Посухи Тошканд ба вазири тоҷик: Ҳеч гоҳ “Роғун”-ро дастгирӣ намекунем...
Вазорати умури хориҷии Узбакистон бо пахши як иттилоияи расмӣ иддаои Усмоналӣ Усмонзода, вазири энергетикаи Тоҷикистонро, ки гӯиё бо Тошканд дар мавриди бунёди нерӯгоҳи “Роғун” нофаҳмие надоранд, рад кардааст.
Дар изҳороти Вазорати умури хориҷии Узбакистон, ки 1-уми август дар сомонаи ин ниҳод нашр шудааст, таъкид гардидааст, ки Узбакистон хулосаи ташхиси байналмилалии нерӯгоҳи Роғунро қабул надорад, зеро он ба меъёрҳои байналмилалӣ ҷавобгӯй нест.
Ин ниҳод баромади Рустам Азимов, ноиби сарвазири Узбакистонро, зимни баррасии хулосаи ташхиси Бонки ҷаҳонӣ оид ба “Роғун”, ки 14-18-уми июли соли 2014 дар Алмато садо дод, зикр карда, таъкид намудааст, ки Тошканд ҳамоно ба мавқеяш устувор мебошад. Азимов дар ин баромадаш “Роғун”-ро барои кишварҳои поёноб зараровар, хатарнок ва ташхиси ҷаҳонии ин лоиҳаро номақбул хондааст. Ӯ инчунин аз он изҳори нигаронӣ кардааст, ки камбуди солонаи барқ дар Тоҷикистон ҳудуди 600 мегават мебошад, аммо иқтидори нерӯгоҳи Роғун 3600 мегаватро ташкил медиҳад.
Ин изҳороти Тошканд дар ҳолест, ки Усмоналӣ Усмонзода, вазири энергетика ва захираҳои оби Тоҷикистон, гуфт феълан дар мавриди нерӯгоҳи Роғун бо Узбакистон нофаҳмие надоранд ва марҳилаи аввали нерӯгоҳ тақрибан се сол баъд фаъол хоҳад шуд.
Усмонзода, , 22-юми июл дар посух ба суоли “Озодагон” изҳор дошт, ки барои фаъол кардани марҳилаи аввали нерӯгоҳ се сол лозим аст: “Дар марҳилаи аввал ду агрегати 400 мегаваттӣ, дар маҷмуъ бо иқтидори 800 мегават фаъол хоҳанд шуд”.
Вазири энергетика гуфт, баъди фаъол кардани марҳилаи аввали Роғун мушкили камбуди барқ дар кишвар ҳал хоҳад шуд: "Барқарорсозии ду нақб ва сохтмони нақби сеюм, ки бо пешниҳоди Бонки ҷаҳонӣ ба лоиҳа ворид шудаанд, пеш рафта истодааст. Аз тамоми дунё ширкатҳо хоҳиши иштирок дар ин лоиҳа, аз ҷумла сохтмони сарбанд ва қисмати энергетикиро доранд".
Вазири энергетика тасдиқ намуд, ки дар кишвар тамоми таҷҳизот барои фаъол кардани марҳилаи аввали нерӯгоҳ вуҷуд дорад: “Дар ҳақиқат дастгоҳҳои барқӣ қисман дар замони Шӯравӣ ва қисман дар якчанд соли охир аз ҷумҳурии Украина ва дигар кишварҳо ба Тоҷикистон ворид шудаанд. Ду комплект, дастгоҳҳои барқӣ, генераторҳо ва дигар лавозимотро пурра омода кардаем”.
Ӯ хулосаи мусбати ташхиси Бонки Ҷаҳонӣ дар мавриди Роғунро таъкид намуда, афзуд, ки феълан бо Узбакистон нофаҳмие надоранд: "Вазифаи ҳукумати Тоҷикистон аст, ки барои таъмини мардуми кишвар бо барқ талош кунад".
Усмонзода инчунин аз ташкили гуруҳи байниҳукуматии Тоҷикистону Узбакистон истиқбол карда, аз ҷумла изҳор дошт: “Мо хушнуд астем, ки баъди чандин сол миёни Тоҷикистону Узбекистон комиссияи байниҳукуматӣ ташкил шуд. Дар доираи ин комиссия бисёр масъалаҳо бардошта шуд. Масъалаҳо вобаста ба энергетика ва газ аз ҷониби Тоҷикистон пешниҳод карда шуданд, вале ҷониби Узбакистон хоҳиш карданд, ки дар навбати аввал он масъалаҳое, ки имкони ҳалли онҳо бештар аст, дида шаванд. Масъалаҳое, ки баъзан мушкилиҳо доранд дар навбати дуюм онҳо омода астанд, ки ҳамкориро идома диҳанд”.
Зимни сафари ахири Эмомалӣ Раҳмон, раисиҷумҳури Тоҷикистон ба майдони сохтмони Роғун ваъда дода шуд, ки марҳилаи аввали он саривақт ба истифода дода мешавад ва барои фаъолсозии марҳилаи аввал тамоми техникаю таҷҳизот фароҳам шудааст.
Мӯҳр
ТАҚВИМ
« Май 2024 » |
---|
Душ | Сеш | Чор | Пан | Ҷум | Шан | Якш |
---|
| 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | |