15 май 2015 14:21Тоҷикистон / Сиёсат / Дидгоҳи хос / Тема дня

Муфтӣ дар бораи "қасрдорҳо": Пой дар қуртуқи ҳукумат монда, мансаб гирифтанд

Сайидмукаррам Абдулқодирзода, раиси Шӯрои уламои Маркази исломии Тоҷикистон имрӯз, 15-уми май, дар хутбаи намози Ҷумъа дар масҷиди марказии Душанбе, қазияи Лоиқ Раҷабов, ҷангҷӯи кушташудаи тоҷик дар Сурияро зикр карда, гуфт, ин фард ҳам ба Ватан ва ҳам ба зану фарзандаш хиёнат кардааст.

Абдулқодирзода, ки дар мавзӯи амонат ва хиёнат суҳбат мекард, аз саргузашти Раҷабов ёдоварӣ кард, ки худаш дар Сурия кушта шудаасту зану фарзандонаш дар дасти ҷангиёни “Давлати исломӣ” мондаанд. Раиси Шӯрои уламо инчунин саргузашти ҷангҷӯи дигари тоҷик, Фаррух Шариповро зикр намуд, ки феълан пушаймон шуда, ба Ватан баргаштааст. Муфтӣ аз қавли Шарипов илова кард, ки имрӯз бисёре аз ҷангиёни Сурия ва Ироқ аз корашон пушаймон шудаанд, аммо роҳи халосӣ намеёбанд.

Раиси Шӯрои уламои Маркази исломӣ аз мардуми Тоҷикистон даъват намуд, ки фирефтаи ҳар гуна фитна нашаванд, чун кишвари мо дар меҳвари таваҷҷуҳи абарқудратҳо қарор гирифтааст.

Саидмукаррам Абдулқодирзода дар хитоб ба шаҳрвандони кишвар таъкид намуд, ки ба ҳарфи бархеҳо бовар накунанд, чун инҳо дар хориҷа қасру кушк доранд ва дар сурати нохушие боз ба ҳамон қасрҳояшон рафта, зиндагӣ мекунанд. Абдулқодирзода мушаххасан нагуфт, киро дар назар дорад, аммо таъкид намуд, ки инҳо як бор кишварро ноором карданду рафтанд дар қасру кушкҳояшон зиндагӣ карданд ва вақти бозгашташон низ пой бар қуртуқи ҳамин ҳукумат монданд, ки ба онҳо вазифаҳои баланд диҳад: “Вазифаҳои пастро қабул накарданд”.

Ин даъватҳои муфтӣ дар ҳоле садо медиҳанд, ки тибқи иттилои расмӣ аз Тоҷикистон 40 хонавода, ё худ наздики 400 ҷангҷӯ дар ҷангҳои Сурия ва Ироқ иштирок доранд.

Мӯҳр

Хабарҳои монанд: