Донишкадаи исломӣ ба “Ҳоҷӣ Ҳалим”: Ҷангидан бо мусалмон куфр аст...
Ҳайате аз устодону кормандон ва донишҷӯёни Донишкадаи исломии Тоҷикистон ба номи Имоми Аъзам бо овардани ояҳои Қуръону ҳадисҳо амали Абдуҳалим Назарзода, собиқ муовини вазири мудофиаро маҳкум карда, онро “зиддимардумӣ” хондаанд. Мақомот Назарзодаро дар ташкили дастаи террористӣ муттаҳам мекунанд.
Дар вокуниши Донишкадаи исломӣ гуфта мешавад, “ин ҳодисаи бисёр нангину фоҷиабори гуруҳи ҷиноятпешаи Абдуҳалим Назарзода дар рӯзҳое рух дод, ки мардуми шарифи Тоҷикистон ба таҷлили 24-умин солгарди Истиқлолияти давлатӣ - ҷашни аз ҳама муҳим ва азизтарини кишвар омодагӣ дошт. Фардеву гӯруҳе ба ҷуз аз ин тӯдаи ҷинояткорон дар сар хаёле аз нотинҷиву ноамн сохтани вазъи мамлакатро надошт, мардум аз пайи кору фаолияти ҳамешагӣ, мактабиён рӯ ба муассисаҳои таҳсилотӣ, донишҷӯён ба донишгоҳҳои хеш ва намозгузорон ба масоҷид мерафтанд”.
Дар он гуфта мешавад, “зиндагии мардум ҳамон тавре, ки 18-20 сол қабл сулҳу суббот ва амну осудагиро орзӯ мекарданд ва тӯли ин солҳо ба зиндагии шарафмандонаи осоишта ва шоиставу бунёдкорона одат карда буданд, ҷараён дошт ва дар тасаввури касе ҳам намегунҷид, ки чунин як амали зиддимардумӣ аз ҷониби шахсияте сар мезанад, ки давлату ҳукумат иҷрои яке аз вазифаҳои масъулиятнок - муовини вазири мудофиаро ба ӯ бовар карда, бар зиммааш вогузоштааст”.
Дар идома аз чанд ояи Қуръон ва ҳадис мисол зада мешавад, ки дар он қатлу куштор ва хиёнат бар мусалмонҳо маҳкум мешавад. Аз ҷумла аз ин ҳадиси паёмбар (с), ки “Дашном додани мусулмон фисқ ва ҷангидан бо ӯ куфр аст” (ривояти Имом Бухорӣ ва Муслим).
Абдуҳалим Назарзода, маъруф ба "Ҳоҷӣ Ҳалим", ки то баъди зуҳри 4 сентябр муовини вазири мудофиаи Тоҷикистон буд, бо иттиҳоми "хиёнат ба Ватан" ва "ташкили дастаи террористӣ" муттаҳам мешавад. Ба иттилои мақомот ҳамлаи субҳи 4 сентбяр ба Шӯъбаи корҳои дохилии Ваҳдат ва Дастгоҳи марказии Вазорати мудофиа дар Душанбе бо раҳбарии ӯ анҷом шудааст. Вазорати корҳои дохилӣ мегӯяд, "Ҳоҷӣ Ҳалим" ва ҷонибдоронаш дар дараи Ромит паноҳ бурдаанд ва амалиёти зидди онҳо идома дорад.
Мӯҳр
ТАҚВИМ
« Май 2024 » |
---|
Душ | Сеш | Чор | Пан | Ҷум | Шан | Якш |
---|
| 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | |