05 май 2014 12:11Тоҷикистон / Дидгоҳи хос
Номаи саркушодаи Иззат Амон ба раиси Маҷлиси Намояндагон
Матни нома:
“Шукурҷон Зуҳуров. Баҳси Шумо бо вакили Маҷлиси Намояндагон Мухиддин Кабириро дар бораи ширкати муҳоҷирон ба ҳайси номзад дар интихоботи кишвар маҷбур сохт, то ин сатрҳоро бинависам. Ба ҳеч кас пӯшида нест, ки парлумони Тоҷикистонро хомӯштарин парлумон дар ҷаҳон меноманд. Тӯли таърихи 20-солааш он то ҳол нисбат ба ҳеч лоиҳаи пешниҳодшуда аз ҷониби ҳукумати кишвар ва ё қарордодҳое, ки аслан ба манфиати давлату миллат набуда танҳо манфиатҳои гуруҳеро ҳимоя менамоянд, садо баланд накардааст. Мисолаш ҳамон озод кардани IRS аз супоридани андози давлатӣ бо вуҷуди номаълум будани раҳбарияти ин ширкат ва низ додани қисмате аз хоки кишвар ба Чин мебошад. Агар аввалиро ба сахтӣ ҳам бошад, фурӯ барем, охирӣ ба гумони ман нобахшиданист, ки муҷримҳояш ҳатман дар назди миллат ҷавоб хоҳанд гуфт.
Гузашта аз ин, аксарияти кулли парлумонро намояндаҳои як ҳизб ташкил медиҳанду лоиҳа ва ё қарордодҳои пешниҳодшуда аз ҷониби ҳукумати кишвар бидуни баҳс қабул ва тасдиқ мегарданд. Яъне, дар ниҳоди зери раҳбарии Шумо танҳо манфиатҳои ҳизби ҳоким ҳимоя меёбанд. Мешавад гуфт, вакилони халқро ба ниҳоди зери раҳбарии Шумо интиҳоб нею таъин менамоянд. Баъзеҳоро аз рӯи ҷои зисту маҳал, баъзеи дигарро аз доштани мавқеи сиёсӣ ва идеологӣ ба ин ё он гуруҳ. Албатта, шунидани ин ҳарфҳо сахтанд, аммо ҳақиқат ҳамеша талх аст, ҷаноби раис! Боре дар як суҳбат аз ҷаноби Кабирӣ, ки чандин сол аст, вакили парлумон мебошад, пурсидам: Оё чунин шудааст, ки парлумон кадом пешниҳоди ҳукуматро рад карда бошад? Гуфт, “бале”. Дар як вохӯрӣ президент пешниҳод кард, дигар маро “Ҷаноби Олӣ” нагӯед, мо рад кардему гуфтем: На, мо мегӯем.
Ҳоло бигзарем ба асли масъала. Дар он суҳбататон Шумо зикр кардед, ки шаҳрванд агар 5 сол аз кишвар берун бошад ба таври автоматӣ аз шаҳрвандӣ хориҷ мегардад. Шумо инро қонуни конситутсионӣ номидед. Ба гумони банда, ин банди қонунро оиди шаҳрвандӣ комилан бояд аз Қонуни асосӣ ҳазф кард. Конситутсия бояд мутобиқ ба шароит ва вазъи мардум навишта шавад, на ин ки тақлиди кӯр-кӯрона бошад. Тамоми кишварҳо кӯшиш менамоянд, то сафи шаҳрвандонашон зиёд гардаду барои ин барномаҳои гуногунро ба хориҷиён пешниҳод менамоянд, то шаҳрвандии он кишварҳоро бипазиранд. Мо бошем, бо гузоштани муҳлат ва шарту шароитҳои нофаҳмою номақбул сафи шаҳрвандони худро кам менамоем.
Дигар ин ки зиёда аз 2 миллион шаҳрванди мо феълан дар муҳоҷиратанд. Бо набудани ҷойҳои корӣ ва маоши кофӣ дар кишвар теъдоди онҳо сол аз сол меафзояд. Ин ҳақиқатест, ки бо омори дурӯғин намешавад онро рупӯш кард. Дар ин миён, теъдоде ҳастанд, ки ҳамеша дар рафтуомад байни ду кишвар қарор доранду баъзеи дигар ин имконотро надоранд. Вакили парлумон Галина Рабиева дар исботи даъвои худ, ки чаро муҳоҷирон ҳаққи ширкат дар интиҳоботи кишвар ба ҳайси номзадро надоранд, гуфтааст, муҳоҷирон аз асл ва равандҳое, ки дар кишвар мегузаранд, бехабаранд. Ба гумони ман, ин ҳарфҳо нисбат ба муҳоҷирон туҳмати хушку холӣ ва дараҷаи баланди беинсофист.
Бояд зикр кард, солҳои охир аз Тоҷикистон на танҳо муҳоҷирони корӣ, балки донишмандону олимон ва ходимони хизматнишондодаи ҷумҳурӣ низ ҳиҷрат мекунанд. Ҳиҷраташон ҳам танҳо ба хотири ёфтани як даҳон нон мебошад. Аксарияти онҳо дар марказҳои илмии Русия кор менамоянд. Дониста бошед, ки танҳо дар ҳудуди Маскав ва навоҳии он зиёда аз 200 нафар омӯзгор дар донишгоҳҳои муҳтарами ин кишвар машғули тадрисанд. Ба гумони Шумо, ин устодон дар асри 21, асри илму техникаву интернет метавонанд аз равандҳои сиёсию иқтисодӣ ва фарҳангии кишварашон бехабар бошанд?
Албатта не. Бинобар ин, ман суханҳои Шуморо дар ҳаққи ин устодони муҳтарам таҳқир мешуморам. Ба ҳамагон маълум аст, ки маблағи фиристодаи муҳоҷирон 80 дарсади буҷаи кишварро ташкил медиҳад. Мувофиқ бо омори расмии Тоҷикистону Русия муҳоҷирони корӣ солона 4,5 – 5 миллиард доллар ба хонаводаҳояшон пул мефиристанд. Мешавад гуфт, бонкҳои Тоҷикистон танҳо ва танҳо аз ҳисоби маблағи ирсолнамудаи муҳоҷирон фоидаҳои ҳангуфт ба даст оварда, андоз месупоранд. Яъне, дар умум ҳаминҳоянд, ки иқтисоди хнаводаҳоро мечархонанд.
Чизи дигаре, ки ба ҳама маълум аст, ин шумори ҷасадҳои ба Ватан овардаи муҳоҷирони корӣ мебошад. Солона мо зиёда аз 3 ҳазор тобут аз ин кишвар ба Ватан мефиристем. Қисмате аз инҳо ба таври маҷбурӣ аз дасти нажодпарастон кушта шудаанд. Яъне, муҳоҷирон ҷон дар каф гирифта, хонаводаҳои худ ва ҳукуматро мехӯронанду мепӯшонанд. Бар ивази ин ҳама ҷонбозиҳо ҳукумати кишвар чӣ хидмате барои муҳоҷирони ҷон дар каф анҷом додааст? Кай ва кадоме аз Шумо – намояндагони парлумони кишвар ва вакилони халқ боре ба суроғи муҳоҷирон омадед? Оё боре шудааст, ки Шумо ҳамчун раҳбари ниҳоди қонунгузор ва вакили халқ боре ба аёдати муҳочири бемору дилшикаста ва ё таъзияи хонаводаи муҳоҷир рафта бошед? Гумон накунам.
Намояндагиҳои Тоҷикистон дар ин кишвар, яъне сафорату консулгарӣ ва Хадамоти муҳочират низ нисбат ба муҳоҷирон дақиқан ҳамон мавқеъеро доранд, ки Шумо доред. Боре надидаем, ки сафорату консулгарӣ ба суроғи муҳоҷири тоҷик рафта бошанд. Корашон танҳо фурӯши варақаҳои бозгашт ва бизнес мебошад. Бовар накунед, аз худи муҳоҷирон пурсед.
Ман ҳам муҳоҷирам. Инак, 15 сол аст, ки дар ҳиҷратам. Моҳе як бор ба ватанам танҳо ба хотири муҳаббати доштаам ба ин Ватан сафар мекунам. Дар донишгоҳҳо ва марказҳои илмии Русия таҳсилу тадрис кардаам. Ҳамеша дар маҳфилҳои сиёсию фархангии ин кишвар даъват мешаваму аз мавқеи Ватану миллатам дифоъ мекунам.
Дар охир аз Шумо ва Галия Рабиева талаб менамоям, барои таҳқири зиёда аз 2 миллион шаҳрванди муҳоҷири тоҷик узрхоҳӣ кунед. Дониста бошед, Шумо ҳамеша наметавонед вакили халқ ва раиси парлумон бошед. Рӯзе мерасад, ки ҳар яке аз мову Шумо барои ҳар ҳарфу амаламон назди ин миллат ҷавоб хоҳем гуфт. Хуб аст, агар ин ҷавоб пешопеш гуфта ва карда шавад.
Иззат АМОН,
Раиси Иттиҳоди ҷавонони тоҷик дар Русия” Мӯҳр
Эзоҳ илова кунед
ХАБАРҲОИ ОХИРИН
Баҳси пурзӯр кардани ҳифзи сарҳади Тоҷикистону Афғонистон дар дидори Э.Раҳмон ва ҳайати парлумони Аврупо10:09Оғози фурӯши смартфонҳои iPhone 8 ва iPhone 8 Plus!09:49БО ЗАБОНИ ШЕЪР: Ман зи андешаи турконаи як ҳамватанам метарсам...15:34Чаро ҳукумат ҳамеша ба ТАЛКО имтиёз медиҳад?14:16“Шантаж”-и ҳамсар: Аз ҳаққи модарӣ даст накашӣ расвоят мекунам10:27Баҳси буҷа: Аз қарзи маош то қарзи хориҷӣ11:57Сарвазири Тоҷикистон бо Президенти Узбакистон мулоқот мекунад11:05Ҳимояти СММ аз cарбози тоҷики пайрави “Шоҳидони Яҳво”, ки либоси низомиро рад кард10:38АКС+ВИДЕО. Нахустин анҷумани маъюбони Тоҷикистон дар Душанбе11:51Маҷлис: Аз тағйироти кадрӣ то ваъдаи 80 мансабдор барои пулдиҳӣ аз кисаи худ15:46100 метр дуртар: Тамокукашӣ маҳдудтар шуд13:21Аз парвандаи Маҳмудов то муроҷиати ҷабрдидагони "7 бурҷ": Роҳкиро надорем (ВИДЕО)11:18Пешниҳоди журналисти тоҷик ба раҳбарони кишварҳои ҷаҳон: 2018-ро соли беяроқӣ эълон кунем!09:33Агентии зидди коррупсия гуфт, “Умед-88” ва Вазорати молия аз “Роғун” қарз гирифтаанд08:01Таърихи имрӯз: Мавлуд, ҷашн, санаҳои таърихӣ, дамои ҳаво, бозори арз07:44
АХБОРИ ҶОЛИБ
10:09, 04 ноябр 2017
ТАҚВИМ
| « Май 2024 » | ||||||
|---|---|---|---|---|---|---|
| Душ | Сеш | Чор | Пан | Ҷум | Шан | Якш |
| 1 | 2 | 3 | 4 | 5 | ||
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | ||
