02 июл 2015 16:13Оcиёи Марказӣ / Тоҷикистон

Узбакистон аз қасди тоҷик барои табадулот дар Қирғизистон иттилоъ дод

Мақомоти амниятии Узбакистон ҷузъиёти бозпурсии ду шаҳрванди кишвари худро оммавӣ кардаанд, ки тибқи нишондоди онҳо як шаҳрванди Тоҷикистон дар раъси гуруҳи ҷиноӣ дар Қирғизистон қасди табадулоти давлатиро доштааст.

Дар ин бора мақомоти амниятии қирғиз иттилоъ дода, афзудаанд, ки ин бозпурсиҳо бо дархости ҷониби Қирғизистон дар робита ба фаъолияти Рашид Камолов, имом-хатиби масҷиди Қарасуи вилояти Ӯш ва шариконаш сурат гирифтааст.

Тибқи бозпурсии мақомоти Узбакистон дар масҷиди Қарасу, аз калонтарин масоҷиди ҷануби Қирғизистон, таҳти роҳбарии як шаҳрванди Тоҷикистон гуруҳи экстремистҳо омода мешудаанд. Бар асоси нишондоди ин ду сокини Узбакистон, гӯиё шаҳрванди Тоҷикистон, ки номаш зикр намешавад, гуруҳи ҷиноиро раҳбарӣ карда, барои анҷоми ҳамлаи интиҳорӣ ва куштори сиёсатмадорон дар Қирғизистон нақша мекашидааст. Саркардаи асосии ин гуруҳ худи имомхатиби масҷид-Рашид Камолов будааст.

Мақомоти Қирғизистон мегӯянд, бозпурсии ин ду шаҳрванд иттилояшонро дар бораи фаъолияти Рашид Камалов, имом-хатиби масҷиди Қарасу тасдиқ кард, ки бо ҷалби хориҷиён нияти табадулот дар Қирғизистон доштаасту баҳори соли равон боздошт гардид: “Бозпурсишудаҳо тасдиқ карданд, ки Камолов дар соли 2011 Ҳаракати фаъолияташ мамнуъ дар Қирғизистон – Ҳизб-ут-Таҳрирро сармоягузорӣ карда, инчунин диндоронро ба ҷиҳод ва ақидаҳои ифротгароӣ даъват мекард”.

Ин имом-хатиби қирғиз, ки ҳоло дар боздоштгоҳи муваққатии Кумитаи амнияти Қирғизистон нигаҳдорӣ мешавад, ба иттиҳоми ҷалби ҷавонон ба ҷангҳои Сурияву Ироқ боздошт шуда, ҳоло ӯ дар ташкили гуруҳи ҷиноӣ барои сарнагун кардани ҳукумати қонунии Қирғизистон муттаҳам мешавад. Ба иттилои масъулини амниятии Қирғизистон, гӯиё ин имом-хатиб қасди сарнагуни ҳукумати қонунию ҷорӣ кардани шариати исломӣ дар қаламрави кишварашро доштааст ва барои пиёда кардани ин ҳадафи худ ба неруи ҷангҷӯёни ДИИШ аз Қирғизистон такя мекардааст.

Мӯҳр

Хабарҳои монанд: