12 июн 2015 15:28Тоҷикистон / Иқтисодӣ

Оқохон барои коҳиши низоъ дар марзи Тоҷикистону Қирғизистон канал месозад

Бунёди Оқохон дар Тоҷикистон аз татбиқи лоиҳаҳои тозаи худ хабар медиҳад. Ба иттилои масъулини ин Бунёд ҳоло бо дастгирии Департаменти Бритониёи Кабир оид ба рушди байналмилалӣ (DFID) дар Тоҷикистон ду лоиҳа, яке дар шаҳри Хоруғи Вилояти Мухтори Кӯҳистони Бадахшон ва дигаре дар шаҳри Исфараи вилояти Суғд, роҳандозӣ мешаванд.

Дар доираи ин лоиҳаҳо дар шаҳри Хоруғ барои Маркази экофарҳангии Помир (РЕСТА) бунёди бинои нав дар назар гирифта шудааст, ки масоҳаташ 714 метри мураббаъро ташкил хоҳад дод.

Дар иттилоияе, ки ин Бунёд пахш кардааст, гуфта мешавад, ки “маркази мазкур ба сайёҳони дохиливу хориҷӣ намудҳои гуногуни хизматрасониро пешниҳод намуда, барои инкишофи сайёҳӣ, ки яке аз соҳаҳои судманд мебошад, мусоидат менамояд ва барои мардуми маҳаллӣ ҷойҳои нави корро эҷод мекунад”. Гуфта мешавад, ки Кумитаи ҷавонон, варзиш ва сайёҳии назди Ҳукумати Тоҷикистон ҳамчунин ба фаъолияти муштарак баҳри равнақи сайёҳии миллӣ ва байналмилалӣ ба ин пружа ҷалб мегардад.

Дар чоҳорчӯби лоиҳаи дигар дар шаҳри Исфара, Бунёди Оқохон канали Чилгозиро ба дарозии 22 километр таъмир менамояд, ки аз он барои обёрии манотиқи ҳамсарҳад низ истифода мешавад.

Мақсади асосии лоиҳаи мазкур коҳиши низоъ дар минтақаҳои сарҳадиии Тоҷикистон ва Қирғизистон унвон шуда, барои самаранок истифода бурдани захираҳои об ва чарогоҳҳо равона гардидааст. Бунёди Оқохон дар Тоҷикистон мегӯяд, ки “пас аз анҷоми лоиҳаи мазкур 4,000 гектар замин дар шаҳри Исфара ва 400 гектар заминҳои ноҳияи ҳаммарзи Қирғизистон бо об таъмин мегардад.

Ҳамчунин ба иттилои Бунёди Оқохон дар доираи лоиҳаи Маркази экофарҳангии шаҳри Хоруғ, сохтмони толори чандманзура дар назди бозори байнисарҳадии маҳаллаи Теми шаҳри Хоруғ дар назар аст, ки аз он ба сифати макони баргузории чорабиниҳои фарҳангию варзишӣ барои ҷавонони шаҳри Хоруғ, ноҳияи Шуғнони Тоҷикистон ва вулусволии Шуғнони вилояти Бадахшони Афғонистон истифода мешавад.

Дар марказ, инчунин баргузории давраҳои омӯзишӣ, конфронсҳо ва чорабиниҳои дигар имконпазир мебошад. Ҳадафи лоиҳа ҷалби ҷавонон ба чорабиниҳои фарҳангиву варзишӣ ва рушди муносибатҳои фарҳангӣ бо кишвари дуст ва ҳамзабони Афғонистон аст.

Мӯҳр

Хабарҳои монанд:

Носирчон

Дар оянда боз муносибат байни Киргизистону Точикистон хуб хохад шуд. Ин аз кушишхои мардуми точик шохиди медихад

Ҷавоб диҳед Иқтибос Шикоят

руфкат

Кош бо ин бахона ба Конибодоми биёбонмонанд хам об меомад.
Эй об кучои бехтар зи тиллой,
Сар дар кадамат монам гар хона биёй...

Ҷавоб диҳед Иқтибос Шикоят

Гариб

агар дарахт аз реша чарохат дошта бошад, давои реша кард на шоху барг. Барои Ворух ва Ок,сой хамфикр бояд кард. Агарчи шодоб кардани мардуми Чилгази низ холи аз фикри хирадмандона нест

Ҷавоб диҳед Иқтибос Шикоят

акбар

ин ОГОХОН имоми исмоилиён дар хама чо кори савоб мекунад,ибрат гиред муллохои точикистон,шумо факат дар бораи ришу сатр бахс мекунеду халос,

Ҷавоб диҳед Иқтибос Шикоят

Эзоҳ илова кунед