10 май 2015 14:52Тоҷикистон / Иҷтимоӣ

Дархости мулоқоти муҳоҷирон бо Эмомалӣ Раҳмон дар Маскав

Иттиҳодияи ҷавонони Тоҷикистон бо пахши як муроҷиатнома хостори мулоқоти як теъдод муҳоҷирини тоҷик бо Эмомалӣ Раҳмон, раисиҷумҳури Тоҷикистон дар Маскав шуданд. Иззат Амон, роҳабари ин иттиҳодия матни муроҷиатномаро дар саҳфаи Фейсбуки худ интишор кардааст.

Эмомалӣ Раҳмон рӯзи ҷумъаи 8 май ҷиҳати иштирок дар чорабиниҳои бахшида ба 70-солагии пирӯзӣ дар Ҷанги дувуми ҷаҳон ба Маскав сафар намуд.

Иззат Амон ба “Озодагон” гуфт, агар имкони дидор шавад, дархостҳои аввалини муҳоҷирин аз раисиҷумҳур аз инҳо иборат хоҳад буд: “Иваз кардани сафир ва консул, ҳалли ду мушкилии муҳими муҳоҷирон: бекор кардани мамнъуияти вуруди муҳочирон ба ин кишвар ва бекор кардани қарори суд оиди ихроҷшудагон. То имрӯз ҳудуди 500 000 шаҳрванди Тоҷикистон ё мамнуъулвуруд шудаанд ва ё бо қарори суд ихроҷ (депорт) гардидаанд. Ворид шудани кишварамон ба Иттиҳоди иқтисодии Авруосиё, поин овардани нархи шиносномаи хориҷӣ, поин овардани нархи чиптаҳои парвоз, боло бурдани обу рӯ ва имиҷи тоҷикон дар ин кишвар, таъсиси Маркази расонидани ёри ҳуқуқӣ, ки имкон дошта бошад 24 соат ба муҳоҷирони тоҷик кумак расонад”.

Иззат Аммон ҳамчунин гуфт, ягона канале, ки дар ҳоли ҳозир онҳо имкон доранд ба раисиҷумҳур муроҷиатнома пахш кунанд, мутаассифона ҳамин Фейсбук аст: “Ба Сафорати Тоҷикистон дар Маскав, конусулӣ ва Намояндагии вазорати меҳнат, муҳоҷират ва шуғли аҳолӣ дар Русия мо ҳеч гуна дастрасӣ надорем, ин ду ниҳод ҳеч гуна ҳамкорӣ ва тамос бо муҳоҷирин надоранд. Муҳоҷирин ҳеч гуна алоқа бо сафорату консулгарӣ надоранд,зеро сафорату консулгарӣ дар дунёҳои мутафовит зиндагӣ мекунанд”.

Дар матни муроҷиатнома ба раисҷумҳур гуфта мешавад, “қабл аз расидани Шумо ба Маскав фашистон боз як шаҳрванди Тоҷикистонро бераҳмона қатл намуда, сарашро аз тан ҷудо карданд. Мисли ин, дар хоки ин кишвар ҳамарӯза фишору таҳдиду куштор нисбати шаҳрвандон зиёд шуда истодааст. Пӯшида нест, ки қисмати зиёди буҷаи кишвар аз ҳисоби маблағи фиристодаи муҳоҷирин мебошад. Ва сабаби боло рафтани қурби доллар нисбат ба пули миллӣ низ кам шудани маблағи интиқоли муҳоҷирин ба Ватан мебошад. Мисли ҳамин як қатор мушкилоти дигар низ муҳоҷирини тоҷикеро, ки дар ин кишвар кору фаъолият доранду оилаҳояшонро таъмин мекунанд, думбол менамояд”.

Дар ин муроҷиатнома аз раисҷумҳур хоста шудааст, агар имкон ва вақти дидор дошта бошанд, “ин вохӯрӣ набояд бо рӯйхати сафорату консулгарӣ сурат гирад. Агар чунин шавад муҳоҷирони воқеъӣ ҳеҷ гоҳ имкони дар он лист қарор гирифтанашон пайдо намешавад”.

Иззат Амон мегӯяд, яке аз сабҳое, ки онҳо дар ин вохурӣ истеъфои сафир ва консулиро талаб мекунанд ин аст, ки ин ду хешовандони раисҷумур мебошанд, бинобар ҳамин фаъолият намекунанд: "Садҳо маротиба хостем бо сафиру консул вохӯрӣ кунем, вале, мутаасифона моро ин ду ниҳод душман эълон кардааст, дарҳои ин ду ниҳод барои мо баста аст. Танҳо ба он хотир, ки мо онҳоро мегӯем, то кор кунанд, солҳои дароз дар кабинетҳои гарм нишаста берун намебароянд".

Мӯҳр

Хабарҳои монанд: