ВКД ва КДАМ: Дар қазияи мактаби 44-и Рашт ноболиғон даст доштаанд
Вазорати корҳои дохилӣ (ВКД) ва Кумитаи давлатии амнияти миллии Тоҷикистон (КДАМ) мегӯянд, дар оташ задани харитаҳо ва гузоштани як мактуби таҳдидомез ба омӯзгорони мактбаи миёнаи таҳсилоти умумии №44-и ноҳияи Рашт ду ноболиғ даст дошта, он хусусияти сиёсӣ, динӣ-мазҳабӣ ё ифротгароӣ надорад.
Маркази матбуоти ВКД ва Маркази робитаҳои ҷамъиятии КДАМ бо нашри як изҳороти муштарак гуфтаанд, шаби 17 ба 18 апрели соли равон ашхоси номаълум ба бинои мактбаи миёнаи таҳсилоти умумии №44 деҳаи Боғистони ҷамоати Б.Раҳимзодаи ноҳияи Рашт даромада, гӯшаи методӣ, овезаҳо, газетаҳои деворӣ, ҷадвали дарсҳоро корношоям кардаанд. Ҳамчунин, харитаҳои собиқ Иттиҳоди Шӯравӣ ва ҷамоати мазкурро қисман оташ зада, ба омӯзгорон мактуби беимзои таҳдидомезро гузоштаанд: “Дар ҷараёни роҳандозии чорабиниҳои оперативӣ-ҷустуҷӯйӣ ва тафтишотӣ, кормандони мақомоти корҳои дохилӣ ва амнияти миллӣ муайян намуданд, ки дар ҳодисаи зикрёфта 2 нафар ноболиғ хонандагони мактаби миёнаи №44 Раҳимов Неъматулло Умарович, соли таваллудаш 2000-ум ва писарамакаш Раҳимов Хуршед Муродхоҷаевич, соли таваллудаш 1999 даст доранд”.
Дар изҳорот гуфта мешавад, бино ба нишондоди Зарифамоҳ Акрамова моиндари Хуршед Раҳимов, писараш мубталои бемории руҳӣ буда, тақрибан 2 сол пеш, аз беэҳтиётӣ як қисми манзили зисташонро сӯзонидааст: “17 апрел моиндари Раҳимов Хуршед, ки фарроши мактаб мебошад, бо нияти рафтан ба меҳмонӣ, калиди муассисаро ба фарзандаш медиҳад ва аз ӯ хоҳиш мекунад, ки бегоҳ, баъди анҷоми дарсҳо дари мактабро маҳкам кунад. Раҳимов Хуршед аз беназоратии волидайн ва муаллимон истифода бурда, ҳамроҳ бо Раҳимов Неъматулло, тақрибан соатҳои аз 23-24:00 ба мактаби миёнаи №44 медароянд. Мутобиқи нишондоди худи ноболиғон, онҳо аз тарс дар торикии долони мактаб ашёҳои таълимиро оташ гиронда, роҳро равшан намуданд. Баъди баланд шудани аланга, бо мақсади хомӯш кардан ба болои он харитаи собиқ Иттиҳоди Шӯравиро мепартоянд. Вале бинобар сабаби кушта натавонистани оташ, Раҳимов Хуршед ва Раҳимов Неъматулло онро бо пойҳояшон хомӯш карда, аз ҷойи ҳодиса ғайб мезананд”.
Дар идома ин изҳороти муштарак омадааст: “Муайян карда шуд, ки воқеаи дар мактаби миёнаи №44 деҳаи Боғистони ҷамоати Б.Раҳимзодаи ноҳияи Рашт рухдода ягон хел хусусияти сиёсӣ, динӣ-мазҳабӣ ё ифротгароӣ надошта, танҳо дар натиҷаи хусумати шахсиву оилавии баъзе аз сокинони деҳаи болозикр ва аъмоли авбошонаи ду ноболиғ содир карда шудааст. Айни замон аз рӯйи ҳодисаи мазкур парвандаи ҷиноятӣ оғоз гардидааст, тафтишоти пурраи он давом дорад”.
Мӯҳр
ТАҚВИМ
« Апрел 2024 » |
---|
Душ | Сеш | Чор | Пан | Ҷум | Шан | Якш |
---|
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | |