13 май 2014 14:28Тоҷикистон / Рӯ ба рӯ

Оҷонсӣ, Рустами Эмомалӣ, қиссаи ду Боинг ва “Нахуст Лизинг”

Оҷонсии зидди фасоди молӣ дар Тоҷикистон ширкати “Нахуст Лизинг”-ро, ки ба “Тоҷик Эйр” ҳавопаймои “Боинг” иҷора додааст, барои сарпечӣ аз пардохтҳои гумрукӣ дар ҳаҷми махсусан калон муттаҳам мекунад.

Бар асоси иттилои масъулони ин ниҳод, камбуди “Нахуст Лизинг” дар пайи тафтиши муштарак бо Хадамоти гумруки Тоҷикистон, ки раҳбарияшро Рустами Эмомалӣ -- писари бузурги раисиҷумҳур Эмомалӣ Раҳмон бар уҳда дорад, муайян шудааст. Гуфта мешавад, соли 2008 “Нахуст Лизинг” ба “Тоҷик Эйр” ҳавопаймои “Боинг 757-200 ЕR”-ро ба иҷора додааст, ки он бо низоми гумрукии “воридоти муваққатӣ” бо арзиши 20 миллиону 895 ҳазор доллар ба расмият дароварда шудааст.

Манбаъ мегӯяд, соли 2012, вақте муҳлати воридоти муваққатӣ ба охир мерасад, зимни дигарбора ба расмиятдарории гумрукӣ роҳбарияти “Нахуст Лизинг” бо маслиҳати пешакӣ бо шахсони масъул бо истифода аз компютер ба варақаҳои аввали шартномаи иҷораи ҳавопаймо тағйирот ворид намуда, теъдоди ҷойи нишастро аз 218 то ба 200 адад кам кардаанд.

Дар маҷмуъ, ба итттилои Оҷонсии зидди фасоди молӣ дар Тоҷикистон дар пайи тақаллубкориҳо зимни иҷораи ҳавопаймо пардохтҳои гумрукӣ ба маблағи беш аз 20 миллион сомонӣ рӯйпӯш шудаанд ва баҳра аз пардохтҳои гумрукии ситониданашуда бошад, беш аз 12 миллион сомониро ташкил додааст.

Оҷонсии зидди фасоди молӣ мегӯяд, дар пайи дақиқ шудани ин тақаллубкорӣ дар асоси қарори Додгоҳи ноҳияи Фирдавсӣ аз 21 апрели соли ҷорӣ 2 ҳавопаймои “Боинг 737-400”-и “Нахуст Лизинг” ҳабс шуда, дар натиҷа аз ҷониби ин ширкат ба маблағи 20 миллиону 812 ҳазор сомонӣ зарар ба буҷаи давлат барқарор гардидааст.

Ширкати “Нахуст Лизинг” соли 2004 аз тарафи “Тоҷиксодиротбонк”, ки раҳбарияшро Тоҷиддин Пирзода бар уҳда дорад, ташкил шудааст. Фирдавс Бердиев, мудири пешини ширкат, соли 2012 дар як суҳбати худ гуфтааст, раҳбарияти “Нахуст Лизинг” аз сӯи Шӯрои муассисони “Тоҷиксодиротбонк” ба муҳлати се сол таъин мешаванд.

Аз моҳи нобяри соли 2004, замони таъсисаш, то июли 2007 ин ширкатро Равшан Сотиволдиев раҳбарӣ карда, баъдан ин масъулиятро ба Фирдавс Бердиев додаанд ва ҳоло Абдулазиз Мирзоев дар ин мақом будааст.

Мӯҳр

Хабарҳои монанд: