Дар ҳоле, ки расонаҳои Ғарб сохтмони Театри миллии Тоҷикистон бо харҷи 680 миллион сомониро дар Душанбе матраҳ карда, дар пасманзари заифии иқтисод ва камтаваҷҷуҳии мардуми кишвар ба театр суол гузоштаанд, ки “он барои кист?”, “Озодагон” низ аз коршиносони тоҷик суол намуд, ки бунёди муассисаҳои фарҳангӣ муҳим аст ё корхонаҳои саноатӣ?
Табаралӣ Ғаниев, иқтисодшинос Агар ба рушди ҷомеа назар дошта бошем, аслан барои фаъолияти ҳунарӣ ташкил кардан ҷомеаи солими касбӣ зарур аст. Ва саломатии ҷомеа ба омӯзиши ҳунари касбӣ ниёз дорад. Моро зарур аст, ки мутахассисони касбӣ омода намуда, аз ҳунари онҳо истифода бикунем. Яъне, зурурати доштани китобхонаи миллӣ ва ё сарчашмаҳои ғанӣ гардонидани маънавиёти инсон яке аз аркони рушди ҷомеаи оянда аст.
Зулфиқор Исмоилиён, коршиноси масоили иқтисодӣ Сохтани корхонаҳои тавлидӣ муҳимтар аст, зеро маҳсулоти он дар бозор ба фурӯш гузошта мешавад ва аз он молиёт ба даст биёяд. На ин ки масалан, театру китобхонаву чизҳои дигар. Шумо бубинед, қурби рубли русӣ поён шуд, аҳволи мардум чӣ шуд? Ва ҳоло дар саррофиҳои Тоҷикистон доллар пайдо карда намешавад, зеро намефурӯшанд. Ин ҳамааш натиҷаи ҳамин аст, ки мо иқтисод надорем ва вобаста ҳастем.
Ҷовид Муқим, коршиноси масоили иқтисодӣ Аз нигоҳи иқтисодӣ гуем, барои кишваре, ки аҳолиии қобили меҳнаташ зиёд асту қисми зиёди онҳо дар муҳоҷирати меҳнатӣ ҳастанд, сохтани корхонаҳо аз ҳама муҳимтар аст. Бояд иншооте сохта шаванд, ки онҳо якум мардумро бо ҷои кор таъмин кунанду бо ин роҳ зиндагии онҳоро беҳтар кунанд, дувум бо сохтани корхона ҳафтод дарсади маҳсулот ба фурӯш равад ва барои кишвар суд биёварад. Бинобар ин агар аз ман мепурсиданд, ки чӣ бисозем, ман мегуфтам, ки нахуст бояд иқтисодро тавсеа дод.
Мӯҳр