12 ноя 2015 13:51Тоҷикистон / Иҷтимоӣ / Дидгоҳи хос

Ҷалилов: Орзу дорам, ҷои тарси мардум аз милисаро эътимод гирад

Дар пасманзари Иди касбии милисаи тоҷик, ки 10-уми ноябр таҷлил гардид, “Озодагон” аз намояндагони касбу кори гуногун дар кишвар суол кард, ки ба милисаи Тоҷикистон чӣ таманниёт доред?

Холиқназар Ҷумаев, сухангӯи ширкати “Вавилон-М”

Милитсия ҳамеша чун кафили таъмини амнияти шаҳрвандон ва сулҳу субот дар ҷомеа баромад мекунад. Ин аст, ки ҳамаи кормандони Вазорати корҳои дихилиро дар ин рӯзи касбиашон табрик ва таҳният гуфта, барояшон муваффақият ва комёбиҳо таманно дорам. Ман фикр мекунам, ки милитсияи точик воқеан аз ӯҳдаи масъулиятҳои ба зимааш гузошташуда баромада истодааст ва осудагии рӯзгори имрӯзи мо маҳз натиҷаи хизматҳои шоёни эшон аст.

Зарина Кенҷаева, равоншинос

Ман ба милитсияи тоҷик руҳу равони солим, асаби ором, шаффофият, ҳақиқатпарастӣ ва дар сатҳи олӣ риояи қонунро орзу намуда, мехоҳам дар оянда милитсияи тоҷик дар арсаи ҷаҳонӣ боз ҳам обрўву нуфузи баланде дошта бошад.

Дилафруз Қурбонӣ, рӯзноманигор ва нависанда

Милитсияи тоҷик рисолати худро хеле хуб адо карда истодааст. Шаб ором хуфтан, субҳгоҳӣ дар фазои пурнишоти Ватан аз пайи ташвишҳои рӯзгор шудан ҳама самараи заҳмати ин родмардони миллат аст, ки инкор наметавон кард. Албатта, гул бехор намешавад ва яқинан дар байни кормандони милитсияи мо ҳастанд нафароне, ки бо номи пуршарафи ҳимоятгари осоиши мардум иснод меоранд ва боиси нооромиву норозигии шаҳрвандон мегарданд. Аммо ин баҳона намешавад, ки меҳнатҳои фидокоронаи муҳофизони тартиботи ҷамъиятиро нодида бигирем. Аз ин рў, ман ба милитсияи барўманду родмардамон, кафили ҳаёти осоиштаи имрӯзаамон тани сиҳату хотири ҷамъ, барору комёбӣ, меҳнати содиқона ба халқу Ватан, фатҳи қуллаҳои осмонбуси фаъолият ва рутбаҳои боз ҳам баландтарро орзу дорам.

Субҳон Ҷалилов, директори барномаҳои радиои “Ватан”

Орзу дорам, ки эҳсоси тарсе ки имрӯз аксаран аз милитсия ва ин мақом мардуми оддӣ дар дилу андешааш дорад, аз миён бираваду ҷойи онро боварии комил ба ин мақом бигирад. Бовар мекунам, ки ҳар қадар мардум ба ин мақом эътимод дошта бошад, ҳамон қадар сатҳи касбиву сифати кор дар ин мақом баландтар мешавад ва ҳатто сафи ҷинояткорӣ коҳиш меёбад.

Марям Давлатова, ҷомеашинос

Дар ҳама гуна мақомот одамони хубу поквиҷдон ва устодони кори худ буданду ҳастанд. Ба хотири ин гуна одамони шариф, ки дар ҳифзи оромиву осудагии мардум ҳамеша дар хизматанд, рӯзи милитсияи тоҷикро барои мардуми кишвар шодбош мегуям.

Макнуна Ниёзова, тарроҳ

Тамоми кормандони милитсияро ба муносибати Иди касбияшон табрику муборакбод намуда, барояшон беҳтарин хушиҳои зиндагиро орзу мекунам. Таманнои онро дорам, ки доимо сарбаланду хонаобод ва комёб бошанд.

Иззат Шарифӣ, сароянда

Назму тартиб ҳар куҷоест пойдор,
Зиндагию кор мегирад барор.
Кормандони милитсияи тоҷик ҳамеша тансиҳату муваффақ бошанд.

Мӯҳр

Хабарҳои монанд: