Ҷасади Умаралиро бе ташхис ба хок супурданд
Ҷасади Умаралӣ Назаров, кӯдаки 5-моҳаи тоҷик, ки субҳи имрӯз, 16 ноябр аз Санкт Петербург ба Душанбе интиқол ёфт, баъди зуҳри рӯз дар деҳаи Сафеддорҳои бобои Валии ҷамоати Қалъаи Дашти ноҳияи Файзобод ба хок супорида шуд.
Дар ин бора ба "Озодагон" наздикони Умаралӣ Назаров хабар доданд. Онҳо афзуданд, ки аз соати 8 то 12:00 дар фурудгоҳи Душанбе ташхисгарони тоҷикро интизор буданд, ки натиҷа надод ва онҳо тасмим гирифтанд, ки бе ташхис ҷасади кӯдаки 5-моҳаро ба хок супоранд.
Тавре хабарнигори “Озодагон” аз фурудгоҳи Душанбе иттилоъ дод, наздикони Умаралӣ баъди интизории чандсоата бо ҷасад, аз фурудгоҳи Душанбе ба ноҳияи Файзобод раҳсипор шуданд: "Аммо аз Вазорати умури хориҷӣ занг заданд, ки мошини ёрии таъҷилӣ фиристодаанд. Афроде, ки бо мошини ёрии таъҷилӣ омаданд, пешниҳод карданд, ки ҷасади Умаралиро то ноҳияи Файзобод расонанд. Аммо наздикон ин пешниҳодро рад карда, бо мошини худашон ҷасадро барои хоксупорӣ ба деҳаи Сафеддорҳои бобои Валии ноҳияи Файзобод бурданд".
Маҳкам Ҳабибуллоев, тағои Рустам Назаров, падари Умаралӣ, қаблан дар суҳбат бо “Озодагон” гуфт, намояндагони сафорати Тоҷикистон дар Русия изҳор доштанд, ки дар Душанбе боз ташхиси мустақилона гузаронда хоҳад шуд: “Гуфтанд, дар Душанбе шуморо пешвоз мегиранд. Аммо аз соати 8:00 инҷоем, лекин касе нест. Агар ҷасадро бурда ба хок супорему ташхисгарон баъд биёянд хуб намешавад. Айни ҳол дар фурудгоҳ интизорем. Агар ташхис нашавад, бигузор ба мо гӯянд, то мо кӯдакро бурда ба хок супорем”.
Маҳмадшариф Шарифов, раҳбари Маркази ҷумҳуриявии ташхиси судии тиббӣ ба “Озодагон” гуфт, дар ниҳоди тобеяш комиссия барои гузаронидани ташхиси ҷасади Умаралӣ омода аст, вале барои ин қарори мақомоти дахлдор, аз ҷумла додситонӣ лозим аст: “Наздиконашон бояд ба прокуратура муроҷиат кунанд ва мо дар асоси қарори прокуратура ҷасадро аз ташхис мегузаронем. Комиссияи мо тайёр аст”.
Ҳавопаймои “Сомон Эйр” бо Зарина Юнусова ва ҷасади фарзанди 5-моҳааш, Умаралӣ Назаров соати 8:15-и имрӯз, 16 ноябр дар Душанбе фуруд омад.
Ин кӯдаки тоҷик, шаби 13 ба 14 октябр баъди чанд соати гирифтанаш аз дасти модар дар беморхонаи Симбалинаи Санкт Петербург ба таври мармуз даргузашт. Додгоҳи ноҳияи Октябри Санкт Петербург ба далели нақзи қоидаҳои будубош модари Умаралӣ-Зарина Юнусоваро аз Русия хориҷ кард ва додгоҳи шаҳрӣ низ ин қарорро бетағйир гузошт.
Бо вуҷуди эътирозҳо, ки депорти Зарина Юнусова таҳқиқи марги фарзандаш-Умаралиро мушкил месозад, мақомоти Русия ин модари ҷабрдидаро соати 1:12 дақиқаи шаби 16 ноябр аз Санкт Петербург ба Душанбе равон карданд: "Феълан дар Русия таҳқиқи марги Умаралӣ Назаров идома дорад".
Мӯҳр
ТАҚВИМ
« Апрел 2024 » |
---|
Душ | Сеш | Чор | Пан | Ҷум | Шан | Якш |
---|
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | |