03 авг 2015 16:20Тоҷикистон / Иҷтимоӣ / Тема дня

Хомисаи бемор барои худ ва бародари 17-солааш кумак мехоҳад

Хомисаи Аюбзод, як сокини 22-солаи ноҳияи Айнӣ барои худ ва бародараш Акмалҷон Аюбов, ки аз бемории ирсии норасоии хромосоммаҳо (атаксия фридрейха) ранҷ мебаранд, кумак мехоҳад.

Хомиса дар як номаи имодхоҳӣ унвонии “Озодагон” навиштааст, дар оила панҷ фарзанданд ва ӯву бародари ягонааш гирифтори ин беморианд. “Дар беморхонаҳои ватанӣ табобат гирифтам, хеч фоидае накард. Соли 2001 падарам ба шаҳри Екатеринбурги Русия бурд ва онҷо зимни ташхис дардамро муайян карда, гуфтанд, гирифтори бемории ирсии норасоии хромосоммаҳо (атаксия фридрейха) мебошам”,-менависад ӯ. Ба қавли Хомиса, аз сабаби он ки ташхисҳояш пуррагӣ анҷом наёфта буд, мебоист дубора Русия мерафт, аммо бо далели ба ин беморӣ мубтало шудани бародари 17-солааш, имкони табобатро надорад: “Имрӯз бародарам низ дарди маро дорад, пойҳояш қариб, ки аз роҳ рафтан боз мондаанд. Ҳама талошҳоямон барои табобати ӯ сарф мешавад. Оилае, ки ду бемор дорад, ҳам хурондан ва ҳам табобат кардан хеле душвор аст”.

Хомисаи Аюбзод мегӯяд, падараш дар муҳоҷират буда, модараш дар деҳаашон ҳамчун табиб кор мекунад. Ҳақмузди онҳо барои табобат ва хурондани фарзандон кофӣ нест. “Барои он ки дардро камтар эҳсос кунам ва худро аз ин ғуссаҳо дур андозам, хамеша китоб мехондам ва аввалин духтаре будам, ки аз деҳаамон соли 2011 ба Донишгоҳи омӯзгории Тоҷикистон ба номи С. Айнӣ дар бахши иқтисод шомил шудам. Имсол ба курси панҷум мегузарам”,-навиштааст ӯ. Хомиса мегӯяд, бо далели беморӣ, донишгоҳро соли аввал ба пуррагӣ хонда, се соли дигар дар шӯъбаи ғоибона таҳсил намуд: “Барои сиҳат шудан ҳар коре мекунам, то бо афсус ба қафо нигоҳ накунам. Бо вуҷуди ин ҳама дунё бароям танҳо ҳавлиямон шудааст”.

Дар идома дар бораи бемории бародараш Акмалҷони 17-сола гуфтааст: “Тули 10 соли бемориам бисёр ғамҳоро чашидам, вале сахтарашро акнун таҷриба мекунам. Ҳар боре, ки дар пеши чашмонам додари ягонаам меафтад ё ба чизе бармехурад, мемираму аз нав зинда мешавам. Ман аз дарди бародарам месӯзам, волидонам бошанд аз дарди ду фарзанд. Аз даргоҳи Худованд барояшон нерӯ мехоҳам”.

Гулчеҳра Юнусова, бибии Хомиса, ки номаи набераашро ба дафтари “Озодагон” овард, мегӯяд, Вазорати тандурустӣ чанд бор ба онҳо кумак кардааст, аммо ба номаҳояшон дар дастгоҳи иҷроияи президент ҷавоби муайян нагирифтаанд.

Хомиса аз мақомоти Тоҷикистон ва тамоми афроди хайрхоҳу саховатманд барои муолиҷаи худ ва бародараш кумак хостааст.

Телефон барои тамос: (+992) 92-600-52-13 ва 92 760 66 89