“Пиво баъди госсупорӣ”: Ихроҷи намоишкоронаи 5 донишҷӯи тоҷик аз Белорусия (АКС)
Мақомоти Белорусия намоишкорона қарор кардаанд, ки 5 донишҷӯи тоҷик барои пивонӯшӣ дар ҷойи ҷамъиятӣ аз ин кишвар ихроҷ шаванд.
Донишҷӯёни тоҷики Донишгоҳи Гомел аввали моҳи май бо ҳамгуруҳҳои белорусашон супоридани имтиҳони давлатиро таҷлил карда, дар назди хобгоҳи донишгоҳ оби ҷав нӯшидаанд.
Тибқи иттилои сомонаи хабарии Белорусия - “people.onliner.by” барои эълони ин қарор ҳамаи донишҷӯёни хориҷии донишгоҳи Гомел дар толори калон ҷамъ карда шуданд: “Дар ҳузури ҳамаи донишҷӯёни хориҷӣ 5 донишҷӯи тоҷикро, ки дар бахши ҳуқуқшиносӣ ва муносибатҳои байналмилалӣ таҳсил кардаанд, назди тахта даъват намуда, қарори ихроҷашонро қироат кардаанд, ки бар асоси он ҷавонони тоҷик бояд то 17-уми июн ин кишварро тарк кунанд”.
Тибқи қарори мақомоти милиса ва муҳоҷирати Белорусия ин донишҷӯён як соли оянда ҳаққи вуруд ба кишварро нахоҳанд дошт. Мақомоти Белорусия таъкид кардаанд, ки донишҷӯёни тоҷикро намоишкорона ихроҷ кардаанд, то барои дигарон дарс шаваду қонунгузории кишварро риоя кунанд.
Раёсати донишгоҳ бо изҳори таассуф афзудааст, ки ихроҷшудаҳо қаблан ҳеч қоидаро вайрон накардаанд ва таҳсили хуб доштаанд. Дар пайи пофишории раёсати донишгоҳ ба донишҷӯёни тоҷик муҳлат дода шудааст, то кори дипломияшонро ҳимоя кунанду бо диплом ба Ватан баргарданд.
Муҳаммад, яке аз донишҷӯёни ихроҷшуда дар шарҳи қазия изҳор доштааст, ки он рӯз супоридани имтиҳони давлатиро таҷлил карданд: “Хурсандӣ мекардем, аз хобгоҳ берун шудем. Дар дасти як нафарамон як зарфи дулитрии оби ҷав буд. Милисаҳо омада, моро бо ҳамгуруҳҳои белорусамон ба шуъбаи милиса бурданд. Баъди чанд рӯз ба хадамоти муҳоҷират даъват карда, гуфтанд, ки шуморо аз кишвар ихроҷ мекунем. Ташаккур ба раёсати факулта, ки барои гирифтани диплом муҳлат доданд”.
Бархе аз корбарони интернет чунин муҷозотро танҳо барои пивонӯшӣ, ки бори якум ба қайд гирифта шудааст, сангин хондаанд. Аммо бархеи дигар аз он истиқбол кардаанд, то барои дигарон дарси ибрат шавад.
Мӯҳр
ТАҚВИМ
« Май 2024 » |
---|
Душ | Сеш | Чор | Пан | Ҷум | Шан | Якш |
---|
| 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | |