Паёми солинавӣ: Аз шахсони арзанда дар парлумон то мушкилоту шукрона
Эмомалӣ Раҳмон, раисиҷумҳури Тоҷикистон дар паёми солинавияш ба мардуми кишвар баробари зикри ҳаводиси соли гузашта, инчунин аз ҳаёти сиёсиву иҷтимоии Тоҷикистони дар соли 2015 суҳбат кардааст.
Тибқи иттилои дафтари матбуоти раисиҷумҳури Тоҷикистон, Эмомалӣ Раҳмон аз ҷумла зикр кардааст, якуми марти соли 2015 маъракаи муҳимми сиёсӣ, яъне интихоботи вакилон ба мақоми олии қонунгузори мамлакат - Маҷлиси намояндагони Маҷлиси Олӣ ва маҷлисҳои маҳаллии вакилони халқ баргузор мешавад: “Итминон дорам, ки чорабинии мазкур дар доираи Конститутсия ва қонунҳои амалкунанда, дар сатҳи баланди сиёсиву ташкилӣ ва бо ширкати фаъолонаи интихобкунандагон баргузор мегардад ва мардуми шарифи Тоҷикистон ба хотири ояндаи неки кишварамон бо масъулияти баланд намояндагони шоиставу арзандаи худро ба парламенти мамлакат ва маҷлисҳои маҳаллӣ интихоб менамоянд.”
Раисиҷумҳури Тоҷикистон афзудааст, интихоботи навбатӣ бояд омили муҳими боз ҳам таҳким ёфтани ваҳдати миллӣ ва сарҷамъии мардуми Тоҷикистон гардад: “Фаромӯш набояд кард, ки мо ба ҷомеаи ҷаҳонӣ на як бору ду бор фарҳанги баланди сиёсӣ ва суннати таҳаммулгароӣ нишон додаем.”
Эмомалӣ Раҳмон инчунин таъкид намудааст, соли 2015 инчунин бузургдошти 700 - солагии Мир Сайид Алии Ҳамадонӣ ва 3000 - солагии Ҳисори Шодмон баргузор мегарданд. Ӯ эътироф намудааст, феълан дар кишвар ҳанӯз масъалаву мушкилоти зиёди ҳалталаб дорем, ки ҳамаи онҳоро худамон, бо шукронаи сулҳу оромӣ, Ватани соҳибихтиёр ва давлати соҳибистиқлоламон ҳаллу бартараф месозем: “Мардуми фарҳангиву ободгари Тоҷикистон ҳамеша ба оянда назари нек доранд ва бовар дорам, ки ҳамаи мо дар ҳамбастагӣ минбаъд низ барои фатҳи қуллаҳои боз ҳам баландтар, таъмини зиндагии пурсаодати халқамон ва дастовардҳои нав қадамҳои устувор мегузорем.”
Дар ниҳояти паём Эмомалӣ Раҳмон бори дигар ҳамаи сокинон ва ҳамватанони бурунмарзиамонро бо фарорасии соли нави мелодии 2015 сидқан табрик гуфта, рӯзгори босаодат, иқболи баланд, файзу баракати зиндагӣ ва ба Тоҷикистон пешрафту ободӣ орзу намудааст.
Мӯҳр
ТАҚВИМ
« Май 2024 » |
---|
Душ | Сеш | Чор | Пан | Ҷум | Шан | Якш |
---|
| 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | |