11 ноя 2016 11:16Оcиёи Марказӣ / Тоҷикистон

Фаридуншо Раҳматуллоев: Дар ҳама ҷо мегӯям, ки тоҷик ҳастам!

Фаридуншо Раҳматуллоев, як ҳунарманди синамо, ки чанд соли ахир дар Маскав фаъолият дорад, мегӯяд, ҳама ҷо, ҳатто ҳангоми наворгирии филм зуд таъкид мекунад, ки тоҷик мебошад.

Ба қавли Раҳматуллоев 10 сол қабл вақте бо нияти кор ба Русия омад, нахуст ба Рушт Руштов занг зад: “Ӯ он замон раҳбари ширкати филмсозии “Высь” буд. Ҳамроҳ бо Бахтиёр Худоназаров филмсозӣ мекарданд. Соли 2007 бори дигар аз Душанбе ба Руштов занг задам. Ин бор ҷавоби мусбат дод. Гуфт, ба наздикӣ наворгирии як филм шурӯъ мешавад ва худат ҳам онҷо кор хоҳӣ кард. Ҳамин тавр ба Боку рафтам ва дар сохтани филми “Оружие” дар гуруҳи коргардонӣ фаъолият кардам”.

Ба гуфтаи Фаридуншо, пас аз чанд муддат барои ин филм як бозигари дигар барои нақши манфӣ лозим шуд ва ӯро интихоб кардаанд. “Ҳамин тавр нақшофаринии нахустинамро шурӯъ кардам”,- гуфтааст ҳунарпешаи тоҷик дар суҳбат бо сомонаи “Россия для всех”.

Ӯ давоми 10 соли зиндагӣ дар Маскав дар 30 филм нақшофарӣ кардааст ва аз ин миён танҳо як маротиба қаҳрамонаш мусбат будааст: “Дар аввал ғайриоддӣ буд, чун ман дар зиндагии рӯзмарра тамоман одами дигар ҳастам”.

Фаридуншо, ки аз кӯдакӣ орзӯи бозигари филм шудан ва офаридани нақши ғоратгари баҳриро доштааст, мегӯяд, “албатта мехоҳам ягон нақши мусбатро ҳам бозӣ кунам. Ҳамчунин мехоҳам ягон нақшеро аз китоби “Инҷил” бозӣ кунам”.

Ба гуфтаи ӯ, соли 2014 Носир Саидов, раҳбари “Тоҷикфилм” ӯро барои бозигарӣ дар филми “Муаллим” ба Тоҷикистон даъват кард. Дар ин филм вай нақши писари Марат Ориповро бозӣ кардааст.

Дар мавриди хонаводаи худ дар ин мусоҳиба гуфтааст: “Падари ман таърихдон ва модарам дӯзанда ҳастанд. Падарам соли 2005 даргузашт. Як хоҳар ва бародар дорам”.

Бародари Фаридуншо, Сиёвуш дар филми “Хоби маймун” (Сон обезьяны)-и сохтаи Румӣ Шоазимов нақшофарӣ кардааст. Таҳмурас яке аз ду писари Фаридуншо феълан донишҷӯи соли аввали Муассисаи синамои Герасимови Русия (ВГИК) мебошад. Ин ҳунарманди тоҷик, ки набераи Мастибек Тошмуҳаммадов ва Буринисо Бердиева, сармуҳаррири рӯзномаи “Маориф ва маданият” низ ҳаст, дар мавриди ӯ гуфтааст: “Ҳама аз ӯ метарсиданд. Ҳам дар хона ва ҳам дар кор. Ҳатто масъулони баландпояи давлатӣ ҳангоми дидани ӯ саф меоростанд. Чунки ҳамеша камбудиҳои давлатро мегуфт. Аз ин рӯ дар кишвар аз эътибори баланд бархурдор буд. Беш аз 20 сол нашрияи “Маданият ва маориф”-ро раҳбарӣ мекард. Як ватандӯсти воқеъӣ буд. Ба ин далел ӯ тавонист ҷашни Наврӯзро дар Тоҷикистон дубора зинда кунад”.

Дар мавриди зиндагӣ дар Русия гуфтааст: “Бароям зиндагӣ дар Русия ҷолибтар аст. Чаро ки ба ман наздиктар аст ва кор кардан дар заминаи филмсозӣ, мутаассифона, аз Тоҷикистон хубтар аст. Ҳамсар ва духтарам Гурдофарид дар Душанбе зиндагӣ мекунанд. Мехоҳам онҳоро низ инҷо биёрам”.

Фаридуншо дар бораи мушкилоти роҳ ёфтани тоҷикон ба синамои Русия гуфтааст: “Мушкили аслии тоҷикон ин аст, ки забони русиро ба гунаи лозим намедонанд, ки як ҷанбаи бузурги манфӣ мебошад. Аммо солҳои ахир вазъият беҳтар шудааст. Одамон забон меомӯзанд ва беҳтар суҳбат мекунанд. Замоне ки инҷо мерасанд бо рафтори худ фарқ мешаванд. Ман ҳамеша ба ҳамватанҳои худ таъкид мекунам, ки худро ба гунаи шоиста нишон бидиҳанд ва мардуми моро шарманда накунанд. Мегӯям, агар инҷо омадед бояд бо сари баланд роҳ равед. Фарҳанги худро нишон диҳед. Ҳама ҷо мегӯям, ки ман тоҷиам. Ҳатто замони филмсозӣ зуд мегӯям, ки тоҷик ҳастам”.

Дар посух ба пурсиши вокуниши одамон баъди фаҳмидани он ки тоҷик ҳастӣ чӣ гуна мешавад, чунин посух додааст: “Албатта, барояшон ҷолиб аст. Онҳо тоҷиконро каме дигаргуна мебинанд. Баъдан дар суҳбат бо онҳо ба шӯхӣ савол медиҳам, ман забону фарҳанг, таъриху адабиёти худу шуморо медонам. Шумо аз чӣ ифтихор доред?”

Ба гуфтаи Фаридуншо ӯро бештар филми “Тихая застава” маъруф кард: “Вақте нақши маро баррасӣ мекарданд коргардон гуфт, ки як мӯйсафеде ҳам лозим аст. Акси Раҷаб Ҳусейнро нишон додам ва коргардон гуфт, оне ки меҷӯстам, ҳамин аст. Бароям бори аввал бозӣ кардани нақши асосӣ ҳаяҷонангез буд. Раҷаб –ака ба ман бисёр кумак кард”.

Ин ҳунарпешаи тоҷик набуди сармоягузориро мушкили аслии синамои тоҷик гуфтааст: “Пулу техника лозим аст. Барои сохтани филми сатҳи ҷаҳонӣ 1,5-2 миллион доллар лозим мешавад. Мутаассифона дар Тоҷикистон ин миқдор пул нест”.

Фаридуншо Раҳматуллоев бо 10 сол зиндагӣ дар Русия ҳанӯз шаҳрвандии ин кишварро надорад. Ӯ ба суоли “Россия для всех” дар мавриди он ки оё кори синамогарии ӯ дар дуруст кардани асноди марбут ба дарёфти шаҳрвандии Русия кумак намекунад, гуфтааст: “Қонун қонун аст ва назди он ҳамаи мо баробарем. Ҳама бояд тамоми марҳилаҳои лозимро тай кунанд. Ман аз тариқи барномаи осоншуда, яъне ҳамчун соҳибзабон иқдом кардаам”.

Аксҳо аз сайти "Россия для всех"

Мӯҳр

Хабарҳои монанд:

ФОРСИТОҶИК

БАРОДАР ВАҚТЕ ШМО АЗ МИЛЛАТОН ҲИМОЯТ МЕКУНЕН БАРОИМО ИФТИХОР ҲАСТ МАН МИЛЛАТАМРО ДУСТМЕДОРАМ

Ҷавоб диҳед Иқтибос Шикоят

Тоҷикбача

Офарин Фаридуншоҳ!Раҳмат ба падару модари шумо,ки ин гуна шербачаи миллатдӯстро ба воя расониданд.Ана ин гуна шербачаҳоро Тоҷик мегӯянд!Бароятон муваффақиятҳои беохир таманно мекунам!Бояд ҳар як Тоҷик,дар кӯҷое набошад,бо сари баланд бигӯяд;ман Тоҷик ҳастам!!!
Зинда бошед,шербачаи миллат!!!

Ҷавоб диҳед Иқтибос Шикоят

Эзоҳ илова кунед