Нигаронии HRW аз нақзи ҳуқуқи башар зимни бунёди Роғун
Дидбони ҳуқуқи башар ё худ, HRW бо нашри як гузориши 81 саҳифаӣ мегӯяд, зимни сохтмони нерӯгоҳи Роғун дар Тоҷикистон ҳуқуқи садҳо оила нақз шудааст.
Дар ин гузориш, ки зери унвони “Вақте мо ба ин ҷо омадем, ранҷу азоб кашидем” нашр гардидааст ва имрӯз, 25-уми июн дар Душанбе муаррифӣ шуд, сухан сари оилаҳое меравад, ки аз макони сохтмони Роғун ба ҷойҳои нав кӯчонда шудаанд.
HRW мегӯяд, кӯчондани ҳудуди 1500 оиларо аз соли 2009 инҷониб пайгирӣ карда, ҳолатҳои зиёди нақзи ҳуқуқи башарро сабт намудааст: “Бисёре аз оилаҳои муҳоҷиршуда бо мушкилоти вобаста ба ҷои истиқомат, дастрасӣ ба ғизо, об ва маориф мувоҷҷеҳ шудаанд. Мушкили асосӣ дар он аст, ки ҳаҷми ҷубронпулӣ барои муҳоҷирон кофӣ нест. Барои оилаҳои муҳоҷир дар ҷои нав шароит барои чорводорӣ низ муҳайё нашудааст. Дар бархе аз маҳаллаҳои оилаҳои муҳоҷиршуда, то ҳол ҳам мактаб бунёд нагардидааст.”
Франческа Корбачо, пажуҳишгари HRW ва муаллифи гузориш бо зикри он, ки дар маҷмуъ аз майдони сохтмони Роғун бояд ҳудуди 42 ҳазор нафар кӯчонида шаванд, аз ҳукумат ва донорҳо хостааст, камбудиҳои то ҳол ҷойдоштаро ислоҳ кунанду ба такрори онҳо дар раванди минбаъда роҳ надиҳанд: “Ҳуқуқҳои инсон бояд барои рушди иқтисодӣ фидо нашаванд.”
HRW аз гузориши ниҳоии Бонки Ҷаҳонӣ дар мавриди Роғун низ, ки 17-уми июни соли равон нашр шудааст, ёдовар шуда, таъкид мекунад, ки дар ин ҳуҷҷат низ ба муҳоҷиршавии оилаҳо диққати калон дода шудааст: “Бонки ҷаҳонӣ низ таъкид намудааст, ки таъмини шароити хуби зиндагӣ барои муҳоҷиршудагон бояд дар маркази таваҷҷуҳи ҳукумат бошад.”
Дидбони ҳуқуқи башар дар навбати худ аз Бонки Ҷаҳонӣ ва донорҳои дигар даъват намудааст, дар ҳамкорӣ бо ҳукумати Тоҷикистон риояи ҳуқуқи оилаҳои муҳоҷиршуда ва дастрасияшонро ба ҳаёти сазовор таъмин кунанд.
Гузориши HRW аз моҳи ноябри соли 2013 то моҳи феврали соли 2014 гузаронда шуда, 156 мусоҳиба бо муҳоҷиршудагон аз майдони сохтмони Роғунро дар бар мегирад. Муаллифон таъкид мекунанд, ки чун муҳоҷират бо ташаббуси давлат сурат мегирад, бояд адолат таъмин гардад.
Франческа Корбачо бо ҷонибдорӣ аз талоши давлат барои таъмини истиқлолияти энергетикӣ таъкид намудааст, ки ҳамзамон мақомот бояд масъалаи пардохти ҷубронпулӣ ба муҳоҷиронро бозбинӣ намоянд, бо замин барои хоҷагидорӣ, мактаб, об барқ таъмин кунанд.
Мӯҳр
ТАҚВИМ
« Май 2024 » |
---|
Душ | Сеш | Чор | Пан | Ҷум | Шан | Якш |
---|
| 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | |