Эмомалӣ Раҳмон дар бораи шаффофияти сохтмони неругоҳҳои бузург
Эмомалӣ Раҳмон, раисиҷумҳури Тоҷикистон мегӯяд, сохтмони нерӯгоҳҳои бузург, ки хусусияти минтақавӣ доранд, ба таври шаффоф амалӣ хоҳанд шуд. Ин нуктаро ӯ аснои суханронӣ дар Форуми сатҳи баланди кишварҳои рӯ ба инкишофи маҳсур дар хушкӣ, ки дар Ню-Йорки Амрико баргузор шуд, иброз дошт.
Тибқи иттилои дафтари матбуоти раисиҷумҳури кишвар, Эмомалӣ Раҳмон илова карда, ки раванди сохтмони нерӯгоҳҳои барқи обии хурд ва миёна, бунёди нерӯгоҳҳои калон дар асоси лоиҳаҳои дорои хусусияти минтақавӣ густариш ёфта, имконоти истифодаи энергияи офтобу бод низ мавриди татбиқ қарор гирифтаанд.
Эмомалӣ Раҳмон гуфтааст, бунёди нерӯгоҳҳо ва хатҳои интиқоли барқ ҷиҳати таъмини рушди устувор ва боло бурдани сатҳи зиндагии на фақат мардуми Тоҷикистон, балки тамоми минтақа мусоидат менамояд: “Дар ин росто, сохтмони пули энергетикӣ байни Осиёи Марказӣ ва Осиёи Ҷанубӣ (КАСА-1000), ки ба афзоиши содироти нерӯи барқ аз Тоҷикистон ва Қирғизистон ба бозорҳои ниёзманди энергетикии Афғонистон ва Покистон мусоидат менамояд, мақоми махсус касб мекунад. Шубҳае нест, ки татбиқи ин лоиҳа чун муҳаррики рушди тиҷорат хизмат карда, тавлиди маҳсулоти саноатӣ ва таъмини амнияти энергетикиро дар ҳар ду минтақа иҷро хоҳад кард”.
Ба иттилои манбаъ, раисиҷумҳури кишвар дар ин ҳамоиш ёдовар шудааст, ки ҳамаи ин лоиҳаҳо, бо дарназардошти ҷанбаҳои иқтисодӣ, иҷтимоӣ ва экологии рушди устувори энергияи муосир ба таври шаффоф амалӣ мегарданд. Раисиҷумҳури Тоҷикистон қайд намудааст, мавҷуд набудани имконоти дастрасии ҳудудӣ ба баҳр барои кишварҳои рӯ ба инкишофи маҳсур дар хушкӣ ҷиҳати рушди устувор душвориҳои доимӣ эҷод менамояд ва он дар роҳи ҳамгироии минбаъдаи кишварҳои мо бо иқтисоди ҷаҳонӣ монеаи асосӣ мегардад.
Эмомалӣ Раҳмон гуфта, Тоҷикистон як қатор чорабиниҳои байналмилалву минтақавӣ, аз ҷумла мулоқоти даҳуми Комиссияи Байниҳукуматии Долони Нақлиётии Байналмилалии Аврупо-Кавказ-Осиё (TРАСЕКА), конфронси Байналмилалии сатҳи олӣ оид ба рушди иқтидори транзитии Осиёи Марказӣ барои давраи то соли 2023, форуми якуми сармоягузорӣ доир ба татбиқи Нақшаи Амали Созмони Ҳамкории Исломӣ оид ба ҳамкорӣ бо кишварҳои Осиёи Марказиро мизбонӣ кардааст, ки чунин чорабиниҳо ба бунёди муҳити мусоид барои транзит, беҳтар намудани амнияти нақлиёт, ҳифзи муҳити зист, татбиқи сиёсати тарифии тағйирёбанда ва пешбурди тиҷорат нигаронида шуда буданд. Ба қавли президнти кишвар, гуфтушуниди намояндагони Тоҷикистон, Афғонистон ва Покистон доир ба Созишномаи сеҷонибаи тиҷорати транзитӣ ба марҳалаи ниҳоӣ наздик мегардад.
Ба гуфтаи раисиҷумҳур, бо вуҷуди пешравии назаррас кишварҳои рӯ ба инкишофи маҳсур дар хушкӣ бо мушкилоти гуногунҷанбае рӯ ба рӯ мешаванд, ки ба рушди дарозмуддати онҳо халал ворид менамоянд: “Камбизоатӣ ва нобаробарӣ, иқтидорҳои ғайримутаносиби саноатӣ, инфрасохтори заиф, ҳиссаи зиёди ашёи хом дар содирот, таъмини нокифояи аҳолӣ бо қувваи барқ ва бо кор пурра таъмин набудани ҷавонон ҳамчун мушкилоти калидии кишварҳои рӯ ба инкишофи маҳсур дар хушкӣ боқӣ мемонанд. Ғайр аз ин, рушди устувори ин кишварҳоро оқибатҳои тағйироти иқлим ва офатҳои табиӣ, аз ҷумла биёбоншавӣ ва таназзули замин, инчунин обшавии пиряхҳо заиф мегардонанд. Барои мисол, ҳар сол дар Тоҷикистон офатҳои табиии вобаста ба об сабаби хисороти азими иқтисодӣ ва иҷтимоӣ мегарданд. Ҳар як душворӣ бо имконоти наве ҳамроҳ аст. Мушкилоти кунунии мо кишварро маҷбур сохтааст, ки тавассути василаҳои алтернативӣ неруву тавони худро ба самтҳои стратегӣ - таъмини амнияти энергетикиву озуқаворӣ ва раҳоӣ аз бунбасти коммуникатсионӣ - равона созад”.
Манбаъ мегӯяд, Эмомалӣ Раҳмон таъкид намудааст, бо дарназардошти мушкилоти зикршуда кишварҳои рӯ ба инкишофи маҳсур дар хушкӣ барои муваффақона амалӣ намудани барномаи нави рушди устувор ҳанӯз ҳам ба пуштибонии қавии байналмилалӣ ниёз доранд ва итминони комил доранд, ки Созмони Милал метавонад ва бояд нақши пешбаранда ва ҳамоҳангсози хешро дар амри расонидани кумакҳои техникиву молиявӣ ба кишварҳои рӯ ба инкишофи маҳсур дар хушкӣ идома диҳад.
Мӯҳр
ТАҚВИМ
« Май 2024 » |
---|
Душ | Сеш | Чор | Пан | Ҷум | Шан | Якш |
---|
| 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | |