Камбудиҳои се соҳа дар як ниҳод боқӣ мондаанд

Дар Кумитаи ҷавонон, варзиш ва сайёҳӣ ҷаласае ҷиҳати натиҷагирӣ намудан аз фаъолияти кории худ дар соли гузашта ва омодагӣ барои соли 2013 баргузор гардид.

Тавре аз ин кумита ба Озодагон иттилоъ доданд, зимни ин нишаст Кабир Ҷураев, муовини аввали раиси кумита иброз доштааст, ки ҳамроҳӣ ва ҳамкорӣ бо мақомотҳои дахлдору сохторҳои масъули дастгоҳи марказӣ ва  дастгирии дуҷониба дар шароити имрўза аз манфиат холӣ набуда, метавонад барои рафъи мушкилоти соҳа заминаи мусоидеро фароҳам гузорад.

Номбурда қайд кардааст, ки дар баробари дастоварду пешравиҳо, ҳанӯз дар ин  се соҳа-ҷавонон, варзиш ва туризм дар сатҳи маҳалҳо проблемаҳои ҳалталаб зиёданд: «Новобаста аз мушкилоти мавҷудбуда, бо ҷалби мутахассисон ҷиҳати самаранокии кор ва бартараф намудани камбудиҳои ҷойдошта бояд талош варзем, зеро масъулияти танзим ва дарёфти механизми коркарди рушди се самти хеле муҳим вазоифаи асосии мост».

Сарчашмаи хабар илова намуд, ки дар ин ҷаласа фаъолияти кумита дар соли 2012, самтҳои асосии фаъолият, нақшаи кор барои нимсолаи аввали соли 2013 ва як қатор масъалаҳои дигар мавриди баррасӣ қарор гирифтанд.







Мӯҳр