21 дек 2016 09:07Тоҷикистон / Иҷтимоӣ / Рӯ ба рӯ / Тема дня

Мақомот: Духтари 19-cола баъди фиреби фолбин худкушӣ кардааст

Раёсати корҳои дохилии вилояти Суғд аз боздошти як зани 34-сола, ки ҳамчун фолбин маъруф будааст, хабар медиҳад.

Бино ба иттилои ин ниҳод, Маърифат Каримова, сокини ҷамоати деҳоти Гули-Сурхи шаҳри Истаравшан бо ваъдаи бо роҳи сеҳру ҷоду ҳал намудани мушкили як духтари 19-cола аз соли 2014 то соли 2016 аз ӯ дар маҷмӯъ беш аз 206 ҳазор сомонӣ маблағи пулӣ ва тилловорӣ гирифтааст. Манбаъ мегӯяд, Каримова ваъда кардааст, ки бо роҳи сеҳр миёни духтар ва дӯстдоштааш муҳаббат ба вуҷуд меоварад, ки ба хонадоршавии онҳо сабаб мегардад.
“Ин миқдор маблағи пулиро духтари фиребхӯрда, ки ба қобилияти фолбин бовар дошт аз хонаи бародар ва дигар пайвандонаш қисм-қисм дуздида ба фолбин додааст. Ҳангоме, ки ҳолатҳои дуздӣ ва воқеъияти кор ошкор мешавад, духтар худро шахси шармандашуда ҳисобида ба ҳалокат мерасонад. То рӯзи марг маълумоти мазкур ба тафтишот дастрас ва баъзе аз далелҳои шайъӣ, аз ҷумла тилловорӣ аз хонаи фолбин дарёфт гардиданд”,-хабар медиҳад РКД.

Ба иттилои манбаъ, Маърифат Каримова маблағҳои пулии бо роҳи фиреб ба даст овардаро барои хароҷоти шахсиаш, аз ҷумла сохтмони хонаи истиқоматӣ истифода бурдааст: “Ба иттилои тафтишот хонаи навсохтмони боҳашамат ҳақиқати талхест, ки кирдори ҷиноятии ин занро тасдиқ мекунад. Агар даромадҳои муфт намебуд ба оилае, ки кори аниқ ва маоши доимӣ надоранд, бунёди чунин хона имконнопазир мегардид”.

Нисбати Каримова бо моддаи 247, қисми 4-и Кодекси ҷиноятии Тоҷикистон парвандаи ҷиноятӣ оғоз гардидааст.

Мақомоти тафтишотии Суғд аз шаҳрвандоне, ки аз амалу рафтори Маърифат Каримова, сокини деҳаи Зарнисори шаҳри Истаравшан зарар дидаанд, даъват кардааст, ба Додситонии ноҳияи Бобоҷон Ғафуров ё мақомоти пулис муроҷиат намоянд.

Акс аз Интернет

Мӯҳр

Хабарҳои монанд: