Муфтӣ: Касе сарвари давлатро иҳонат кунад, Худованд хору залил мегардонад
Раиси Шӯрои уламои Тоҷикистон мегӯяд, Худованд касонеро, ки сарвари давлатро иҳонат мекунанд, хору залили ин дунёву охират мегардонад.
Сайидмукаррам Абдулқодирзода, раиси Шӯрои уламои Маркази исломии Тоҷикистон 18 декабр дар мавъизаи намози ҷумъа дар Масҷиди марказӣ гуфт, Худованд ба онҳое, ки сарвари давлат ва пешвои миллатро эҳтиром кунанд, осудагии ин дунёву охиратро ато мекунад, аммо касонеро, ки ба ӯ иҳонат мекунад, хору залили ин дунёву охират мегардонад.
Ҷаноби Абдулқодирзода гуфт, шоҳи одил, президенти одил ё пешвои одил ҳамин аст, ки адл мекунад. Ӯ раисиҷумҳури кишварро шахси одил хонда, ба унвони далел гуфт, “як миллати парокандаи ҷангзадаи офатзадаро муттаҳид кардан ва бо кумаки парвардигор оромиро овардан ҳамин аст адолат”.
Ӯ бо таъкид ба ин нукта, ки бесуботӣ ва нооромиҳо дар пайи нофармонии роҳбару ҳукумату давлат сар мезанад, мардумро ба шукргузорӣ аз ваҳдату оромӣ, якдилӣ ва сарҷамъ шудан атрофи раҳбари давлат даъват намуд.
Раиси Шӯрои уламои Маркази исломии Тоҷикистон аз ҳаводиси солҳои ҷанги шаҳрвандӣ ёд оварда, гуфт, “давлат дар ҳоли парокандагӣ буд, роҳҳову купрукҳоро тарконда буданд ва ҳатто мехостанд Тоҷикистонро қисмат кунанд. Ман шоҳиди ҳол будам, ки касе ҷуръат намекард ин вазифаи пурмасъулиятро бар душ бигирад. Бинобар ҳамин барои раҳо кардан аз парокандагиву бадбахтӣ бо фазлу карами Худованд пешвои миллат ва сарвари давлатро насибу рузии мо гардонид. Ҳеч вақт инсон набояд фаромуш кунад”.
Сайидмукаррам Абдулқодирзода нооромиҳои Тоҷикистонро “тиҷорати абарқудратҳо” номида гуфт, барои абарқудратҳо ҷанг ба як тиҷорат табдил ёфтааст: “Ҳар куҷое бихоҳанд ва дар ҳар миллате агар ҷавонони бехираду бесаводро пайдо кунанд, ки як шуришу нооромиро ба вуҷуд оварда битавонанд давомашро бубинед, ки чи мешавад. Ин аст ки кишварҳову миллатҳоро ба хуну хок мекашонанду тиҷорати худашонро пеш мебаранд”.
Мӯҳр
ТАҚВИМ
« Май 2024 » |
---|
Душ | Сеш | Чор | Пан | Ҷум | Шан | Якш |
---|
| 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | |