Илтиҷо: Аз "ҳоли саг" ва "бунбасти коммуникатсионӣ" дар “Саховат” раҳоямон кунед!
Ба таваҷҷуҳи шаҳрдори Душанбе, Маҳмадсаид Убайдуллоев, Раёсати БДА, ВКД, Хадамоти давлатии назорат дар соҳаи нақлёт
Муддати чандест, ки бар асари таъмир дар пули мошингузари мавсум ба маҳаллаи 46 ва кӯчаи Борбади шаҳри Душанбе аз мавзеи фурушгоҳи “Мардон” то гардиши кӯчаи Фирдавсӣ мусофироне, ки дар маҳаллаҳои 61, 62, 63, 64, 65, маҳаллаи Гипрозем ва ҳамин тавр маҳалҳои канори Душанбеи навоҳии Рӯдакӣ ва шаҳри Ҳисор зиндагӣ мекунанд, ба таъбири мардумӣ “ҳоли саг” доранд.
Мушкили ман, мо ва тамоми мардуме, ки аз ин масирҳо бояд мегузаштанд ва акнун ҳам мегузаранд, чист?
Бар асари ин ки дар дар ду ҷодаи зикршуда таъмир ҷараён дорад, тамоми нақлиёти ҷамъиятӣ, хусусӣ, давлатӣ тавассути кӯчаи Неъмат Қарабоев аз паҳлӯи бозори “Саховат” мегузаранд. Табиист, ки зарфияти ин кӯча барои ғунҷодани ин қадар нақлиёт кофӣ нест ва рӯз то шаб дар ин масир роҳбандон (тамбашавӣ)-и шадид ба вуҷуд меояд ва мешавад, ки барои гузаштан яз як масири нимкилометрӣ то як соат мунтазир монд. Дар ин гармои тоқатфарсои Душанбе, ки аксари мардум рӯзадор ҳастанд, зери офтоби сӯзон мондан азоби сангин аст. Аз тарафи дигар мусофиркашҳои “стандартӣ”-и Душанбе, ки аксарашон “Старекс” мебошанд ва ба ҷойи 6 мусофир 8 ва гоҳо 12 мусофир савор мекунанд, чӣ қадар дамгир ва бадбӯй мешаванд, инро бояд тасаввур кард. Албатта пеши мо яқин аст, ки ин вазъро касоне, ки ҷодаҳо ва хиёбонҳои Душанберо бо гаронтарин мошинҳои хориҷии шишасиёҳ гашту гузор мекунанд, эҳсос намекунанду намебинанд, вале баъзан ба фикри мардум низ бояд буд.
Дар ин масир 4 бозори бузургтарин (“Саховат”, “Корвон”, “Деҳқон”, “Мошинбозор”) ва марказҳои савдои калон (“Панҷшер”, “Ганҷина”)-е ҷойгиранд, ки ҳамарӯза теъдоди ҳангуфти корафтодагон аз ин масир мегузаранд. Ин ҳам дар моҳи шарифи Рамазон ва арафи Иди Фитр, ки ниёзмандии мардум барои харид бештар мешавад. Аз сӯйи дигар ин масир роҳи асосии рафтуомади сокинони вилояти Хатлон низ ҳаст ва дар ин ҷода нақлиёте, ки мусофиронро ба ин вилоят мебаранд ҳаракат мекунанд. Тамоми ин нақлиёт аз як кӯчаи Неъмат Қарабоев ҳаракат мекунанд. Ва ин ҳам дар ҳоле, ки дар канораҳои ин роҳ аз ду тараф савдогарон ва корафтодагон нақлиёти шахсии худро нигоҳ медоранд. Ва ин “парковка”-и ба назари ман ғайриқонунӣ ташдиди роҳбандонро дучанд мекунад.
Дар тамоми ин мушкилот ман, ки ҳамарӯза аз ин масир кор меравам ва меоям надидам, ки як корманди БДА ва ё ниҳодҳои дигари масъули шаҳри Душанбе омада бошанду роҳбандони шадидро ба истилоҳ танзим намоянд ё ҳамон мошинҳои канорҳои роҳро ҳадди ақал дар ин гармои шадид, дар ин моҳи Рамазон барои сабуктар шудани ҳаракат, дур кунанд. Баъзе аз мусофиркашҳо (10, 19, 28), ки масири ҳаракаташон бар асари таъмир номушаххас шудааст аз роҳи ибодатгоҳи мавсум ба “масҷиди немисҳо” тавассути роҳҳои тангу борики маҳалҳои атрофи он мегузаранд ва худро ба мавзеи бозорчаи собиқи “Дӯстӣ” ба кӯчаи Ҷомӣ мерасонанд. Дар ҳамин роҳҳои тангу борик ҳам касе аз масъулон нест то ҳаракатро танзим кунад ва бараъкси масъулон ҷавонони ин маҳаллаҳо барои халосӣ аз ғавғову садои дилхароши мошинҳо, худ нақши корманди БДА-ву дигар масъулонро иҷро мекунанд, ки коре қобили сутудан аст.
Ин роҳбандони шадид боис шуда, ки аз бозори “Корвон” наҳлиёти ҷамъиятӣ (мусофиркашҳои 1, 2, 33, 52, 28, 5,) ба ҷойи 1 сомонию 60 дирам 3 сомонӣ ва таксиҳои маъруф ба “3-сомона” дар масирҳои ҳаракати худ 5 сомонӣ аз мусофирон кирои роҳ биситонанд.
Мушкили наҳлиёт, хусусан нақлиёти ҷамъиятӣ дар шаҳри Душанбе аз номуваффақтарин бахшҳои кори шаҳрдорӣ дар тамоми солҳои истиқлол мебошад, ки ҳеч аст, ки ҳалли худро биёбад.
Ҳамаи ин сардаргумиро ман ва бисёри мусофироне, ки дар ин масирҳо равуо доранд ҳосили кори нокифоя ва ғайриҳирфавии шаҳрдорӣ ва дигар ниҳодҳои масъули Душанбе медонем ва барои ҳалли ин вазъ Шумо ҷаноби шаҳрдори Душанбе ва дигар мухотабинро, ба унвони сокини шаҳр ва шаҳрванди кишвар илтиҷо мекунем. Ҳарчанд дар як ҷомеаи демократӣ, ки Тоҷикистон даъво бар ин гуна ҷомеа буданро дорад, илтиҷо кардани мақомдорон ва масъулон барои иҷрои рисолат ва вазифаашон кори дурусте нест, вале мо чорае ҷуз илтиҷо ва ба гуфтаи мардум “зора кардан”-ро надорем. Зеро ба назар мерасад, ки дар кишвари мо, зоҳиран дигар касе худро барои иҷро кардани масъулияти давлатӣ ва ҷамъиятияш масъул намедонад!
Мӯҳр
Эзоҳ илова кунед
ХАБАРҲОИ ОХИРИН
Баҳси пурзӯр кардани ҳифзи сарҳади Тоҷикистону Афғонистон дар дидори Э.Раҳмон ва ҳайати парлумони Аврупо10:09Оғози фурӯши смартфонҳои iPhone 8 ва iPhone 8 Plus!09:49БО ЗАБОНИ ШЕЪР: Ман зи андешаи турконаи як ҳамватанам метарсам...15:34Чаро ҳукумат ҳамеша ба ТАЛКО имтиёз медиҳад?14:16“Шантаж”-и ҳамсар: Аз ҳаққи модарӣ даст накашӣ расвоят мекунам10:27Баҳси буҷа: Аз қарзи маош то қарзи хориҷӣ11:57Сарвазири Тоҷикистон бо Президенти Узбакистон мулоқот мекунад11:05Ҳимояти СММ аз cарбози тоҷики пайрави “Шоҳидони Яҳво”, ки либоси низомиро рад кард10:38АКС+ВИДЕО. Нахустин анҷумани маъюбони Тоҷикистон дар Душанбе11:51Маҷлис: Аз тағйироти кадрӣ то ваъдаи 80 мансабдор барои пулдиҳӣ аз кисаи худ15:46100 метр дуртар: Тамокукашӣ маҳдудтар шуд13:21Аз парвандаи Маҳмудов то муроҷиати ҷабрдидагони "7 бурҷ": Роҳкиро надорем (ВИДЕО)11:18Пешниҳоди журналисти тоҷик ба раҳбарони кишварҳои ҷаҳон: 2018-ро соли беяроқӣ эълон кунем!09:33Агентии зидди коррупсия гуфт, “Умед-88” ва Вазорати молия аз “Роғун” қарз гирифтаанд08:01Таърихи имрӯз: Мавлуд, ҷашн, санаҳои таърихӣ, дамои ҳаво, бозори арз07:44
АХБОРИ ҶОЛИБ
10:09, 04 ноябр 2017
ТАҚВИМ
| « Апрел 2024 » | ||||||
|---|---|---|---|---|---|---|
| Душ | Сеш | Чор | Пан | Ҷум | Шан | Якш |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | |||||
