Видеои дарси нону самбӯсапазии хонандагон дар мактабҳо
Бо дастури дастури Абдураҳмон Қодирӣ, раиси вилояти Суғд, дар макотиби шаҳру навоҳии ин минтақа тадриси фанни рӯзгордорӣ барои духтарон оғоз гардидааст. Тавре шабакаи “Симои мустақили 1”-и Хуҷанд гузориш медиҳад, фанни рӯзгордорӣ дар макотиб оғоз шуда, ҳоло барои духтарон давоми як соат аз насби танӯру нонпазӣ то самбӯсаву дигар корҳои рӯзмарра омӯзонда мешавад.
Муътабар Калонова, омӯзгори фанни касбу ҳунар дар яке аз мактабҳои ноҳияи Бобоҷон Ғафуров дар сӯҳбат бо ин шабака гуфтааст, дарси рӯзгордорӣ миёни донишомӯзон як андоза фазои меҳнатдӯстию муттаҳидиро эҷод мекунад. Ӯ мегӯяд, “ман ба ҳамаи ин духтарони синфи ҳафтум хамир карданро омӯзондам, ки алакай онҳо ин корро дар хонаҳои худ анҷом медиҳанд.”
Ба иттилои манбаъ, аз моҳи марти соли ҷорӣ дар мактаби миёнаи рақами 31-и ноҳияи Бобоҷон Ғафуров тадриси фанни рӯзгордорӣ ташкил шуда, тамоми маҳсулоти зарурӣ, аз қабили орду равған аз ҳисоби донишомӯзон мебошад. Хонум Калонова илова дорад, ки дар оянда духтарон метавонанд, аз ин касби рӯзгордории омӯхтаашон истифода карда, ҳамчун соҳибкор фаъолият кунанд: “Вақте дар пӯхтани ғизоҳо устод мешаванд, дар оянда метавонанд, фармоишҳои ҳамсояҳои худро, ки тӯю маърака доранд, иҷро кунанду маблағ ба даст оранд ва ҳоло худи ман бо духтаронам ин корҳоро анҷом медиҳам.”
ВИДЕО АЗ ТВ СМ-1
Абдураҳмон Қодирӣ, раиси вилояти Суғд ахиран дар пайи як иқдоми ногаҳонии худ дастур дода буд, то дар аксар макотиби миёнаи шаҳру навоҳии минтақа танӯру “дегдон” (оташдон) шинонанд. Дар ҳамин ҳол, масъулони Раёсати маорифи вилояти Суғд бо тасдиқи ин хабар ба “Озодагон” гуфта буданд, маъракаи танӯршинонию “дегдон”-монӣ аз моҳи феврали соли ҷорӣ ба ин сӯ идома дорад ва ҳадаф омода кардани духтарон ба рӯзгордорист.
Ба иттилои манбаи мо аз Раёсати маорифи вилояти Суғд, феълан дар макотиби миқёси вилоят ҳудуди 300 танӯр, беш аз 500 дегдон шинонда шуда, 109 маҳфили қолибофию кашидадӯзӣ ва рӯзгордорӣ ба роҳ монда шудааст. “Вобаста ба мавзӯи дарси таълими меҳнат ва ё дар маҳфилҳои иловагӣ хонандагон метавонанд, боз аз наздик бо танӯру ошдон шинос гарданд”,-афзуд манбаъ. Дар мавриди харидорӣ ва шинондани танӯру дегдон манбаъ гуфт, он бо ташаббуси бархе аз падару модарон, маъмурияти мактаб сурат гирифтааст. Мақомот харидории маҳсулот барои хӯрокпазиву нонпазиро ба хоҳиши падару модарон вогузор карда, мегӯянд, «он маҷбурӣ набояд бошад» ва дар ҳолате, нонро пӯхтанд, метавонад, онро ба хонаашон бубаранд.
Мӯҳр
ТАҚВИМ
« Май 2024 » |
---|
Душ | Сеш | Чор | Пан | Ҷум | Шан | Якш |
---|
| 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | |