ ва иловагӣ ҳама бо Хадамоти зиддиинҳисорӣ мувофиқа шуда, онҳо ба муштарӣ пулакӣ пешниҳод шудаанд ва аз онҳо даромад гирифта шуда, супоридани андоз низ таъмин карда шудааст.”
Ҷаноби Ҷумъаев низ илова намуд, ки ҳалли баҳси онҳо бо Кумитаи андоз ба нафъи дуюмӣ ва додани ҳақ барои дастрасии кумита ба суратҳисобҳои онҳо дар ҳолест, ки бо дархости онҳо додгоҳ ду корманди Хадамоти зиддиинҳисориро низ ҳангоми баррасӣ парванда даъват карда, аз онҳо посух гирифтааст, ки воқеан ҳам Вавилон тамоми хидматрасониҳояшро танҳо баъди мувофиқа бо Хадамот манзури муштариён гардонидааст: “Ҳайратовар он аст, ки агар чӣ суд намояндагони Хадамоти зиддинҳисориро пурсида бошад ҳам, аммо дар ин бора дар қисми баёнии ҳалнома маълумотеро зикр накардааст ва дар қисми асоснокунии ҳалнома бошад, ба нишондоди намояндагони Хадамоти зиддиинҳисорӣ баҳои ҳуқуқӣ надодааст. Асоси ҳуқуқӣ ва мантиқии ба инобат нагирифтан ва рад кардани нишондоди онҳоро, ки иртиботи бевосита ва пайваста бо ҳолатҳои ба парванда аҳамиятдоштаро доранд, дар санади судӣ наовардааст. Агар ширкат хидматрасониҳои мавҷударо бемувофиқа бо Хадамоти зиддиинҳисорӣ ва ройгон ба муштариён пешниҳод мекард, чигуна метавонист аз ҳамаи хидматрасониҳои давраҳои баҳсӣ, яъне, солҳои 2011, 2012 ва 2013, ки мақомоти андоз онро ройгон меноманд, даромад ба даст оварда, дар маҷмўъ 406 миллиону 923 ҳазору 419 сомонию 93 дирам андоз супорад?”
Ба гуфтаи сухангӯи ширкати Вавилон, бори охир хидматрасониҳо ва тарофаҳои ин ширкат аз тарафи Хадамоти зиддиинҳисорӣ охирҳои моҳи апрели соли 2014 мавриди санҷиш қароргирифта буданд: “Рӯзи 28-уми апрели соли 2014 аз тарафи се нафар сармутахассисони соҳибтаҷрибаи Хадамоти зиддиинҳисорӣ ҳама тарофаҳои ширкат, мавриди санҷиш қарор гирифта, дар асоси он «Санади санҷишӣ» тартиб дода шуд. Дар қисми хулосавии «Санади санҷишӣ»-и тартибдодаи масъулини Хадамоти зиддиинҳисорӣ гуфта мешавад: «Аз ҷониби ҶСП «Вавилон-Мобайл» ҳангоми иҷрои кору хидматрасонӣ дар соҳаи хидматрасонии алоқаи барқӣ талаботи қоунунгузории Ҷумҳурии Тоҷикитон рақобат ва маҳдудкунии инҳисорӣ дар бозорҳои мол, ҳимояи ҳуқуқи истеъмолкунандагон ва реклама риоя гардидааст». Пас чи гуна метавон хулосаи як Хадамоти масъули давлатиро зери суол бурд, ки ҳама тарофаҳо бо он мувофиқа шуда, бо нархҳои муайян пешкаши муштариён гардонида шудааст?”
Мусоҳиби мо дар мавриди он ки дар сурати риоя шудани тамоми нархномаҳои давлатӣ аз сӯи Вавилон масъулини Кумитаи андоз бо чӣ далел ин ширкатро ҳудуди 340 миллион сомонӣ қарздор кардааст, мегӯяд, худи онҳо низ намедонанд, ин қарз аз куҷо омадааст. Ҷумъаев мегӯяд, иддаои беш аз 300 миллионии Кумитаи андоз дар ҳолест, ки дар “Санади санҷишӣ”-и ин ниҳод хатоҳои зиёди “барқасдона” ва ҷиддӣ ба назар расида, даромади умумии ширкатро дар соли 2011 «4 миллиарду 232 миллиону 789 ҳазору 393 сомонӣ», баробар ба нисфи ҳаҷми умумии Буҷети давлатии Тоҷикистон барои соли 2011 нишон дода шудааст: “Мо намедонем, ки ин рақамҳо аз куҷо гирифта шудаанд. Вале дар «Санади санҷишӣ» -и мақомоти андоз ғалатҳои зиёди ҷиддии арифметики ҳисоб кардани манбаи андозбандии андозҳои овардашуда, хироҷи иҷозатномавӣ ва бар илова ҳисоб кардани андозҳоро мо ошкор кардем, ки аз куҷо гирифта шудаанд, касе намедонад ва ба назар чунин менамояд, ки чунин иштибоҳҳоро тафтишгарон махсус барои зиёд намудани манбаи андозбандӣ содир кардаанд. Масалан дар саҳифаи 11 «Санади санҷишӣ»-и Кумитаи андоз даромади умумии ширкат дар соли 2011 «4 миллиарду 232 миллиону 789 ҳазору 393 сомонӣ» нишондода шудааст, ки ин баробар ба нисфи ҳаҷми умумии Буҷети давлатии ҶумҳурииТоҷикистон барои соли 2011 мебошад. Ин магар боваркарданӣ аст? Чунин ғалатҳои барқасдона кам нестанд, ки ба назари мо масъулин махсус бо чунин роҳ манбаи андозбандиро афзун намуда, андозбандиро зиёд кардаанд ва мометавонем дар оянда ҳар яке аз онҳоро дар алоҳидагӣ ба матбуот пешкаш гардонем. Ҳол он ки дар соли 2011 даромади ширкат ҳамагӣ 423 миллиону 789 ҳазору 391 сомонию 64 дирамро ташкил медод. Дар ин ҳолат, масъулини мақомоти андоз, даромади ҷамъиятро ба маблағи 3 миллиарду 809 миллион сомонӣ зиёд нишон додаанд ва аз ҳамин ҳисоб андозҳои гуногунро дар солҳои 2011, 2012 ва 2013 барзиёд ҳисоб карда, ширкатро зиёда аз 340 миллион сомонӣ қарздор намудаанд. Чунин иштибоҳҳои ба назари мо ҳадафмандона кам нестанд ва анқариб дар тамоми саҳифаҳои «Санади санҷишӣ» ба чашм мерасанд, ки омӯзиши хеле ҷиддиро тақозо мекунад.
Дар ҳамин ҳол, масъулини Хадамоти зиддиинҳисории Тоҷикистон ҳарчанд зимни як нишасти хабарии ин ниҳод гуфта буданд, ки фаъолияти “Babilon-mobile” зери назорати қатъист ва то ҳол қонуншиканиеро аз ҷониби ин ширкат сабт накардаанд, вале ба суоли “Озодагон”, ки “оё боре дар марҳалаи баҳсӣ ҳолатҳои риоя нашудани нархномаҳои давлатӣ аз ҷониби ширкати Вавилонро ба қайд гирифтаанд?” ҳозир нашуданд дубора посух гӯянд. Масъулини ин ниҳод гуфтанд, баҳси Кумитаи андоз ва ширкати Вавилон дар марҳалаҳои судӣ қарор дошта, онҳо ҳоло наметавонанд, дар ин бора чизе гӯянд.”
Раҳбари дастгоҳи Додгоҳи олии иқтисодӣ эҳсоси таъсирӣ берунӣ ба баррасии ин парвандаро рад карда, ба баррасии одилонаи он таъкид менамояд: ”Аслан парванда аз сӯи як судя баррасӣ мешавад ва вақте яке аз ҷонибҳои баҳс норозӣ бошад, дар сурати даъво ин бор аз сӯи колегияи судӣ, яъне се судя баррасӣ мешавад ва ман шахсан ҳамчун раҳбари дастгоҳ боварӣ надорам, ягон таъсиррасонӣ аз берун бошад ва хабарҳо дар бораи он ки аз берун ба мо “амр”-е барои муфлискунии ин ширкат омада бошад, комилан рад мекунам ва онҳо беасос мебошанд.”
Ин баҳси додгоҳии кумитаи андоз бо ширвати Вавилон дар ҳолест, ки қаблан, ин ниҳоди давлатии кишвар бо ширкатҳои мобилии "Билайн" ва "Мегафон" низ баҳсҳои додгоҳӣ дошт ва ниҳоят Додгоҳи олии иқтисодии кишвар баҳсро ба фоидаи ин ду ширкат ҳал кард.
Мӯҳр
ТАҚВИМ
« Май 2024 » |
---|
Душ | Сеш | Чор | Пан | Ҷум | Шан | Якш |
---|
| 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | |