24 июл 2015 16:27Тоҷикистон / Ҷавонон ва варзиш

100 000 сомонӣ барои “буклет” ва 10 000 диск барои таблиғи маконҳои туристӣ

Давоми шаш моҳи соли 2015 аз ҳисоби сайёҳони хориҷӣ ба Тоҷикистон 73 миллиону 632 ҳазору 500 доллар ворид шудааст. Ин рақам дар қиёс ба ҳамин давраи соли 2014, 36632500 доллар бештар мебошад. Дар ин бора дар нишасти Кумитаи ҷавонон, варзиш ва сайёҳӣ хабар дода шуд.

Аҳтам Абдуллозода, раҳбари кумита дар нишасти хабарии ин ниҳод гуфт, тайи моҳҳои январ-июн 177 186 шаҳрванди хориҷӣ ба Тоҷикистон омадааст, ки 147 265 нафари онҳо сайёҳ будаанд. Ин дар ҳоле, ки ба иттилои ӯ, дар шаш моҳи аввали соли 2014, 74 000 турист аз Тоҷикистон дидан карда, аз ин ҳисоб ба буҷаи кишвар 37 миллион доллар ворид гардида буд.

Раиси кумита мегӯяд, дар соҳаи туризм лоиҳаи қарори Ҳукумати Тоҷикистон таҳия ва бо вазорату идораҳои дахлдор мувофиқа шудааст: “Инчунин бо роҳбарии сарвазири кишвар Шӯрои рушди саноати туризмро ташкил карда, ба ҳукумат пешниҳод кардаем, ки боварӣ дорем дастгирӣ меёбад”.

Аҳтам Абдуллозода мушкили кумитаашро дар бахши туризм набудани инфраструктура дар шоҳроҳҳо арзёбӣ карда гуфт, дар ин бахш низ лоиҳаҳо таҳия шудаанд: “Баробари тадбиқи лоиҳа дар шоҳроҳҳои кишвар хизматрасониҳои маишӣ ба роҳ монда мешаванд”.

Раиси Кумитаи ҷавонон, варзиш ва сайёҳии Тоҷикистон изҳор дошт, рӯзҳои наздик сомонаи нави кумита фаъол мешавад, ки дар он ҳудуди 25 мавзеи беҳтарин кишвар муаррифӣ шудаанд: “Имсол ният дорем ба маблағи 100 000 сомонӣ буклетҳоро барои таблиғи мавзеҳои туристӣ нашр кунем. Ҳамчунин барои таблиғи мавзеҳои туристӣ видеороликҳо бо забонҳои англисӣ, русӣ ва арабӣ таҳия мекунем, ки дар 10 000 диск паҳн карда мешаванд”.

Мӯҳр

Хабарҳои монанд: