12 ноя 2015 17:08Тоҷикистон / Дин ва зиндагӣ / Тема дня

Сокини Душанбе, ки дар Русия ба ДИИШ пайваст дар Афғонистон боздошт шудаст

Неруҳои амнияти миллии Афғонистон зимни як амалиёти вижа Нусратуллоҳ Кенҷаев, як шаҳрванди Тоҷикистонро дар вилояти Тахор боздошт кардаанд.

Тибқи навори пахшкардаи мақомоти амнияти Афғонистон боздоштшуда, худро Нусратуллоҳ фарзанди Шариф, сокини шаҳри Душанбе муаррифӣ кардаст.

Ӯ мегӯяд, аз тариқи кишвари Эрон ба ҳадафи омӯзишҳои низомӣ ва пайвастан ба гуруҳи “Давлати исломӣ” вориди хоки Афғонисон шудааст. Ӯ тасмим доштааст, ки бо вуруд ба вулусволии Дашти Арчии Қундуз аз тариқи вулусволии Хоҷаи Ғори Тахор дар фаъолиятҳои ҳаросафканӣ иштирок кунад.

Тибқи навори нашркардаи мақомоти Афғонистон шаҳрванди Тоҷикистон эътироф кардааст, ки муддати 1 солу ду моҳ дар кишвари Русия кор карда ва ҳудуди як моҳ аз тариқи интернет бо Муҳовия, раҳбари гуруҳи ДИИШ дар Афғонистон иртибот доштааст.

Нусратуллоҳ гуфтааст, ки раҳбари ДИИШ ӯро ба ҷиҳод даъват карда ӯ розӣ шудааст, аммо барояш то ба Афғонисон расидан пул лозим шудааст.

Афроди гуруҳи ДИИШ 20 ҳазор рубли русиро ба ҳисоби бонкии Нусратуллоҳ фиристодаанд ва ӯ низ аз тариқи Озарбойҷон вориди кишвари Эрон шудаст. Нусратуллоҳ гуфтааст, ки пас аз муддате иқомат дар Эрон бо ҳавопаймо вориди Афғонистон шуда ва афроди ДИИШ барояш ду шумораи телефон додаанд, то ба хотири пайвастан ба ин гуруҳ бо онҳо тамос гирад. Ин шаҳрванди Тоҷикистон аввал ба Қундуз рафта, вале ӯро дубора ба Тахор фиристодаанд то ба Дашти Арҷӣ биравад, аммо неруҳои амнияти миллии Афғонистон ӯро боздошт кардаанд.

Нусратуллоҳ Кенҷаев мегӯяд, Муҳовия, ки ӯро ба ДИИШ ҷалб кардааст, тоҷик аст, вале намедонад, аз куҷои Тоҷикистон.

Ин боздошт дар ҳолест, ки тибқи иттилои расмӣ аз Тоҷикистон беш 500 шаҳрванд ба ДИИШ пайвастаанд, ки бисёрашон аз Русия ба ин ҳаракати террористӣ ҷалб шудаанд.

Мӯҳр

Хабарҳои монанд: