27 июл 2015 16:38Тоҷикистон / Иҷтимоӣ

Даргузашти Аҳмадҷон Муҳаммадхоҷаев, узви вобастаи Академияи илмҳои Тоҷикистон

Субҳи имрӯз, 27 июл Аҳмадҷон Муҳаммадхоҷев, доктори илмҳои фалсафа, профессор ва узви вобастаи Академияи илмҳои Ҷумҳурии Тоҷикистон бар асари беморӣ даргузашт.

Маросими видоъ бо Аҳмадҷон Муҳаммадхоҷев дар назди манзилаш, воқеъ дар маҳаллаи 63-юми шаҳри Душанбе бо иштироки академик Фарҳод Раҳимӣ, президенти Академияи илмҳои Тоҷикистон ва дигар шахсиятҳои илмиву фикрии Тоҷикистон баргузор шуд.

Даргузашти Аҳмадҷон Муҳаммадхоҷаев талафоти ҷуброннопазир барои илм, хусусан илми фалсафаи тоҷик унвон шуд.

Аҳмадҷон Муҳаммадхоҷаев 10 феврали соли 1941 дар деҳаи Рохарви ноҳияи Ванҷи ВМКБ дар хонаводаи зиёӣ ба дунё омадааст. Мактаби миёнаро дар зодгоҳаш хатм намуда, факултаи шарқшиносии Донишгоҳи миллии Тоҷикистон ва аспирантураи Академия илмҳои Тоҷикистонро хатм намудааст. Соли 1971 рисолаи номзадии худро дар мавзӯи “Ҷаҳонбинии Фаридаддини Аттор” ҳимоя намуда, соли 1993 рисолаи докториро дар мавзӯи “Идеологияи Нақшбандия” дар Қазоқистон дифоъ кардааст.

Аҳмадҷон Муҳаммадхоҷаев аз соли 1969 то поёни умр дар Институти фалсафа, сиёсатшиносӣ ва ҳуқуқи АИ ҶТ ба сифати ходими хурди илмӣ, мудири шӯъбаи таърихи фалсафа, академик-котиби шӯъбаи улуми ҷамъиятӣ хидмат намуда, пажуҳишҳои арзишманд анҷом додааст.

Ӯ муаллифи бештар аз 250 мақола ва асарҳои гаронарзиши илмӣ, аз қабили “Ҷаҳонбинии Фариддадини Аттор”, “Назарияи маърифати тасаввуф”, “Идеологияи Нақшбандия”, “Хоҷа Аҳрор”, “Консепсияи диниву сиёсии Хоҷа Аҳрори Валӣ”, “Нақшбандия ва Хоҷа Аҳрор” буда, зери роҳнамоии илмияш 15 нафар рисолаҳои номзадиву докторӣ ҳимоя намудаанд.

Олим ҳамчунин бевосита дар таълифоти дастаҷамъӣ монанди “Осори фалсафии Носири Хисрав. Ҷилди 3”, “Ибни сино ва фарҳанги замони ӯ”, “Таърихи фалсафаи тоҷик. Аз замонҳои қадим то асри 15” ба таври назаррас саҳмгузорӣ кардааст.

Намози ҷанозаи Аҳмадҷон Муҳаммадхоҷаев дар масҷиди маҳаллаи 64-уми шаҳри Душанбе доир гардида, ҷанозаи ӯ дар қабристони Чимтеппаи канори Душанбе ба хок супорида шуд.

Мӯҳр

Хабарҳои монанд:

Суфизода

Худованд ин инсони поксиришту донишманди фархехтаро дар бихишти барин гарики рахмати Хеш гардонад!

Ҷавоб диҳед Иқтибос Шикоят

Лукмон

Бо камоли таассуф хабардор шудам устоди донишманд доктори улуми фалсафа, профессор Ахмадчон Мухаммадхочаев дори фониро видоъ гуфтанд. Ин мусибатро ба хонаводаи мўхтарам ва ахли илм таслият арз менамоям ва аз Худованди маннон хосторам, ки барои бозмондагонашон сабри чамил ва саломати ато бифармояд!

Ҷавоб диҳед Иқтибос Шикоят

Аличон

Худо рахматаш кунад. Доимо дар ёди дустон ва хешу табор боки монад.

Ҷавоб диҳед Иқтибос Шикоят

Эзоҳ илова кунед