14 янв 2015 14:02Тоҷикистон / Иҷтимоӣ / Рӯ ба рӯ / Тема дня

Нишасти гумрук: Мошини Рустами Эмомалӣ буду худаш не

Хадамоти гумруки Тоҷикистон дар аҳди роҳбари нав Рустами Эмомалӣ дар соли 2014 санҷиш ё аттестатсияи кормандонро роҳандозӣ карда, муайян намудааст, ки беш аз 11 дарсади мансабдорони ин ниҳод ба мансабҳояшон сазовор нестанд.

Ба иттилои манбаъ зимни санҷиши 672 масъули гумрук муайян шуд, ки 74 нафарашон нопурра ва 3 нафарашон пурра ба мансабҳои ишғолкарда ҷавобгӯй нестанд: “Ба онҳое, ки нопурра ҷавобгӯянд, муҳлат дода шуд, то малакаашонро такмил диҳанд, вале се нафаре, ки пурра номувофиқ буданд, аз кор озод шуданд.”

Неъматбой Раҳматов, муовини аввали Хадамоти гумруки Тоҷикистон гуфт, дар соли сипаришуда 151 корманди гумрук ба ҷазои интизомӣ кашида шуда, 15 нафарашон аз кор озод шуданд: “Дар маҷмуъ бо хоҳиши худ ва сабабҳои дигар 112 нафар аз кор дар Хадамоти гумрук рафтанд.”

Раҳматов аз навоварии Рустами Эмомалӣ, ки қабул ба кор дар Хадамоти гумрукро тариқи озмун роҳандозӣ кард, истиқбол намуд: “Озмунҳо дар ду давра гузашта, дар даври аввал аз 550 довталаб 77 нафар ба вазифаҳо дар Хадамоти гумрук таъин шуданд. Дар даври дуюм низ аз 55 довталаб 24 нафар ба кор қабул шуданд, ки бисёрашон як ё ду забони хориҷиро медонанд.”

Раҳматов гуфт, бо мақсади ҷилавгирӣ аз фасод ҷойивазкунии кадрҳо дар Хадамоти гумрук роҳандозӣ шудааст: “Нафаре, ки зиёда аз се сол дар як вазифа аст, ба ҷои дигар гузаронда мешавад. Дар соли 2014 тамоми кормандони майдонҳои ҳавоӣ иваз шуданд ва феълан ҳар гумрукчии майдонҳои ҳавоӣ ҳадди ақал як ё ду забони хориҷиро медонад. Дар маҷмуъ 784 нафар мавриди ҷойивазкунӣ қарор гирифтанд.”

Ноиби аввали раиси Хадамоти гумрук дар посух ба суоли “Озодагон” ба фаъолияти яксолаи Рустами Эмомалӣ дар Хадамоти гумрук баҳои хуб дод: “Натиҷаҳое, ки Хадамоти гумрук ба даст овард, фикр мекунам, меъёри баҳодиҳӣ ба кори сардори Хадамот мебошанд. Дар шароити буҳронҳо, таҳримҳо ва низоъҳои Украина, ки ба вазъи тиҷорати хориҷӣ таъсири манфӣ доштанд, Хадамоти гумрук тавонист ба буҷаи кишвар 4 миллиарду 3,7 миллион сомонӣ ворид кунад, ки ин аз нақша 203,9 миллион сомонӣ зиёд мебошад.”

Аммо қисмати дуюми суоли “Озодагон”-ро, ки чаро шахсан раиси Хадамот барои муаррифии дастовардҳо назди хабарнигорон ҳозир нашуд, чун мошинҳояш дар назди бино ба назар мерасиданд, Раҳматов посух надод ва онро сарфи назар кард.

Дар маҷмуъ тибқи иттилои Хадамоти гумруки Тоҷикистон ҳаҷми умумии савдои хориҷии кишвар дар соли 2014 - 5 миллиарду 319 миллион доллари амрикоиро ташкил додааст, ки аз он 4 миллиарду 340 миллион доллар воридот ва 979 миллион долларро содирот ташкил медиҳад.

Мӯҳр

Хабарҳои монанд: