Оҷонсӣ “майзадагӣ”-и муфаттиши парвандаи Зайд Саидовро рад кард

Роҳбарияти Оҷонсии мубориза бо фасоди молӣ дар Тоҷикистон бо пахши як иттилоия барканории Зуҳал Раҳимов -- яке аз муфаттишони парвандаи Зайд Саидов, соҳибкори зиндонии тоҷикро шарҳ додааст.

Дар иттиллоияи Оҷонсӣ хабари барои истеъмоли машруботи спиртӣ барканор гардидани Раҳимов рад шуда, ҳамзамон таъкид гардидааст, ки роҳбарияти ин ниҳод нисбат ба фаъолияти ӯ зимни тафтиши парвандаи Зайд Саидов ягон эроде надорад.

Оҷонсӣ таъйид мекунад, воқеан, Зуҳал Раҳимов бо фармони раҳбари ин ниҳод аз вазифа барканор ва дар ихтиёри кадрҳо қарор дода шудааст. Ин ниҳод ба ихтиёри кадрҳо равона шудани Раҳимовро ба корҳои илмияш рабт додааст, ки ният дорад, барои ҳимоя ба Русия равад.

Дар мавриди шахсияти ин муфаттиши парвандаи баҳсбарангези Зайд Саидов, соҳибкори маҳкумшуда ба 26 соли зиндон, Оҷонсии зидди фасод овардааст: “Зуҳал Раҳимов факултаи ҳуқуқшиносии Донишгоҳи Миллии Тоҷикистонро бо дипломи аъло хатм намуда, ба фаъолият дар сохтори Агентӣ аз моҳи апрели соли 2008 ҳамчун иҷрокунандаи вазифаи муфаттиши Раёсати Агентӣ дар шаҳри Душанбе шурӯъ намудааст.”

Ин ниҳод мегӯяд, кордонӣ, саводу малакаи баланд ва тафтишотчии дараҷаи олӣ будани Зуҳал Раҳимовро ба назар гирифта, раҳбари Оҷонсӣ соли 2012 ӯро ба вазифаи сардори Шӯъбаи 3-юми Раёсати тафтишотии Агентӣ таъин кардааст: “Раҳимов аз соли 2013 аспиранти шӯъбаи ғоибонаи Донишкадаи фалсафа, сиёсатшиносӣ ва ҳуқуқи Академияи Илмҳои Ҷумҳурии Тоҷикистон буда, мавзӯи илмии ӯ «Таснифи ҳуқуқӣ-ҷиноятӣ ва криминологии ҷинояти гирифтани пора» мебошад. Бо сабаби он, ки бо ихтисоси Раҳимов дар Тоҷикистон Шӯрои олимон мавҷуд нест, барои ба итмом расонидани кори илмии хеш Раҳимов нияти сафари Русияро дорад ва дар ҳамин хусус ӯ дар ихтиёри кардрҳо ҷой дода шудааст.” Мӯҳр