29 май 2014 17:54Тоҷикистон / Сиёсат

Сафир: “Ҳаводиси Украина бо ҷанги дохилии Тоҷикистон монандие надорад”

Виктор Никитюк, сафири Украина дар Душанбе, гуфт, наметавонад бесарусмониҳои кишварашро ба ҷанги шаҳрвандии Тоҷикистон монанд кунад. Ӯ ин ҳарфҳоро дар нишасти хабарии 29 май дар Душанбе баён дошт.

Ба қавли Никитюк, дар солҳои 90-уми қарни гузашта дар Тоҷикистон фазои дигар буд ва он монандие ба ҳаводиси кунунии Украина надорад. Ин дар ҳолест, ки Эмомалӣ Раҳмон – раисиҷумҳури Тоҷикистон рӯзи 8 майи соли ҷорӣ дар дар ҳамоиши ғайрирасмии Созмони паймони амнияти дастҷамъӣ (ОДКБ) дар Маскав гуфта буд, “мо аз рухдоди ҳаводиси ахир дар ин кишвари пасошӯравӣ амиқан нигарон ҳастем. Ин раванд барои Тоҷикистон ошност, ки дар оғози ба даст овардани истиқлолият ба даргирии мусаллаҳона оварда, кишварро бо мушкилоти сахти иқтисодию иҷтимоӣ рӯбарӯ карда буд.”

Оқои Никитюк дар ин нишасти хабарӣ хабарҳо дар бораи эҳтимоли иштироки баъзе аз шаҳрвандони Тоҷикистон дар нооромиҳои кишварашро рад кард. Ӯ гуфт, ин иттилоест, ки ҳанӯз тасдиқ нашудааст. Сафири Украина дар Тоҷикистон афзуд, баъд аз расман ба кор шуруъ кардани ҳайати ҳукумати нави кишвараш, ҳеч тағйироте дар муносибати Киев бо Душанбе дар назар нест.

Вай бо ишора ба изҳороти намояндаи мақомоти амниятии кишвараш дар мавриди эҳтимоли хориҷ шудани Украина аз ҳайати Иттиҳоди Давлатҳои Мустақил (СНГ) гуфт, ин масъала дар назар аст: “Дар воқеъ, Украина бештар барои ҳамгироӣ бо Аврупо талош мекунад. Аммо ин маънои онро надорад, ки Киев дар ҳамкорӣ бо кишварҳои ИДМ сиёсати худро тағйир диҳад. Агар Украина аз ҳайати ИДМ барояд, равобит ва ҳамкории худро бо давлатҳои аъзои ИДМ тағйир нахоҳад дод.”

Никитюк гуфт, берун шудан ва ё боқӣ мондани Украина дар ҳайати ИДМ аз қарори ниҳоии Радаи Олӣ, яъне парлумон, вобаста аст. Виктор Никитюк илова кард, баъди расман эълон шудани раисҷумҳури тозаинтихоб, Укрина барои беҳтар кардани муносибати худ бо кишварҳои ҳамсоя, аз ҷумла Русия кӯшиш мекунад: “Амнияти ҳар давлат аз амният ва муносибат бо ҳамояаш вобаста аст. Аз ин хотир, мо ҳам талош хоҳем кард, то ҳамкории худро бо Русия идома бидиҳем.”

Оқои Никитюк мегӯяд, баъди ба фаъолият шуруъ кардани ҳукумат, Укрина барои баргардонидани Қрим ба ҳудуди худ шуруъ мекунад.

Мӯҳр

Хабарҳои монанд: