Дӯстов: Сӯфиевро маҷбур мекунем, ки хатояшро ислоҳ кунад
Саймиддин Дӯстов, раҳбари созмони ҷамъиятии "ИНДЕМ", муассиси оҷонсии “Тоҷнюс”, ҷаримабандии хабарнигораш Қамари Аҳрорро аз ҷониби додгоҳи Хуҷанд ғайриқонунӣ хонда, таъкид намуд, ки барои барқарор шудани адолат мубориза хоҳанд бурд.
Дӯстов дар вокуниш ба қарори додгоҳи Хуҷанд, ки субҳи имрӯз, 29-уми октябр бо даъвои Зафар Сӯфиев, ноиби сардори шуъбаи умури дохилии Хуҷанд хабарнигори “Тоҷнюз”-ро дар саркашӣ аз амри пулис гунаҳкор дониста, 120 сомонӣ ҷарима баст, изҳор дошт: “Худи қазия баёнгӯи сатҳи пасти касбии ноиби сардори ШВКД -и милисаи шаҳри Хуҷанд мебошад. Ҳар афсари дигар хатояшро фаҳмида ислоҳ мекард, аммо Зафар Суфиев ин корро ба худ раво надонист, ки иштибоҳи дуюми ӯст. Мо чанд моҳ хомӯшӣ ихтиёр кардему ба сардори милиса имкон додем, ки мавқеи носолимашро тағйир диҳад, мутаассифона фаросаташ нарасид. Дар ниҳоят мо ӯро маҷбур хоҳем кард, ки иштибоҳашро ислоҳ намояд".
Маврид ба зикр аст, ки 6-уми август Қамари Аҳрор аз ҷониби кормандони ШКД-и шаҳри Хуҷанд, ҳангоми иҷрои вазифаи касбии журналистӣ ғайриқонунӣ барои се соат боздошт ва мавриди пурсуҷӯ қарор гирифта буд. Хабарнигор Қамари Аҳрор (Амаков) дар ҳоле боздошт шуд, ки аз ҷараёни Мусобиқаи байналмилалии бокс, барои дарёфти Ҷоизаи ба номи Исмоил Ҳамзаалиев, навор мегирифт.
Яке аз кормандони милиса аз ӯ хостааст, то наворгириро қатъ кунад. Баъди пешниҳоди ҳуҷҷати хабарнигорӣ ва фаҳмондани ҳолат, ки ӯ вазифаи касбии худро анҷом медиҳад, Зафар Суфиев, муовини сардори Шӯъбаи корҳои дохилӣ хабарнигорро ба наздаш хонда, гуфтааст: “Навори шумо ба ҳеч кас даркор нест!”.
Баъд Зафар Суфиев амр кардааст, ки журналистро ба ШКД бурда, аз ӯ баёнот гиранд. Бино ба гуфтаи хабарнигор Қамари Аҳрор, нисбати ӯ муносибати дағалона карда, гуфтаанд, ки ӯ бо иттиҳоми ба амру талаботи кормандони ВКД гӯш надодан аз дохили толори мусобиқа боздошт шудааст. Ӯро дар муддати се соат дар утоқи торик, ки чароғ надоштааст, нигоҳ дошта аз ӯ баёнот гирифтаанд.
Мутобиқи қонунгузории Тоҷикистон монеъ шудан ба фаъолияти касбии журналист манъ буда, барои он ҷазо муайян карда шудааст.
Тибқи моддаи 162-и Кодекси ҷиноятии Тоҷикистон барои монеъ шудан ба фаъолияти касбии журналист бо ҷарима ба андозаи аз панҷсад то ҳаштсад нишондиҳанда барои ҳисобҳо ё бо корҳои ислоҳӣ ба мўҳлати то ду сол ҷазо таиън шудааст.
Қаблан Суди шаҳри Хуҷанд даъвои ШКД-и ин шаҳрро барои комил набуданаш бозпас гардонида буд, аммо ин даъво дубора ба суд ирсол шуда буд, ки бо ҷариманбандии хабарнигор анҷомид. Файзиниссо Воҳидова, вакили дифои Қамари Аҳрор мегӯяд, аз болои қарори додгоҳи шаҳри Хуҷанд шикояти касатсионӣ хоҳанд бурд.
Мӯҳр
ТАҚВИМ
« Май 2024 » |
---|
Душ | Сеш | Чор | Пан | Ҷум | Шан | Якш |
---|
| 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | |