23 ноя 2016 15:47Оcиёи Марказӣ / Тоҷикистон

Иштироки ҳайати парлумонии Тоҷикистон дар кори ҷаласаи комиссияҳои Ассамблеяи байнипарлумонии ИДМ

Гуруҳе аз вакилони Маҷлиси намояндагон, палатаи поёнии парлумони Тоҷикистон, ки таҳти раҳбарии Шукурҷон Зуҳуров дар Санкт-Петербурги Русия қарор доранд, имрӯз, 23 ноябр дар кори ҷаласаҳои нақшавии комиссияҳои доимии Ассамблеяи байнипарлумонии кишварҳои аъзои ИДМ иштирок кардаанд.

Муҳаммадато Султонов, сухангӯи Маҷлиси намояндагон ба “Озодагон” гуфт, дар ин ҷаласа вакилон ҳамроҳ бо аъзоёни Маҷлиси миллӣ роҷеъ ба масъалаҳои фарҳанг, иттилоот, сиёсат, ҳамкориҳои байналмиллалӣ, сиёсати аграрӣ, захираҳои табиӣ ва экологӣ, иҷтимоию иқтисодӣ, сиёсати хориҷӣ фикру андешаҳои хешро иброз намуданд.

Ба гуфтаи ӯ, Муҳаммадюсуф Имомзода, узви Маҷлиси Миллӣ, Ҷамшед Саидов, вакили Маҷлиси намояндагон ва Мирзодавлат Сабурзода, ки муовини раиси комиссияи доимии Ассамблеяи байнипарлумонии Созмони Аҳдномаи Амнияти Дастаҷамъӣ оид ба масъалаҳои итисодию иҷтимоиро бар ӯҳда дорад, дар ҷаласа зиёда аз 10 масъаларо мавриди баррасӣ қарор доданд: “Аз ҷумла масъалаҳо оид ба рафти иҷрои барномаи фаъолияти Ассамблеяи парлумонии Созмони Аҳдномаи Амнияти Дастаҷамъӣ оид ба наздиксозӣ ва ҳамоҳангсозии қонунгузории давлатҳои аъзои ин созмон барои солҳои 2016-2020, “Дар бораи ҷамъбасти иҷлосияи майи соли 2016-и Шўрои Созмони Аҳдномаи Амнияти Дастаљамъӣ ва рафти иҷрои ба тасвиб расонидани шартномаҳои байналмиллалии басташуда, дар доираи ин созмон ва “Дар бораи таҳияи хуҷҷатҳои ҳуқуқию меъёрии ба танзим дароварандаи фаъолияти Ассамблеяи Байнипарлумонии созмони мазкур ва тасдиқи накшаи корӣ барои соли 2017”- ро ба таври фаъолона баррасӣ намуданд”.

Ҳайати Маҷлиси намояндагони Тоҷикистон ба раҳбарии Шукурҷон Зуҳуров шоми 22 ноябр ба шаҳри Санкт-Петербурги Русия сафар намуданд. Ба иттилои Муҳаммадато Султонов, дар назар аст, Шукурҷон Зуҳуров дар доираи ин сафар бо раиси Думаи давлатии Федератсияи Русия ва ҳайати воломақоми парлумони Молдов мулоқот анҷом бидиҳад.

Мӯҳр

Хабарҳои монанд: