08 дек 2015 10:29Тоҷикистон / Иқтисодӣ / Тема дня

Тавсияи Бонки миллӣ барои аз кор озод кардани саррофоне, ки “камбудиҳои ҷиддӣ” доранд

Бонки миллии Тоҷикистон мегӯяд, дар пайи санҷишҳои муштарак бо Оҷонсии зидди коррупсия “камбудиҳои ҷиддии 12 нуқтаҳои мубодилаи асъор”-ро ошкор кардааст.

Аз дафтари матбуоти ин ниҳоди молӣ иттилоъ доданд, ин санҷишҳо, ки рӯзҳои 3 ва 4 декабр гузаронида шуд, маълум кард, кормандони бархе саррофиҳо бо фармоиши саридораи ташкилотҳои қарзӣ аллакай фаъолияти худро боздоштаанд: “Бо вуҷуди он ки дар ин рӯзҳо шумораи ҳолатҳои бешомаду камомади маблағҳои пулӣ дар нуқтаҳои мубодилаи асъор кам гардида бошад ҳам, камбудиҳо дар фаъолияти нуқтаҳои мубодилаи асъори “Ориёнбонк”, “Тоҷиксодиротбонк”, “БСТ ТИСТ Тоҷпромбонк”, “Агроинвестбонк”, “Соҳибкорбонк” ва ТАҚХ “Васлат” аз қабили мавҷуд набудани дафтари сабти хариду фурӯши асъор, худсарона муайян намудани қурби хариду фурӯши асъор, набудани китоби бақайдгирии санҷишҳои саридораи бонк, ҷой доштани фарқ байни қурбнома ва фармоиши саридора ба қайд гирифта шуданд”.

Манбаъ мегӯяд, корманди нуқтаи мубодилаи асъори “Тоҷиксодиротбонк”, воқеъ дар даромадгоҳи бозори “Варзоб” Абдуллоев Ф., дар ҳолати доштани асъори хориҷӣ ба хотири ҳаннотӣ аз фурӯши асъор бо қурби муқарраршуда ва қонеъ кардани талаботи мизоҷон худдорӣ мекардааст: “Дар робита ба ҳолатҳои ошкоршуда аз ҷониби Бонки миллии Тоҷикистон нисбати “Ориёнбонк”, “Тоҷиксодиротбонк”, “БСТ ТИСТ Тоҷпромбонк”, “Соҳибкорбонк”, “Агроинвестбонк” ва ТАҚХ “Васлат” чораҳои ислоҳӣ ва таъсиррасонӣ андешида шуда, ба ин ташкилотҳои қарзӣ тавсия дода шуд, ки кормандони он нуқтаҳои мубодилаи асъор, ки ба камбудиҳои ҷиддӣ ҷой додаанд, аз кор озод намоянд”.

Мӯҳр

Хабарҳои монанд: