13 апр 2015 17:23Тоҷикистон / Сиёсат / Тема дня

Мансур Ҳамидов, “сайтбандиҳо”-ро “риояи қонун” хонд

Мансур Ҳамидов, директори генералии ширкати мобилии “Tcell” имрӯз, 13-уми апрел зимни як ҳамоиш дар Душанбе бо изҳори таассуф сайтбандиро аз ҷониби ширкаташ тасдиқ кард.

Ҳамидов дар посух ба суоли хабарнигрон, ки чаро аз тариқи “Tcell” ҳолатҳои масдуд гардидани сомонаҳо ба миён меоянд, гуфт, “афсӯс , ки чунин ҳолатҳо ҳастанд, вале на ҳама вақт ин ҳолатҳо аз мо вобастаанд ва дар ин маврид на ҳама маълумотҳоро мо пешниҳод карда метавонем. Содатар карда гӯям дар Тоҷикистон ҳастанд қонунҳое, ки мо бояд онҳоро риоя кунем”.

Мудири кулли “Tcell” афзуд, ки онҳо ҳоло бо якчанд технологияи муосир кор карда истодаанд ва ҳаракат мекунанд, ки дар оянда ҳолатҳои масдуд гардидани сомонаҳои интернетӣ тариқи ширкаташон камтар шавад.

Ин дар ҳолест, ки охирин ҳолати масдудсозии сомонаю шабакаҳои интернетӣ дар Тоҷикистон аввали моҳи равон сурат гирифта, дастрасӣ ба шабакаи Ютуб дар кишвар тайи ду рӯз маҳдуд шудааст.

Манбаи “Озодагон” дар яке аз ширкатҳои дастраскунандаи интернет масдудияти Ютубро ба дастури Хадамоти алоқа марбут донист, ки бо сабаби корҳои профилактикӣ аз ширкатҳои интернетрасон хостааст, Ютубро масдуд кунанд.

Баста шудани ин видеопартал дар қаламрави Тоҷикистон бори аввал нест ва ибтидои соли равон низ саҳифаи Ютуб бо шумули шабакаи иҷтимоии русии “Одноклассники” масдуд гардида буд. Дар пайи масдудияти ин шабакаҳо дастрасӣ ба як қатор филтршикан (анонимайзер)-ҳо, аз ҷумла Hideme.ru, Cameleo.Ru, 2ip.ru/anonim ва xnet.club” низ маҳдуд гардид.

Масдудсозии сомонаҳо дар Тоҷикистон, ки ба як раванди маъмулӣ табдил ёфтааст, борҳо аз ҷониби созмонҳои байналмилалӣ мавриди интиқод қарор гирифта, аз мақомоти Тоҷикистон дархост шуда буд, ки ба ин раванд хотима диҳанд.

Мӯҳр

Хабарҳои монанд: