Талаби 3 солу 9 моҳи зиндон барои Бурҳон Абдуллоев
Айбдоркунандаи давлатӣ барои Бурҳон Абдуллоев, яке аз саҳмдорони бозори “Ином”-и Шаҳритӯс, ки ба қасди оташ задани ин бозор гумонбар дониста мешавад, аз додраси парванда 3 солу 9 моҳи зиндон талаб намудааст.
Дар ин бора Раҳматилло Зоиров, яке аз вакилони мудофеи Бурҳон Абдуллоев рӯзи 24 апрел ба “Озодагон” иттилоъ дода, афзуд, ки ӯ 23-юми апрел зимни мурофиа дар додгоҳи вилояти Хатлон бегуноҳ будани зерҳимояаш ва сохтакориҳо нисбати ӯро исбот кардааст.
Раҳматилло Зоиров мегӯяд, айбдоркунандаи давлатӣ ҳукми зерҳимояашро тибқи моддаҳои 32 қисми 4, тайёрӣ ба ҷиноят ва моддаи 255 қисми 2 - қасдан несту нобуд ё вайрон кардани молу мулк талаб кардааст, ки дар мурофиаҳои додгоҳӣ ягон амали ҷиноятии Бурҳон Абдуллоев бо ин моддаҳо исботи худро наёфтаанд: “Чунки Бурҳон Абдуллоев умуман гунаҳкор нест ва ин ҳама нисбати ӯ сохтакорист. Қаблан телефонҳои ӯро гуш мекардаанд, ки дар суҳбатҳои телефонӣ низ ҳеч чиз наёфтаанд. Ҳоло фаҳмидан лозим, ки чӣ хел бе санади судӣ, ғайриқонунӣ телефонҳои ӯро гуш кардаанд?”.
Раҳматилло Зоиров афзуд, дар назар аст, ки рӯзи чаҳоршанбеи 29 апрел ҳукми зерҳимояаш аз ҷониби додраси додгоҳи вилояти Хатлон содир гардад.
Қаблан додгоҳ Бурҳон Абдуллоев, соҳибкори тоҷикро, ки барои бозори “Ином”-и Шаҳритӯс бо Муҳибулло Саъдуллоев, додарарӯси президент кашмакаши додгоҳӣ дорад, ба муҳлати ду моҳ ба ҳабси пешакӣ маҳкум намуда буд.
Хонаводаи Абдуллоев яке аз саҳҳомони бозори “Ином” дар ноҳияи Шаҳритӯс ба шумор мераванд, ки бо додарарӯси президенти кишвар - Муҳибулло Саъдуллоев сари тақсимоти ин бозор баҳси додгоҳӣ доштанд. Моҳи майи соли гузашта Додгоҳи олии иқтисодӣ қарор кард, ки бозор байни тарафҳо 50 ба 50 тақсим карда шавад. Абдуллоевҳо аз ин қарор ба Додгоҳи олии Тоҷикистон шикоят бурда, эълон карданд, ки дар сурати расидагӣ нашудан ба шикояти онҳо ба барномаи телевизиони "Пуст говорят"-и шабакаи аввали телевизиони Русия муроҷиат хоҳанд кард.
Мӯҳр
ТАҚВИМ
« Май 2024 » |
---|
Душ | Сеш | Чор | Пан | Ҷум | Шан | Якш |
---|
| 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | |