Таҳдиди то 5 соли зиндон ба Хайрулло, писари калонии Зайд Саидов
Оҷонсии мубориза бо фасоди Тоҷикистон алайҳи Хайрулло Саидов, писари калонии Зайд Саидов аз рӯи моддаи 340 қисми 2-и Кодекси ҷиноӣ айб эълон кардааст, ки аз 2 то 5 соли зиндон ё то 36 ҳазор сомонӣ ҷаримаро пешбинӣ намудааст.
Оҷонсии зидди фасод мегӯяд, айбнома алайҳи Саидов рӯзи 27-уми октябр дар ҳузури вакили дифояш Исҳоқ Табаров эълон гардидааст. Моддаи 340 қисми 2 айбдорӣ барои тақаллуби такрории шиноснома бо маслиҳати пешакӣ ва бо истифода аз техникаи компютериро дар бар гирифта, ҷарима ба андозаи аз сесаду шасту панҷ то нӯҳсаду дувоздаҳ нишондиҳанда барои ҳисобҳо ё маҳрум сохтан аз озодӣ ба мӯҳлати аз ду то панҷ сол пешбинӣ кардааст.
Ин ниҳод Зайд Саидовро низ аз дастандаркорони ин қазия хонда, таъкид мекунад, ки барои ниҳон доштани манфиатдории шахсӣ саҳмияҳои бархе корхонаҳоро ба номи фарзандаш Саидов Хайрулло, ки дар шиносномааш санаи таваллуд «25 апрели соли 1978», яъне 4 сол калон қайд шудааст, ғайриқонунӣ сабт кардааст.
Аммо Хайрулло Саидов қисман гуноҳашро эътироф карда, даст доштани падарашро дар ин қазия қатъиян рад кардааст. Ӯ изҳор доштааст, ки шиносномаи тақаллубиро ҳанӯз соли 1995 замони гуреза будани падараш дар Маскав гирифтааст ва ҳадафи калон нишон додани синнаш дар шиноснома ҳар чӣ зудтар пайдо кардани ҳаққи таҳсил дар Эрон будааст.
Аммо Оҷонсии зиддди фасод талош дорад, ки санаи тақаллубкориро соли 2000-ум, замони вазири саноат будани Зайд Саидов нишон диҳад ва ҳамчун далели дигар зидди ӯ истифода кунад.
Ин дар ҳолест, ки Оҷонсии мубориза бо фасоди Тоҷикистон, рӯзи 24-уми октябр бо пахши як иттилоия хабар додааст, ки тафтиши пешакии парвандаи ҷиноӣ алайҳи Зайд Саидов, собиқ вазири саноати Тоҷикистон дар ҳоли анҷомёбист.
Дар иттилоияе, ки ин ниҳод нашр намудааст, таъкид шудааст, ки дар робита ба парвандаҳои Зайд Саидов алайҳи 14 нафари дигар, аз ҷумла 4 нафар масъули ширкати сохтмонии “Тоҷ-Сохтмон Байналмилал”, 6 мутасаддии Раёсати сохтмони асосии шаҳри Душанбе ва 4 масъули ширкатҳои дигари тиҷоратӣ парвандаи ҷиноӣ боз шудааст.
Мӯҳр
ТАҚВИМ
« Май 2024 » |
---|
Душ | Сеш | Чор | Пан | Ҷум | Шан | Якш |
---|
| 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | |