25 фев 2016 08:37Тоҷикистон / Сиёсат / Дидгоҳи хос / Тема дня

Шоҳидии писари “Эмом хубак”: “Зафар бедняк”-ро барои 110 000 $ бо қайчӣ задам

Обид Мақсудов, писари Эмом Мақсудов маъруф ба “Эмом хубак”, ки бо иттиҳоми қатли Зафархон Азимов, мулаққаб ба “Зафар бедняк”, боздошт шуда, феълан дар беморхона бистарӣ мебошад, сабаби даст задан ба ин ҷиноятро эълон кард.

Тибқи гузориши Вазорати умури дохилии Тоҷикистон, Мақсудов сабаби муноқиша бо Азимовро маблағ гуфтааст: “Сабаб сум буд. 110 ҳазор доллари амрикоӣ аз ман қарздор астӣ гуфт ва наистод, ки маро гӯш кунад. Гапҳоямон пасту баланд рафт, боз дашном дод. Дигар ман контролро аз даст додам”.

Обид Мақсудов изҳор доштааст, ки ба “Зафар бедняк” бо қайчӣ ҳамла кардааст.

Вазорати умури дохилӣ дар гузориши нави худ, бархилофи хабари қаблиаш, ки гӯиё Обид Мақсудовро падараш - Эмом Мақсудов, соҳибкори тоҷик як рӯзи баъд аз қатли “Зафар бедняк” ба мақомот таслим намудааст, эълон кард, муттаҳамро худи кормандони милисаи шаҳри Душанбе боздошт кардаанд: “Баъди содир намудани ҷиноят Обид Мақсудов дар яке аз биноҳои шаҳри Душанбе паноҳ мебарад ва баъде, ки кормандони милиса макони ӯро дақиқ мекунанд, ӯ худро аз ошёнаи дуюм ба замин партофтааст. Дар натиҷа дасту пояш мешикананд”.

Манбаи “Озодагон” аз Вазорати умури дохилӣ қаблан хабар дода буд, ки дар баробари Обид Мақсудов дар марги Зафархон Азимов як нафари дигар низ муттаҳам мешавад, ки феълан мавриди кофтукоб қарор дорад. Бино ба иттилои Вазорати умури дохилии Тоҷикистон, Зафархон Азимов, сокини 38-солаи кӯчаи Шамсии шаҳри Душанбе, 18 феврали соли равон дар назди "Наврӯзгоҳ"-и Душанбе бо Обид Мақсудов, сокини 32-солаи кӯчаи Борбад муноқиша кардаанд: "Дар натиҷа Мақсудов бо олоти дар дасташ буда, ба қисмати дили Азимов зарба зада, ӯро маҷруҳ мекунад. Азимов баъди интиқол ба беморхонаи Маркази миллии шаҳри Душанбе ба ҳалокат мерасад".

Ба иттилои ВКД, Обид Мақсудов, соли таваллудаш 1984, сокини кӯчаи Борбад, пеш ду бор барои авбошӣ суд шудааст.

Обид Мақсудов писари Эмом Мақсудов, маъруф ба "Эмом хубак", раиси корхонаи кабелбарории Душанбе, муаррифӣ мешавад. Дар гузашта бародари Эмом -- Билол Мақсудов бо иттиҳоми муомилоти ғайриқонунии 57 кило маводи мухаддир ҳабс шуда буд.

Зафархон Азимов, ки рӯзи 19 феврал ҷасадаш ба зодгоҳаш ноҳияи Ҳамадонӣ интиқол ёфт, аз соҳибкорони муваффақи Душанбе арзёбӣ мешавад, ки ба тиҷорати мошину масолеҳи сохтмонӣ машғул будааст.

Мӯҳр

Хабарҳои монанд: