19 май 2016 11:10Тоҷикистон / Сиёсат / Рӯ ба рӯ

Зуҳуров ба Матвиенко: Фармоишгарону қотилони тоҷикон дар Хованскоеро беҷазо намонед

Шукурҷон Зуҳуров, раиси Маҷлиси намояндагони Тоҷикистон, ки феълан дар Русия қарор дорад, имрӯз, 19 май дар мулоқот бо Валентина Матвиенко, раиси Шӯрои Федератсия хостори ҳалли мунсифонаи қазияи қабристони “Хованское”-и Маскав шуд.

Муҳаммадато Султонов, сухангӯи Маҷлиси намояндагон ба “Озодагон” иттилоъ дод, ки Зуҳуров дар суҳбат ба Валентина Матвиенко, раиси Шӯрои Маҷлиси федералии Русия аз қазияи қабристони Хованское, ки боиси марги се шаҳрванди Тоҷикистон ва захмӣ гардидани 23 тани дигар шудааст, изҳори таассуф ва нигаронӣ карда, хостори ҳалли ин қазия бо роҳи мунсифона шудааст.

Манбаъ мегӯяд, Шукурҷон Зуҳуров иброз доштааст, ки мутаассифона, ҳастанд шахсон ва гурӯҳҳое, ки хостори ворид кардани халал дар муносиботи дӯстонаи Тоҷикистон ва Русия мебошанд. Ба иттилои манбаъ, раиси Маҷлиси намояндагон аз Валентина Матвиенко тақозо кардааст, ки барои дастгир ва ба ҷавобгарии ҷиноятӣ кашидани қотилон ва ҳомиёну фармоишгарони ин ҳодиса аз тариқи кумита ва комиссияҳои дахлдори Шӯрои Федератсия назорати ҷиддӣ ба роҳ монда шавад.

Муҳаммадато Султонов иттилоъ дод, ки Шукурҷон Зуҳуров ҳамчунин иброз намудааст, ки баъди ҳодисаи рухдода ба вазъи будубоши шаҳрвандони Тоҷикистон таъсири манфӣ хоҳад расид: “Чун анъана баъд аз рух додани ҳодисаҳои марбут ба муҳоҷирон, мақомоти ҳифзи ҳуқуқи Русия фишорро ба муҳоҷирони меҳнатӣ пурзӯр менамоянд. Айни замон тавассути Васоити Ахбори Оммаи Русия аз ҷониби баъзе сиёсатмадорон, аъзои Шӯрои Федератсия, депутатҳои Думаи давлатии Русия аз ҳизби ҳукмрон, мисли ҳарвақта пешниҳодҳои ворид кардани раводид ба Тоҷикистон ва берун кардани муҳоҷирони меҳнатӣ аз қаламрави Русия садо дода истодаанд, ки чунин ҳолат тафаккури оммаро бар зидди муҳоҷирон ташаккул дода, замина барои хориҷ кардани шаҳрвандони моро бидуни асосҳои қонунӣ фароҳам меоварад. Таҳлили ҷараёни хориҷ кардани шаҳрвандони кишварамон аз қаламрави Русия собит менамояд, ки вақтҳои охир мақомоти дахлдори Русия шаҳрвандони кишварамонро беасос бо ҳар гуна баҳона тавассути қарори суд аз Русия хориҷ менамояд. Суръати баррасии парвандаҳои муҳоҷирон ва баровардани қарорҳо касро ба ҳайрат меоварад. Чунин ба назар мерасад, ки мақомоти дахлдори кишвари иқомат ин корро на дар асоси қонунҳо, балки аз рӯи нақшае амалӣ мекарда бошанд”.

Шукурҷон Зуҳуров гуфтааст, боиси таассуфи зиёд аст, ки танҳо дар солҳои 2011-2016 ҷасади 4815 нафар муҳоҷирони меҳнатӣ ба Тоҷикистон интиқол дода шудаанд, ки аз ин шумора 379 нафарашон аз ҷониби ҷинояткорон кушта шудаанд. Ба қавли Зуҳуров, ин ҳодисаҳои мудҳиш наметавонад ҷомеаи шаҳрвандии Тоҷикистонро ором гузорад: “Мутаасифона на ҳама қотилони ин кушторҳо муайян ва ба ҷавобгари ҷиноятӣ кашида шудаанд”.

Раиси Маҷлиси намояндагони Тоҷикистон изҳори умед кардааст, ки тамоми масъалаҳои марбут ба муҳоҷирони меҳнатӣ бо роҳи мусбӣ ҳал мешаванд.

Манбаъ мегӯяд, Валентина Матвиенко дар бораи қазияи қабристони “Хованское”-и Маскав ба Шукурҷон Зуҳуров ва дар шахси ӯ ба хонаводаҳои қурбоншудагон ҳамдардии амиқ баён намуда, аз вуқӯи ин ҳодиса дар қаламрави кишвараш ибрози таассуф кардааст. Валентина Матвиенко ба Шукурҷон Зуҳуров иттилоъ додааст, ки қазияи мазкурро шахсан зери назар гирифта, барои ҳалли мунсифонаи он мусоидат менамояд. Раиси Шӯрои Маҷлиси Федералии Русия таъкид кардааст, ки ҳеч гуна аъмоли муғризонаи шахсони алоҳида ва ё гурӯҳҳои манфиатҷӯ наметавонанд муносиботи хуби кишварҳои моро халалдор намоянд: “ Мо ҳаргиз ба чунин шахсон имкон намедиҳем, ки ин ҳадафи нопоки худро амалӣ намоянд”.

Валентина Матвиенко дар идома аз сатҳу сифати ҳамкориҳои байнипарлумонии кишвараш бо Маҷлиси намояндагони Тоҷикистон ибрози қаноатмандӣ намуда, таъкид кардааст, ки ин равобит бояд бештар тақвият дода шавад.

Мӯҳр

Хабарҳои монанд:

Чамила

Вакте, ки Хуршеда Султоноваи 10-соларо фашистони рус бо 17 захми корд дар Санкт Петербург берахмона ба катл расониданд, хамин Матвиенко Губернатори ончо буд. Ваъда карда, ки тафтишоти чараёни кушторро худаш зери рохбари гирифтааст ва хатман котилон мучозот хоханд шуд. Аммо коре накард. Алъон низ у набояд чизе умедвор шавем.

Ҷавоб диҳед Иқтибос Шикоят

А. Рустам

Cипос ба Шукурч,он Зух,уров! Бори аввал хондам, ки мак,оми олии кишварамон аз х.ук,ук,и шах,рвандони худ дар хорич,и кишвар х,имоят боч,уръатона х,имоят кард! Албатта, ин химоят вазифаи уст, вале мо шох,иди х,олем, ки макомоти мо аслан вазифаи худро ич,ро намекунанд! Дируз хондам, ки Д. Рогозин, ки аз идеологх,ои скинхендх,ои рус аст, барои баргузории ч,аласае ба Точ,икистон меояд, дам сурате ки амсоли у макомдорони рус бояд хак,к,и вуруд ба кишвари моро надошта бошанд!

Ҷавоб диҳед Иқтибос Шикоят

Эзоҳ илова кунед