03 сен 2015 11:19Тоҷикистон / Сиёсат / Тема дня

Ширкати Э.Раҳмон дар гузашти низомӣ ба муносибати 70-солагии анҷоми ҶДҶ (ВИДЕО)

Эмомалӣ Раҳмон, раисиҷумҳури Тоҷикистон субҳи рӯзи 3 сентябр дар гузашти низомӣ ба муносибати 70 - солагии анҷоми Ҷанги дуюми ҷаҳонӣ, ки дар маркази шаҳри Пекин доир гардид, ширкат намуд.

Тибқи иттилои дафтари матбуоти раисиҷумҳури кишвар, дар макони асосии баргузории чорабинии идона - майдони Тянанмэн президенти Тоҷикистон Эмомалӣ Раҳмон ва сарони дигар кишварҳоро Си Ҷинпин, раисиҷумҳури Чин истиқбол гирифтааст. Манбаъ мегӯяд, дар ин чорабинӣ сарони беш аз 25 давлат ва роҳбарону намояндагони воломақом аз созмонҳои бонуфузи минтақавию байналмилалӣ иштирок доштаанд.

Ба иттилои манбаъ, Си Ҷинпин Эмомалӣ Раҳмон ва сарони дигар давлатҳоро барои тамошои паради ҳарбӣ ба минбари ҳукуматӣ дар майдони Тянанмэн даъват намуда, ҳозирин ва тамоми мардуми Чинро бо анҷоми Ҷанги дуюми ҷаҳонӣ табрик намудааст .

Дафтари матбуоти раисиҷумҳур мегӯяд, дар гузашти низомӣ ҷузъу томҳои 7 округи ҳарбӣ, флоти ҳарбии баҳрӣ, неруҳои ҳарбӣ - ҳавоӣ, политсияи мардумӣ ва аввалин маротиба собиқадорони артиши дуюми хушкигард, ки дар ҷанг иштирок кардаанд, ширкат варзидаанд. Тибқи иттилои манбаъ, дар паради ҳарбӣ нахустин маротиба ҷузъу томҳои ҳарбии Тоҷикистон, Русия, Муғулистон, Қазоқистон ва Қирғизистон иштирок карданд.

Ба иттилои дафтраи матбуоти раисиҷумҳур, Тоҷикистонро дар ин чорабинии тантанавӣ як ҷузъи полки комендантии Вазорати мудофиа таҳти роҳбарии полковник Илҳом Махсумов намояндагӣ кардааст: “Таърих гувоҳ аст, ки барои ба даст овардани ғалаба дар ҷанги дуюми ҷаҳонӣ ҷавонмардони тоҷик ҳам корнамоиҳои зиёд нишон додаанд. Бинобар ин бо нишони ҳамдилӣ низомиёни тоҷик дар қатори намояндагони Чин ва дигар кишварҳо дар паради ҳарбӣ фаъолона иштирок карданд”.

Намоиши чархбол ва тайёраҳо дар гузашти низомӣ