14 апр 2016 10:59Оcиёи Марказӣ / Тоҷикистон

Ифшои робитаи домоди Каримов бо “дуздон”-и пахтаи Тоҷикистон дар Латвия (ВИДЕО)

Расонаҳои Латвия дар пайи ифшои асноди нави фасодкории мақомоти Узбакистон аз робитаи Темур Тиллоев, домоди раисиҷумҳури Узбакистон бо муттаҳамон дар дуздии 80 вагон пахтаи Тоҷикистон бо арзиши 9 миллион евро дар Латвия хабар доданд.

Тавре сомонаи Kompromat.lv менависад, Темур Тиллоев, шавҳари Лола Каримова, духтари хурдии Ислом Каримов бо муттаҳамон дар дуздии пахтаи Тоҷикистон дар Латвия робита дорад.

Тибқи навиштаи ин расона соли 2006 дар Юрмола ҷамъияти дорои масъулияташ маҳдуди “Euro West Invest” ба қайд гирифта шуд, ки ба иттилои пойгоҳи “СrediWeb.lv” ба ширкати “WestTrade ImpEx Corp”, тааллуқ дорад: “Раҳбари раёсати “Euro West Invest” Темур Тиллоев, домоди Ислом Каримов мебошад”.

Тибқи навиштаи пойгоҳи “СrediWeb.lv” соли 2009 Хадамоти даромади давлатии Латвия шаҳодатномаи андозсупоранда аз даромади иловагии “Euro West Invest”-ро бозхонд кард: “Бо вуҷуди он, ки Euro West Invest тайи солҳои охир ҳисоботи молиявӣ намесупорад, фаъолияти он қатъ нашудааст”.

Манбаъ мегӯяд, суроғаи расмии Euro West Invest, ки таҳти роҳбарии Темур Тиллоев қарор дорад, дар бинои мутааллиқ ба соҳибкор Ғулом Муҳаммад Ғуломӣ, муттаҳами асосӣ дар дуздии пахтаи Тоҷикистон ҷойгир мебошад. Ба ҳайси аудитор дар “Euro West Invest” Лариса Карпенко ба қайд гирифта шудааст, ки ҳамроҳи Ғуломӣ дар сохтакории аснод ва азхудкунии маблағҳои зиёд муттаҳам мешавад.

Яке аз парвандаҳо алайҳи Муҳаммад Ғуломӣ дуздии 80 вагон пахтаи Тоҷикистон бо арзиши 9 миллион евро мебошад, ки мурофиаи он феълан дар додгоҳи Латвия пушти дарҳои баста давом дорад.

Қаблан расонаҳои Латвия хабар доданд, ки дар дуздии пахтаи Тоҷикистон, се нафар – соҳибкор Ғулом Муҳаммад Ғуломӣ, соли таваллудаш 1965, ҳамсараш Валентина Ғуломӣ, соли таваллудаш 1968 ва як зани дигари 43-сола муттаҳам мешаванд: “Онҳо бо пешниҳоди санадҳои тақаллубӣ дар мавриди тағйири соҳиби мол ин пахтаро аз анбори гумруки Латвия гирифта, аз худ намудаанд”.

Ғулом Муҳаммад Ғуломӣ, соҳибкори афғони муқими Латвия аст, ки дар ин кишвар инчунин дар чанд парвандаи пурсарусадои дигар, аз ҷумла додани пораю тақаллубкорӣ муттаҳам мешавад. Ӯ ба қавли вакили дифояш дар парвандаи гум шудани пахтаи Тоҷикистон худро гунаҳкор эътироф накардааст. Ба гуфтаи таҳлилгарон Ғуломӣ ҳамоно яке аз чеҳраҳои асосии тиҷорати Узбакистон дар Латвия боқӣ мондааст.

Ин дар ҳолест, ки қаблан расонаҳои Латвия хабар доданд, ки Эмомалӣ Раҳмон, раисиҷумҳури Тоҷикистон аз ҳамтои латвиягияш-Андрис Берзинш хостааст, барои ёфтани пахтаи гумшуда муосидат кунад.

Мақомоти Латвия мушкили ин қазияро дар он гуфтаанд, ки бисёри ширкатҳои машғул ба додугирифти пахтаи Тоҷикистон дар минтақаҳои офшорӣ сабти ном шудаанд. Аз ҷумла ширкати “Реверс”, ки соҳиби пахтаи дуздидашуда арзёбӣ мешавад, ба навиштаи расонаҳои Латвия аз Тоҷикистон набуда, дар ҷазираҳои Панама сабти ном шудааст.

Қаблан Андрей Гришин, раҳбари пулиси криминалии Рига дар шарҳи ин ҷиноят гуфт, “он солҳои пеш содир шудааст, аммо пулис ариза дар ин бора охири майи соли 2014 гирифтааст. Ин ҷинояти хеле печидаи иқтисодист...”

Пахта ва алюминий маҳсулоти асосии содиротии Тоҷикистон ба Латвия буда, аз ин кишвар ба ватани мо доруворӣ, сӯзишвории минералӣ, маҳсулоти ширу гӯштӣ ва чӯб ворид мешавад.

Видеои таҳқири шоҳиди дуздии пахта аз ҷониби Ғуломӣ: