ҲНИТ мавқеашро нисбат ба “гирдиҳамоӣ” рӯшан кард
“Кишвар ва миллати мо бист сол пеш гирифтори фитна гардида дар вартаи парокандашавӣ ва аз байн рафтан қарор дошт. Сабабҳои асосии ин фитна, ҳамдигарро нафаҳмидан, эътироф ва эҳтиром накардан, яккатозӣ ва ғурур аз қудрат ва тавонмандии хеш, инчунин ноогоҳӣ аз барномаҳову тарҳҳои бегонагон барои барангехтани ҳисси нобоварӣ ва эътироз байни мардум ва мақомоти давлатӣ буд. Маҳз бемасъулиятӣ ва кутоҳандешии мақомоти давлатии давр ва баъзе афроду гуруҳҳои ҳангомаҷӯ миллату давлатро ба коми ҷанги шаҳрвандӣ кашид, ки баҳои он ҷони бештар аз 150 ҳазор инсон ва ятиму бесаробон мондани садҳо ҳазори дигар гашт”,-гуфта мешавад дар ин муроҷиатнома.
Дар идома Шӯрои сиёсии ҲНИТ мегӯяд, барои наҷоти миллат аз ин варта заҳмату талошҳои зиёд харҷ гашт, ки меҳвари асосии он ҳамдигарфаҳмӣ, эҳтирому эътирофи якдигар ва интихоб кардани роҳи гуфтугӯ (муколама) ҳамчун ягона василаи ҳалли мушкилот будаанд: “Миллати тоҷик тасмим гирифт, ки дигар ҳеч гоҳ алайҳи якдигар силоҳ намебардорад ва нерӯ танҳо барои дифоъ аз ватан, миллат ва нангу номуси милливу динӣ ва он ҳам дар чорчуби қонун истифода хоҳад шуд. Миллат ба хулоса омад, ки Тоҷикистон бояд як кишвари озоду демократӣ, дунявӣ ва ягона бошад, ки ҳама андешаву афкор, ҳизбу ҳаракатҳо, созмонҳову ташкилотҳои фарҳангӣ, сиёсӣ, тиҷоратӣ дар доираи қонун озодона, баробар ва бе ягон маҳдудияту фишор фаолият намоянд. Миллат ба ин тасмимҳо, аҳду паймонҳо ва қавлу қасамҳо бовар кард ва имрӯз ҳам боварӣ пурра коста нагаштааст. Маҳз ҳамин умед ва боварҳо як фазои солиму боварибахшро дар ҷомеъаи мо ба вуҷуд овард, ки ҳама қишрҳои миллатро новобаста аз ҳизбияту ҷаҳонбинӣ, минтақаву маҳалаш атрофи роҳбари кишвар, ҳукумати марказӣ ва ниходҳои давлатӣ ҷамъ овард ва Тоҷикистон аз соли 2000 то 2010 як марҳалаи рушди босуботи иқтисодӣ, сиёсӣ ва фарҳангиро дошт. Ин ҳама натиҷаи сулҳу ваҳдат, якдигарфаҳмӣ, эҳтироми ҳама қишрҳои ҷомеъа ва рушди бемайлон ба самти мардумсолорӣ, таҳкими ҷомеъаи шаҳрвандии қонунмеҳвар ва ҳуқуқбунёд буд”.
Дар муроҷиатнома таъкид шудааст, ки талошҳои бегонагон барои бесубот кардани фазои дохилии кившар камтарин таъсир надошт, зеро мардум, гуруҳҳои сиёсӣ, иқтисодӣ ва иҷтимоии гуногун аз сиёсатҳои мақомомти давлатӣ дар маҷмуъ розӣ буданд: “Боиси таъассуф аст, ки панҷ соли ахир дар муносибати макомоти давлатӣ бо гуруҳҳои алоҳидаи сиёсӣ, динӣ ва иқтисодӣ тағйироти манфӣ ба вуҷуд омад, ки сабабҳову омилони ин тағйирот барои мардум равшан нест. Иштибоҳҳои пай дар пайи баъзе мақомот боиси халалдор гаштани ин фазои пур аз эътимоди тарафайн гашт, ки аз он баъзе доираҳои хориҷиву дохилӣ метавонанд сӯистифода кунанд. Он доираҳо чанд сол пеш ҳеҷ имконяти таъсир расонидан ба зеҳни мардум, ба хусус ҷавононро надоштанд. Мутаасифона сиёсатҳои иштибоҳии баъзе мақомоти давлатӣ, ки барои роҳбарияти кишвар ҷуз хидмати хирсона чизи дигаре нестанд, ин фурсатро барои баъзе кишварҳо ва доираҳои манфиатҷӯ фароҳам месозад, то бо истифода аз руҳияи эътирозии қишрҳои алоҳида сиёсатҳои худро амалӣ намоянд. Ҷои таъассуф аст, ки баъзе аз шаҳровандони ноогоҳ, вале осебдида аз амалҳои иштибоҳии қисме аз кормандони давлатӣ дар самти сиёсат, иқтисод, дину мазҳаб ва тиҷорат ба доми чунин доираҳо афтида, қурбонии дасисаҳо мегарданд. Аксари онҳо танҳо осебдидаанду фиребхурда ва ягона хоҳиши онҳо зистан дар як ҷомеаи озоду пешрафта ва холӣ аз фасоду фишору таъқиб мебошад. То битавонанд бидуни пардохти ришва тиҷорату таҳсил кунанд, дар интихоби худ барои тарзи зист, либос ва намуди зоҳирӣ озод бошанд, дар овозу раъйи онҳо тақаллуб сурат нагирад, боварӣ дошта бошанд, ки фардо тиҷорату моликияти онҳоро касе бо баҳонаҳои сохтаву бофта намегирад. Аксарияти мардуми кишвар, аз ҷумла, бисёре аз онҳое, ки метавонанд ба фитнаҳо дода шаванд, ҷуз ин чизи дигареро талаб надоранд, ки ҳақи конституционӣ ва табиии онҳост”.
Шӯрои сиёсии ҲНИТ мегӯяд, бетафовутии тӯлонӣ ва нодида гирифтани ин хоҳишоти мардум аз тарафи мақомот ва истифода аз василаҳои фишору таҳдид, зурнамоӣ ва туҳмату таҳқир нисбати дигарандешон, ҳизбу ҳаркатҳо ва гуруҳҳои қонунии кишвар, об рехтан ба осиёби ҳамон доираҳост, ки мунтазири фурсат барои эҷоди беэътимодӣ ва бесуботӣ дар кившар мебошанд. “Имрӯзҳо дар ҷомеа, шабакаҳои иҷтимоӣ ва расонаҳо дар бораи роҳандозии гирдиҳамоии эътирозӣ аз тарафи баъзе созмонҳо ва афрод овозаҳо ва хабарҳои гуногун паҳн мегардад. Ин масъала аъзо ва тарафдорони ҲНИТ-ро, ҳамчун як ҳизби сиёсии кившар, ки барои расидан ба сулҳу оштӣ ва суботи ҷомеъа заҳмати зиёд кашидааст, бетараф гузошта наметавонад. Ҳаргуна иқдом, амал ва даъвате, ки ба сулҳу ваҳдат, оромиш ва суботи кишвар зарба мезанад, мухолафат ба қонунгузорӣ дорад, новобаста аз аҳдоф ва нияти баргузоркунандагонаш, мавриди маҳкумият ва инкори ҲНИТ қарор хоҳад гирифт. Баъзе доираҳо ва афрод, бо назардошти фишорҳо ва маҳдудиятҳои ахири мақомот болои ҲНИТ эҳтимоли ҷонибдории қисме аз аъзо ва тарафдорони моро аз ин иқдомҳо пешбинӣ кардаанд, ки ин шинохт комилан мухолифи сиёсатҳо ва мавқеъгириҳои ҲНИТ мебошад. ҲНИТ бештарин осебро аз ин сиёсатҳои иштибоҳии мақомот дидааст ва ҳақи эътирозу нороҳатиро бештар аз гуруҳи дигар дорад. Аз тарафи дигар, бештарин интиқодро барои сабру таҳаммул дар муқобили ин фишорҳо боз ҳам ҲНИТ шунидааст, ки ба касе пӯшида нест. Бо вуҷуди ин ҳама, мо ба ин бовар ҳастем, ки ҳамагуна эътирозот ва пешниҳодҳоро барои ислоҳи вазъият ва иштибоҳот метавон бо истифода аз василаҳои мусолиматомез ва қонунӣ ба мақомот расонд. Аз чумла, эътирозу гирдиҳамоӣ низ яке аз василаҳои қонунӣ мебошанд, ки қонунгузории кишвар онро иҷозат додаст ва тибқи қонун бояд аввал ба мақомоти давлатӣ аз тарафи созмондиҳандагон расман муроҷиат шавад. Нодида гирифтани талаботи қонун ва истифода набурдан аз он маънии кашонидани қазия ба фазои берун аз чорчуби қонунро дорад, ки метавонад оқибати ногувор барои кишвар ва миллат дошта бошад. Мо мутмаин ҳастем, ки дар байни роҳбарон ва созмондиҳандагони ин гирдиҳамоӣ афроди масъулиятшинос ва ватандӯстони воқеӣ кам нестанд ва ба хотири ояндаи миллату давлати азизамон тасмими дуруст хоҳанд гирифт”.
Дар охир шӯрои сиёсии ҳизб аз созмондиҳандагони ин гирдаҳамоӣ даъват кардааст, аз тасмими худ даст кашида, бо расонаӣ кардани он пеши роҳи ҳамагуна бесуботӣ ва нооромиро бигиранд. “Дар баробари ин мо аз аъзо, ҷонибдорон ва ҳама касоне, ки мавқеи ҲНИТ-ро эҳтиром мегузоранд даъват менамоем, дар ҳеч гуна чорабиниҳои ғайриқонунӣ ширкат накунанд ва аз ҳолатҳои фитнаангез парҳез намоянд. Ширкат дар чорабиниҳое, ки қонунӣ нестанд ё қонунӣ ҳастанду роҳбарияти ҳизб бо он розӣ нест, мухолафат ба сиёсатҳо ва санадҳои дохилии ҳизб шинохта мешавад ва метавонад боиси ихроҷи чунин аъзо аз сафи ҳизб бигардад”.
Муроҷиати Шӯрои сиёсии ҲНИТ дар ҳолест, ки бино ба иттилои расонаҳо, рӯзи 8 октябр бархе аз қумондонҳои собиқ Иттиҳоди нерӯҳои опозитсиюни тоҷик ва Фронти халқӣ низ бо баргузории як ҷаласа дар Душанбе тасмими баргузории гирдиҳамоӣ дар Душанберо маҳкум кардаанд.
Хабарҳо дар мавриди ташкили гирдиҳамоии эътирозӣ дар маркази пойтахти Тоҷикистон дар рӯзи 10 октябр, аз чанд рӯзи қабл дар шабакаҳои иҷтимоӣ паҳн гардид. Гуфта мешавад, ташаббускори ин "гирдиҳамоӣ" "Гурӯҳи 24" бо раҳбарии Умаралӣ Қувватов аст. Дар ҳамин ҳол, ахиран Додситонии кулли Тоҷикистон бо пешниҳоди аризаи даъвогӣ аз Додгоҳи Олӣ хост, “Гуруҳи 24”-ро ташкилоти ифротгаро (экстремистӣ) эътироф намуда, фаъолияташро дар қаламрави кишвар манъ кунад. Қарор аст, Додгоҳи олӣ рӯзи панҷшанбеи 9 октябр тасмимашро дар ин бора эълон кунад.
Моро ҳамроҳӣ кунед:
Дар ФЕЙСБУК (FACEBOOK)
Дар ЮТЮБ (YOUTUBE) Мӯҳр
Эзоҳ илова кунед
ХАБАРҲОИ ОХИРИН
Баҳси пурзӯр кардани ҳифзи сарҳади Тоҷикистону Афғонистон дар дидори Э.Раҳмон ва ҳайати парлумони Аврупо10:09Оғози фурӯши смартфонҳои iPhone 8 ва iPhone 8 Plus!09:49БО ЗАБОНИ ШЕЪР: Ман зи андешаи турконаи як ҳамватанам метарсам...15:34Чаро ҳукумат ҳамеша ба ТАЛКО имтиёз медиҳад?14:16“Шантаж”-и ҳамсар: Аз ҳаққи модарӣ даст накашӣ расвоят мекунам10:27Баҳси буҷа: Аз қарзи маош то қарзи хориҷӣ11:57Сарвазири Тоҷикистон бо Президенти Узбакистон мулоқот мекунад11:05Ҳимояти СММ аз cарбози тоҷики пайрави “Шоҳидони Яҳво”, ки либоси низомиро рад кард10:38АКС+ВИДЕО. Нахустин анҷумани маъюбони Тоҷикистон дар Душанбе11:51Маҷлис: Аз тағйироти кадрӣ то ваъдаи 80 мансабдор барои пулдиҳӣ аз кисаи худ15:46100 метр дуртар: Тамокукашӣ маҳдудтар шуд13:21Аз парвандаи Маҳмудов то муроҷиати ҷабрдидагони "7 бурҷ": Роҳкиро надорем (ВИДЕО)11:18Пешниҳоди журналисти тоҷик ба раҳбарони кишварҳои ҷаҳон: 2018-ро соли беяроқӣ эълон кунем!09:33Агентии зидди коррупсия гуфт, “Умед-88” ва Вазорати молия аз “Роғун” қарз гирифтаанд08:01Таърихи имрӯз: Мавлуд, ҷашн, санаҳои таърихӣ, дамои ҳаво, бозори арз07:44
АХБОРИ ҶОЛИБ
10:09, 04 ноябр 2017
ТАҚВИМ
| « Май 2024 » | ||||||
|---|---|---|---|---|---|---|
| Душ | Сеш | Чор | Пан | Ҷум | Шан | Якш |
| 1 | 2 | 3 | 4 | 5 | ||
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | ||
