Мақомот: Президент ними ҷазои журналист Гулмуродзодаро бахшид
Мақомоти умури дохилии Тоҷикистон мегӯянд, Президент Эмомалӣ Раҳмон ҷазои журналисти маҳкумшуда ба 2 соли зиндонро қисман бахшидаст.
Дар иттилоияе, ки 2 феврал аз ҷониби мақомоти умури дохилӣ унвонии Аюбов Ҳ. Н. адвокати коллегияи адвокатҳои Тоҷикистон «СИПАР» ирсол шудаст, аз ҷумла омадааст: “Ба дархости Шумо оид ба бахшиши ҷазои Гулмуродзода Аминҷон, соли таваллудаш 1983, чунин посух медиҳем. Ӯ бо ҳукми суди ноҳияи Исмоили Сомонӣ 18 августи соли 2015 ба 2 соли зиндон маҳкум шудаст. Бо фармони Президенти Тоҷикистон Эмомалӣ Раҳмон бахшида шуда, як соли муҳлати боқимондаи ҷазои Гулмуродзода Аминҷон Пайванд кам карда шудаст”.
Рӯзи 18 август Додгоҳи ноҳияи Исмоили Сомонии шаҳри Душанбе Аминҷон Гулмуродзода, журналисти тоҷик ва сармуҳаррири сайти русии www.faraj.com.tj-ро ду сол аз озодӣ маҳрум кард. Исозода Хуршед Искандар, додраси мурофиа Гулмуродзодаро дар асоси модаи 340, қисми 2 банди "а"-и Кодекси ҷиноии Тоҷикистон - тақаллуби ҳуҷҷат муҷрим шинохта, ӯро барои ду сол равонаи зиндони низомаш умумӣ кард. Гулмуродзода баъд аз эълони ҳукм дар толори додгоҳ ба ҳабс гирифта шуд.
Аминҷон Гулмуродзода дар он муттаҳам мешавад, ки гӯё соли 1989, вақте ҳанӯз кӯдак буд, бо кумаки падараш, собиқ декани факултаи журналистикаи ДМТ, марҳум -- Гулмуродзода Пайванди Гулмурод аз бахши САҲШ-и ноҳияи Ленин (ҳозира Рӯдакӣ)-и ҶСС Тоҷикистон шаҳодатномаи таваллуд дастрас кардааст, ки ба гуфтаи мақомоти тафтишот қалбакӣ мебошад. Ба иддаои мақомоти тафтишотӣ Аминҷон бо истифода аз ин шаҳодатнома аз мақомоти корҳои дохилии ноҳияи Рӯдакӣ соли 1998 соҳиби шиноснома шуда, онро дар чанд ҳолат ҳангоми ба кор қабул шудан истифода намудааст.
Мӯҳр
ТАҚВИМ
« Апрел 2024 » |
---|
Душ | Сеш | Чор | Пан | Ҷум | Шан | Якш |
---|
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | |