Радди даъвои вакилони Зайд Саид алайҳи Абдуфаттоҳи Ғоиб
Додгоҳи ноҳияи Исмоили Сомонии шаҳри Душанбе аризаи даъвогии вакилони мудофеи Зайд Саидов, соҳибкори зиндонии тоҷикро алайҳи Абдуфаттоҳи Ғоиб, раиси Оҷонсии мубориза бо фасоди Тоҷикистон рад кардааст.
Шӯҳрат Қудратов, яке аз вакилони дифои Зайд Саидов дар сӯҳбат ба “Озодагон” гуфт, ки додраси додгоҳи ноҳияи Исмоили Сомонӣ, Темур Ҳафизов аризаи шикоятии вакилонро алайҳи Абдуфаттоҳи Ғоиб бо далели кам будани маълумот бозпас фиристодааст: “Ҳарчанд аризаи мо 17-уми март рад шудааст, мо аз ин танҳо ду рӯз қабл огоҳӣ пайдо кардем. Ҳоло мо бо ҷамъ кардани далелҳои бештар машғул буда, аввали ҳафтаи оянда шикояти худро дубора ба додгоҳи Исмоили Сомонӣ мефиристем.”
Вакилони мудофеи Зайд Саидов, соҳибкор, вазири собиқи саноат ва раҳбари зиндонии “Тоҷикистони нав”, рӯзи 17 феврал аз болои Абдуфаттоҳи Ғоиб, раиси Оҷонсии мубориза бо фасоди молӣ ба додгоҳи ноҳияи Исмоили Сомонӣ шикоят бурданд. Вакилони Зайд Саидов гуфта буданд, ки тариқи додгоҳ Абдуфаттоҳи Ғоиб изҳороти беасосашро дар ҳаққи онҳо рад намояду ҷуброни зарари маънавӣ пардозад.
Абдуфаттоҳи Ғоиб рӯзи 4 феврал дар нишасти матбуотии ниҳодаш гуфт, ташхиси ДНК-и Зайд Саидовро, ки муфаттишон ба додгоҳ пешниҳод кардаанд, 99,9 дарсад дуруст аст. Дар мавриди он ки вакилони мудофеъ навори масъулини “Био Папа”, масъули ташхиси ДНК-и Зайд Саидовро, пешниҳод карда, нишон доданд, ки хулосаи ироакардаи муфаттишон тақаллубӣ аст, Абдуфаттоҳи Ғоиб изҳор дошт: “Ин кори дасти вакилон аст, ки бо ин роҳ мехоҳанд, ба наздикони Зайд нишон диҳанд, ки кор карда истодаанд. Зеро мо медонем, ки 9 моҳ боз адвокатҳо ҳатто субҳонаро дар хонаи Зайд Саидов мехӯранд.”
Аммо Исҳоқ Табаров, яке аз се вакили мудофеи Зайд Саидов дар шарҳи ин гуфтаҳои раиси Оҷонсии зидди фасоди молӣ гуфт, “шахсан ба ”Био Папа” муроҷиат кардам ва онҳо он нусхаеро, ки ба муфаттишон додаанд, ба ман низ нишон доданд. Дар он падари фарзанди гӯиё ҷабрдида будани зерҳимояи мо куллан рад шудааст.” Дар ҳамин ҳол Пажӯҳишгоҳи мустақили “Био-Папа” дар Русия низ изҳороти Абдуфаттоҳи Ғоибро, ки хулосаи ташхиси ин лабораторияро зери шубҳа гузоштааст, бе асос хонд.
Зайд Саидов баъд аз эълони азмаш барои таъсиси ҳизби “Тоҷикистони нав” боздошт шуд. Додгоҳ моҳи декабри соли гузашта, баъд аз ҳафт моҳи боздошташ, ӯро дар қаллобӣ, сӯиистифода аз мақом, бисёрзанӣ ва таҷовуз ба номус муҷрим шинохта, барои 26 сол равонаи зиндон кард.
Мӯҳр
ТАҚВИМ
« Апрел 2024 » |
---|
Душ | Сеш | Чор | Пан | Ҷум | Шан | Якш |
---|
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | |