24 ноя 2015 11:04Оcиёи Марказӣ / Тоҷикистон

АКС: Тағйироти кадрӣ дар Вазорати мудофиа ва ишора ба хиёнати Ҳоҷӣ Ҳалиму шариконаш

Эмомалӣ Раҳмон, раисиҷумҳури Тоҷикистон дар пайи баррасии омилҳои ошӯби Ҳоҷӣ Ҳалим, имрӯз, 24 ноябр дар Вазорати мудофиа ва дигар сохторҳои қудратӣ як қатор тағйироти кадриро амалӣ кард.

Тибқи иттилоияи расмӣ Эмомалӣ Раҳмон муовини якум ва муовинони вазири мудофиа, сардори раёсати иктишофи (разведкаи) ҳарбии Ситоди генералии Қувваҳои Мусаллаҳи Ҷумҳурии Тоҷикистонро аз мақомашон барканор кард.

Манбаъ мегӯяд, Собирзода Эмомалӣ Абдураҳим, ки то ин вақт фармондеҳи Қӯшунҳои хушкигарди Қувваҳои Мусаллаҳ буд, муовини якуми вазири мудофиа-сардори Ситоди генералии Қувваҳои Мусаллаҳ таъин гардид: “ Ғуломзода Абдулҳошим, Латифзода Асрор Қурбон ва Холзода Солеҳ Ҳусайн муовинони вазири мудофиа таъин карда шуданд”.

Инчунин бо фармони Эмомалӣ Раҳмон Саидзода Бобоҷони Абдуқодир фармондеҳи Қӯшунҳои хушкигарди Қувваҳои Мусаллаҳ таъин шуд: “Дар мувофиқа бо раисиҷумҳур Шарипов Ҷалолиддин Маҳсиддинович сардори раёсати иктишофи (разведкаи) ҳарбии Ситоди генералии Қувваҳои Мусаллаҳи Ҷумҳурии Тоҷикистон таъин гардид”.

Эмомалӣ Раҳмон зимни қабули кадрҳои навтаъин аз вазъи ноустувору зуд-зуд тағйиёбанда ва пешгӯинашавандаи минтақа ва ҷаҳон, ба низоъҳои таҳмилӣ гирифтор шудани як гурӯҳ кишварҳои мустақил ва хусусан аз хиёнати нанговару нобахшидании як зумра собиқ низомиёни тоҷик ёдовар шуда, роҳбарият ва кулли кормандони сохторҳои қудратӣ ва мақомоти ҳифзи ҳуқуқу тартиботро ба хизмати содиқонаю софдилона, поквиҷдонӣ ва матонату ҷасорат дар иҷрои вазифаҳои хизматӣ даъват кардааст.

Дар баробари ин Эмомалӣ Раҳмон қарорҳои ҳукуматро дар бораи таъини Мирзоев Бадриддин Қиёмиддинович ба мақоми муовини сардори Сарраёсати Қӯшунҳои сарҳадии Кумитаи давлатии амнияти миллӣ оид ба корҳои тарбиявӣ ва Носиров Одилбек Раҳмонович ба мансаби муовини сардори сарраёсати Қӯшунҳои сарҳадии Кумитаи давлатии амнияти миллӣ оид ба аслиҳа ва техникаи ҳарбӣ имзо кард.

Дар сохтори Вазорати умури дохилии Тоҷикистон сардорони шуъбаҳои Вазорати корҳои дохилӣ дар ноҳияи Рӯдакӣ, шаҳри Кӯлоб, ноҳияи Восеъ, ноҳияи Рӯшон ва ноҳияи Исмоили Сомонии шаҳри Душанбе иваз карда шуданд.